الموضوع: حدث فى المملكه

موقف انساني جميل
بل هو واجب
في كل مكان يوجد الطيب و الخبيث
فمن المعلوم ان المملكة من اكثر الاماكن التي ينتهك فيها حقوق الانسان

انا هقص تجربتين ممرت بهما اثناء عملى بالخليج مرة فى ابوظبى و مرة فى قطر , صباح يوم العيد وكنت نازل اصلى لقيت عجلة على الارض و كنت بحاول اغيرها و الكوريك مش شغال و الوقت يدوب بعد الفجر و الشارع مفهوش بشر , فى خلال دقائق جت عربية شرطة معرفش صدفة و لا من كاميرا مراقبة و نزل من منها الجندى ب3 شرائط معرفش يبقى ايه ؟ شاويش مثلا و ضحك مش هتلاقى مكان تغير فيه التير المبنشر ( قوله هو) و أخرج عصير كانز قال اتفضل اشرب العصير بتاع العيد (ضاحكا) اكون انا غيرت التير و قد كان و طلبت اسمه لشكره عند المسؤولين و لكنه رفض و قال هذا و اجبى و مشى حتى دون معرفة اسمه.
المرة الثانية كنت طالع بسيارتى سياحة من قطر و وصلت ابو ظبى و مش عارف مكان الفندق اللى حاجز فيه و ركنت العربية علشان اسال عن العنوان ....انشقت الارض عن عربية شرطة و قال انت مخالف لأنى راكن بدون ما اشغل الانتظار و قلت له انا لسه جاى البلد و تائه و طبعا لاحظ نمر العربية قطر قال لى اهلا و سهلا بك فى بلدك الثانى و مشيت وراء عربيته و وصلنى الفندق و ترك لى نمرته لو احتجت اى حاجة خلال اقامتى فى ابو ظبى لأنه اعتبرنى ضيف عندهم. الكلام ده كان فى اواخر التسعينات.
الى هنا و الموضوع لم ينتهى برضه مصر رغم ظروفها لسه بخير لأنى مرخص العربية الجديدة يوم الخميس اللى فات فى مرور البساتين و اللى اتعامل مع مرور البساتين يعرف انه كان قطعة من العذاب يوم الخميس فوجئت بنظام محترم و مفيش زحمة شبابيك و تأخذ نمرة و تنتظر صوت الة الانتظار عميل رقم كذا بدون اى زحام يذكر - يمكن علشان الخميس نصف يوم و حرارة الجو كانت الاعداد قليلة جائز- بس فوجئت بالرخصة طلعت فى ساعتين و بدون اى عقبات و بدون"اكراميات" و دخلت على رئيس الوحدة و اثنيت على التطور الرائع و بدوره قال ده واجبنا و اقل حاجة و ان كان الفرح يطل من عينيه على كلمات الثناء من مواطن عادى لا يعرف احدهم الاخر .....لسه مصر بخير

طبعاً البوست ده انتشر في الفتره الاخيره بشكل كبير جداً و بعيدا عن مدى صحته من عدمه
احب اقول الآتي مع العلم اني عايش في السعوديه من 6 سنوات طبعاً فيه حاجات كتيره كويسه بتحصل
و اللي مساعد على كده الامكانيات الجباره المتوفرة للشرطه من جميع النواحي يعني عربيات ورواتب و امتيازات و خلافه
بس برضه للعلم ان هنا مش سويسرا مثلاً يعني فيه ناس بتتظلم و لو المشكله مع واحد سعودي يبقى انسى ان انت تاخدحقك نهائياً حتى لو معاك كل الاثباتات و الشهود و هتتعامل بشكل سيئ جداً
الشاهد من الكلام ان في الفتره الاخيره انتشرت قوي البوستات و الحواديت اللي بتوصلنا لمرحلة جلد الذات
و ان شوفوا هما عندهم ايه و احنا عندنا ايه و الموضوع يتحول من حاجه ايجابيه إلى تعظيم للسلبيات في بلدك
يعني مثلاً اكيد فيه امثله كتير بتحصل من الشرطه في مصربس مفيش حد بيتكلم عنها و لو حد اتكلم هتلاقي الناس كلها بتقول ماهو ده شغله يعني العادي
و كلامي مش قاصد ان مفيش سلبيات بالعكس فيه سلبيات و كتير جداً كمان بس مفيش مكان كله سلبيات ولا مكان كله ايجابيات
بفتكر بالمناسبة حلقه لمنى الشاذلي كانت بعد الثوره و هي قاعده و مجعوصه كده بتقول لاحد ضيوفها احنا عايزين شرطه زي بناعت السويد فالراجل رد عليها و براءة الأطفال في عينيه و قالها مش لما يبقى عندنا شعب زي اللي عايش في السويد الاول
و هختم بالجمله الشهيرة لاحمد زكي في فيلم ضد الحكومه
((كلنا فاسدون ولا استثني من احد))
مين فينا مشفش غلط و سكت عليه اذا مكنش شجعه اذا كان بيصب في مصلحته

و أخيراً
(( إن الله لا يغير ما بقوم حتى يغيروا ما بأنفسهم))

لا مفيش مبالغات- انا تعرضت لمواقف كتير مع الشرطة والشرطة ماشي بنظام ان اللي ليه الحق هو اللي اشتكي يعني لو سعودي اشتكي سعودي الاول اللي علي حق مالم يثبت الثاني العكس
وقس علي هذا كل المشاكل مع الشرطة
يكفي ان يدخل اي محل ويطلب زي غيره لو لابس كل الاوسمة والرتب
اتذكر ان حصل لفرع من فروع الشركة اللي انا شغال فيها حادث بعد الدوام
كان واحد دخل بسيارته الازاز بتاع المحل كسرة وتوفي وكان السبب في كده
واحد قطع اشاره عليه ومسرع جدا
المهم ان الازاز اتكسر واصبح المحل مفتوح ع الشارع
المسئول عن المحل كان تعبان ومراحش واتاخر علي ما اتصل بيا لاني جاره يعني علي الساعة
10 صباحا وقالي مش هقدر اروح وانا اتصلت بزميلي بس هو ممعهوش مفتاح ومايعرفش البيت
خد المفاتيح وديهاله - رحت خدت المفاتيح ورايح علي المحل الاقي سيارتين شرطة واقفين قلت يبقي المحل
اتسرق - رحت للشرطة سلام عليكم نزل من السيارة وقالي وعليكم السلام انت راعي المحل
قلتله ايوا قالي فينك احنا هنا من امس والمحل مفتوح ولا احد جانا وخفنا لينسرق
اتصلت علي الموظف وفتحت الباب ودخلت الباب ومعايا الشرطة واطمنو ع المحل وتوكلو علي الله
التعامل راقي جدا في كل مايتعلق بالشرطةانا كنت متفاجئ اول ماجيت من تعامل الشرطة واحترامها للناس بكفاية لما تعدي علي حاجز للشرطة ومتنزلش من سيارتك بس تفتح الازاز وتكلمه ولو اشتبه فيك لاي سبب بكل هدوء يراجع اوراقك بدون لفظ جارح او اسلوب مهين