الى ايّ حد ممكن يتمادى أمين الشرطة في التفتيش الذاتي؟ - كمين الشروق
الساعه 11:30 مساءً.. كمين الشروق.
راجع انا واتنين زملائي كنا في زيارة لواحد صاحبنا في الشروق.. داخلين على كمين الشروق الثابت. أمين شرطة لابس ملكي بيفلتر العربيات.
صاحبي اللي قاعد جنبي كان حاطط ركبته على التابلوه. لمحه الأمين قام مشاورلي اقف.
جايين منين يا رجاله؟ من الشروق
كنته بتعمله ايه؟ بنزور واحد صاحبنا
بطايقكم.. واركنلي قدّام.
ركنت.. نزلنا, اخدني على جنب وقالي جايين منين؟ قلت له القصة
اخد صاحبي التاني على جنب بعيد وسأله نفس السؤال.
شاف البطايق.. طلبه في كلية الصيدلة كلنا والعناوين مصر الجديدة - جسر السويس - المهندسين (اللي هو اقصد مش اماكن لبش ولا حاجة)
بعدين قالنا خشو اوضة الظابط واستنوني هناك.
دخل ورانا. قام شايل الطبنجة واللاسلكي وحطهم على المكتب. وقال بالنص: شكلكو ناس محترمين اللي معاه حاجة يطلعها قبل ما افتش عشان لو قفشت حاجه بعدين هزعل منكو.
معناش حاجة يا ريس فتش براحتك.
اخد واحد من الزملا قدامنا فتشه تفتيش عادي. وبعدين قلّعه البنطلون.. ومسك البوكسر عايز يقلعهوله كمان.
صديقي: انت ايه اللي بتعمله ده؟ آخرك تهويّه (البوكسر) لكن متقلعنيش.
هتقلع ولا أناديلك الظابط؟ لا مش قالع.
مسكني انا.. راح على البنطلون على طول وعايز يقلعهوني. قمت ماسك البنطلون قاللي عندك اعتراض؟ قلت له فتشني زي ما انت عايز لكن قلع مش هقلع.
يا محمد بييييييه.. (بيخوّفنا) وراح طلع ينده على الظابط.
دخل الظابط وشغل ازيكو يا شباب عاملين ايه ساكنين فين ايه اللي حصل؟ كل ده والأمين مش موجود
وخلاص معلش انا اسف على اللي حصل اتفضلوا مع السلامه
الناس دي حقها تفتش إلى اي مدى؟
وهل اللي حصل كسر عين عشان طريقة قعدة زميلي واحنا داخلين على الكمين؟
