السلام عليكم , والله انا تقريبا ظروفى زى حضرتك , ساكن فى الشروق و بنزل وسط البلد كتير وبعمل مسافات , انا لما قررت اشترى عربيه حطيت شويه مواصفات اهمها الأعتماديه وتوفير البنزين والصيانه , وبعد البحث المضنى استقريت على سوزوكى سويفت الشكل الجديد الهاتش باك عربيه يابانى سعرها فى حدود ال100 الف جنيه اعتماديه جدا وموفره جدا فى البنزين 1200 سى سى 4 سلندر مش 3 زى الميتسوبيشى الاتراج , اوتوماتيك وفيها تقريبا كل الأوبشنز اللى ممكن تحتاجه من رفاهيه وامان وتكنولوجيا غير معقده وكمان سير الكاتينه فيها جنزير بالأضافه لشكلها الرائع , العيب الرئيسى فيها هو صغر حجم الشنطه وده لو يفرق معاك قوى فى منها اصدار السيدان السوزوكى ديزاير ودى اغلى منها تقريبا ب7 الاف جنيه , ولو حضرتك محتاج تعرف اكتر عن العربيه دى فى قسم السوزوكى شارحين كل حاجه بالتفصيل, انا مع الاسف مكانش ليا نصيب فى العربيه دى لأنى بعد ما حجزت فى التوكيل وكنت مستعد استنى ال6 شهور لأنى مش بحب الاوفر برايس واستغلال التجار وفعلا اكتر عربيه كنت مقتنع بيها , كان ليا نصيب اشترى سياره من احد اصدقائى المقربين لظروف سفر مفاجأه وهى السكودا الرومستر اللى انا كنت بتريق عليه كل ما اركبها معاه بس لما ركبتها منه بعد ما سافر عرفت اد ايه ثقافة السوق المصرى فى السيارات , بالنسبه لى انا كنت مستحيل اشترى سكودا رومستر وكنت ممكن اشترى ماتريكس بس فعلا هى عربيه رائعه بكل المقاييس وفيها كل ما تشتهى الأنفس من الأوبشنز رفاهيه وامان وهى المعنى الحقيقى للسياره العمليه , بس اعتقد صعب انى ارشحها لك لأنها زيرو تقريبا ب 154 الف ومستعمل هتلاقيها نادره شويه , اسف على الأطاله بس حبيت انقل لحضرتك تجربتى عند اختيار سياره وعارف يعنى ايه انك تسكن فى الشروق وانك مضطر تمشى على طريق السويس يوميا وربنا يوفقك فى الاختيار ان شاء الله