أُريد شراء سيارة من هؤلاء بماذا تنصحوني؟

السلام عليكم ورحمة الله وبركاته
السادة الكرام أعضاء مُنتدى نايل موتورز المُميّز
تحيّة طيبة وبعد

باختصار: أُريد شراء سيارة جديدة ضمن الفئة السعرية 90 لـ 110 ألف جنيه للدواعي الآتية:

1. السفر: أنا أسكن بالقاهرة وأهلي بالاسكندرية بالإضافة لبعض سفرياتي للغردقة أو شرم الشيخ
2. التنقُّل داخل القاهرة

المواصفات المرغوبة:
1. لا تقل عن 1500 سي سي
2. ناقل أتوماتيك وتكييف
3. ثبات وأمان عالي
4. قطع غيار متوفرة ومعقولة السعر أو توكيل محترم.

السيارات المحتار في الاختيار بينها:

1. رينو لوجان 2015-2016
2. نيسان صني 2015 (الشكل الجديد أو القديم)
3. لادا جرانتا أتوماتيك


بماذا تنصحوني يا أهل الخبرة..

في انتظار ردودكم يا جماعة ياريت حد يفيدنا ف الموضوع ده

مفيش واحدة في التلاتة هاتديك ثبات على سرعة عالية , التلاتة ثباتهم نص نص (بافتراض ان اللادا مبنية على نفس شاسيه اللوجان لو انا معلومتي صح)

التوكيل رينو و لادا الافضل او الاقل سوء
كمشاكل , الاشهر بالمشاكل فيهم هي الصني , و هي الاكثر انتشارا برده , يليها في انتشار العربية اللوجان بس معرفش مشاكلها ايه و ان كانت مش بنفس الصيت بتاع الصني , الجرانتا لسه ما اتجربتش

أستاذ تامر، أنا مُتشكِّر لحضرتك جدًا، سؤال بس من فضلك
تنصح بإيه أحطُّه ف الاعتبار بالمواصفات اللي أنا كاتبها؟

أفيدونا يا جماعة الله يكرمكم، هل فيه أي اختيارات أُخرى أحطها في الاعتبار بُناءًا على المعايير اللي أنا ذكرتها فوق؟

انا اسف , اقصد بالتوكيل رينو و نيسان , لادا سيء

بالنسبة لأنصح بإيه , فاللي ترتاح له منهم
انا لأني نفسيا مش باحب الصني (و عشان كده ممكن اكون مهول مشاكلها بس انا عن نفسي مش بانصح بيها) هاروح للوجان
ناس تانية هايبقى رأيهم العكس , عموما المقارنة مش بعيدة يعني

نيسان صنى الشكل القديم احسن ثباتا واكتر انتشارا لقطع الغيار خارج التوكيل وتوكيل اداءه معقول

أ. أحمد
ألف شُكر على ردّك
السؤال بقى: هل حضرتك متأكد من إن الشكل القديم هيبقى يعتمد عليه كويس ف السفريات دي؟
وهل الشكل القديم بيبقى 2015 برضو؟ ولا بتبقى من السنين اللي قبل كده؟

في انتظار آرائكم يا جماعة ولو حد مجرّب اللادا المانيوال ياريت يفيدنا، واللي عنده حاجة خارج الخيارات التلاتة دول يقترحها من فضلكم.. بس ياريت نستثني الصيني نهائي..

ياريت تخرج الادا من حساباتك على الاقل لأنها لسه متجربتش وانت مش حمل مشكلة ان العربية تعطل وانت مسافر اسكندرية او راجع منها
تبقى المقارنه بين الصنى واللوجان
اللى معاه صنى بيمدح فيها وان كان ظهر عيوب فى الفرامل خصوصا الخلفية الكلام ده كان فى الموديل القديم الشكل الجديد لسه معرفش
اللوجان الشكل القديم مع واحد زميلى مانيوال ومبسوط بيها بس برضه الشكل الجديد ايه اخباره معرفش
الاتنين ثبات حتى 120-140 بس ومفيش اكتر من كده خصوصا لو الطريق ملتوى والاسفلت طالع نازل
وخدها قاعدة اى عربية التعليق الخلفى ثابت متحاولش تزود عن 140 كيلو الا لو فيها انظمة اتزان الكترونية ودى مش متوفرة لا فى الصنى ولا فى اللوجان
تقبل مرورى

انا شايف احسن حاجة رينو لوجان اوتو و لو مكانك هجيبها بدون تردد

اقتباس:

---

المشاركة الأصلية كتبت بواسطة أحمد رضا

أ. أحمد
ألف شُكر على ردّك
السؤال بقى: هل حضرتك متأكد من إن الشكل القديم هيبقى يعتمد عليه كويس ف السفريات دي؟
وهل الشكل القديم بيبقى 2015 برضو؟ ولا بتبقى من السنين اللي قبل كده؟

---

يعتمد عليها ان شاء الله مافيش مشكله وحتى لو ماعجبتكش ممكن بسهوله تبيعها لان الشكل ده مطلوب وهتبقى خسارتك قريبه الف او اتنين بس ان شاء الله هتعجبك ودور ف المنتدى كدا عن العربيه واقرا وقرر
الشكل القديم فى 2015 ف المعارض بس مش متوافر اوى يعنى محتاج بس لفه صغيره كدا او تتصل بالمعارض الكبيره وتسالهم والافضل من ده كله لو الفلوس موجوده كاش تشوفلك واحده على دوبيزل تكون كسر زسرو يادوب علقت نمر كدا هتبقى ركبت زيرو وف نفس الوقت وفرتلك 10 او 15 الف

حاجه مثلا زى دى كدا
https://egypt.dubizzle.com/ar/cars/n...UmcGFnZT00OA==

انت بتقول لغاية 110 الف يعنى حتى الآن فئه ألانسر أو سيراتو فئه أولى متقدرش تجبها مع احترامى الشديد جمع فلوس شويه وفكر بعربيات تانى

حضرتك عايز عربية امان فى السفر و ثباتها محترم يبقى بدون تفكير بروتون بيرسونا او جين 2 , البيرسونا لو محتاج شنطة كبيرة شوية عشان السفر و كمان فيها مثبت سرعة , الجين 2 شكلها احلى و شنطتها معقولة ومافهاش مثبت سرعة , الثبات على الطريق محترم جدا جدا , و فرامل abs و 2 اير باج و صاج العربية تقيل مش ورق . هاتضطر تعلى بس بالسعر ل 119 الف , التوكيل فى ناس بتقول عليه سئ , لكن بالنسبالى ماشفتش اى مشكله منه , ومتواجد قطع غيار برة و صيانتها معروفة .

اقتباس:

---

المشاركة الأصلية كتبت بواسطة hanyyacot

حضرتك عايز عربية امان فى السفر و ثباتها محترم يبقى بدون تفكير بروتون بيرسونا او جين 2 , البيرسونا لو محتاج شنطة كبيرة شوية عشان السفر و كمان فيها مثبت سرعة , الجين 2 شكلها احلى و شنطتها معقولة ومافهاش مثبت سرعة , الثبات على الطريق محترم جدا جدا , و فرامل abs و 2 اير باج و صاج العربية تقيل مش ورق . هاتضطر تعلى بس بالسعر ل 119 الف , التوكيل فى ناس بتقول عليه سئ , لكن بالنسبالى ماشفتش اى مشكله منه , ومتواجد قطع غيار برة و صيانتها معروفة .

---

يعني البيرسونا أحسن؟ طيّب إيه عيوبها يا مستر هاني؟

اقتباس:

---

المشاركة الأصلية كتبت بواسطة أحمد رضا

يعني البيرسونا أحسن؟ طيّب إيه عيوبها يا مستر هاني؟

---

العيوب زى ماقلتلك التوكيل بتاعها مش قد كده . عز العرب معاه ماركات تانية عالية ف عشان كده مش مديها اهتمام . عن نغسى ماواجهتش مشكلة معاه لحد دلوقتى . العيب التانى استهلاكها للبنزين اعلى شوية من مثيلاتها بس مش لدرجة ان بيتك هايتخرب يعنى الفرق مش كبير . ممكن تلاقى زراير المالتى اللى فى الطارة بتعلق شوية. فى ناس بتقول ان تقفيلها وحش . بس انا شايف ان كل العربيات لحد سعر ال 150 الف كلهم تقفيلهم وحش . فى ما عدا ذلك . العربية ادائها محترم اوى و ثبات و اطمئنان على السرعات و اى مناورة مفاجئة . عالية عن الارض كويس عشان المطبات . سحبها حلو اوى . تكييف محترم اوى.