عملت حادثة جامدة بالفلونس
السلام عليكم
يوم السبت بليل كنت راجع من على طريق ساحلى كده .. هو طريق متسلفت و تمام بس مشكلته انه غير مضاء
كنت واخد شمالى و ماشي على 90 تقريا .. كنت مرهق و حاسس اني مش شايف كويس
المهم فجأة لقيت الرصيف بتاع داخلة يوترن قدامي
طبعا ملحقتش افرمل ولا حتى فكرت اني افرمل و حاولت اني اكسر يمين بسرعة لكن برضه مكنش فيه وقت و روحت داخل بسرعتي ديه بالعجل الشمال في الرصيف
العربية طارت و اتهبدت طبعا بمنتهى القوة .. اصوات و دربكة و رج و هبد و مكنتش عارف ايه اللي بيحصل .. مسكت فى الدريكسيون بقوتي و كنت مستني خلاص ان العربية تتقلب
لكن الحمد لله العربية ثبتت و ووقفت ... انا حتى مش فاكر انا اللى وقفتها ولا هي وقفت لوحدها
طبعا نزلت من العربية اعصابى سايبة .. على ما اتجمعت على نفسي و كلمت صحابى
المهم جبنا كساحة شالت العربية
بصراحة قولت لو ودتها التوكيل هيقولوي فتح و نصب .. و تاي يوم جبت واحد بتاع عفشة بص عليها .. و قالي التلفيات كالاتي
- مقص شمال
- مساعد شمال
- الذراع بتاع ال steering ده مش عارف اسمه ايه الداخلى و الخارجي
- طبعا و الجنطين (المونيوم فبريكا ) باظو ,, و الكوتش طبعا اتحول لخردة ,,
اشتريت الحاجة من التوكيل و خليت الراجل يركبها
فاضل بس اني اروح اظبط اتزان
بعد لما الراجل ركب الحاجة جيت ادور العربية لمبة ال ABS نورت .. بس لما بطلت الكونتاكت و شغلته تاني منورتش و مقتش تنور تاني
سؤالي هل كده ممكن يكون فيه حاجة فى ABS ولا خلاص طالما اللمبة مش بتنور ؟؟ بفكر اوديها التوكيل يعملو كشف عام كده عليها
تاني سؤال بالنسبة للجنوط .. فيه واحد فيهم اتدمر تماما و التاني يعني مش قوى الراجل استعدله و حطلي فيه كمرة
هل لو جبت جنط واحد هيبقى فيه مشكله فى اتزان العربية ؟ ولا اغير الاتنين .. انا مش عارف اتلجنوط الالمونيوم كلها نفس الوزن ولا لأ
و هل ينفع اجيب جنطين حديد ؟؟ يعنى يبقى اتنين حديد و اتنين المونيوم ؟؟
اخر حاجة احب اقولها ان فعلا الفلونس عربية ممتازة ... عربية تانية كانت هتتقلب بمنتهى البساطة
لكن فعلا العربية تحس انها كانت هي اللي بتحول تعمل كنترول و تعدل نفسها