يا جماعة استهدوا بالله
مبدئيا بس اعتقد هنا الناس القديمة عارفانى لكن عشان ابقى واضح كمان مرة
انا من الناس اللى متحبش المشاحنات و لا الخلافات و حريص على انى لا اكون طرف فيها
اعتقد كمان الاخ باسم كان ليا معاه كلام فى مواضيع مختلفة و عارف اسلوبى كويس
لذلك محاولة منى لفض الاشتباك
عندى كلمتين هوجههم للاخ باسم كان نفسى اقولهم له من زمان و اتمنى يقبلهم و اكون وضحتله جانب نفسى جايز هو نفسه مش منتبه له
بص يا اخ باسم
انت عارف ان انا اتمنى لك الخير و التوفيق فى محاولاتك للبحث عن الحياة الافضل. . . و عبرت لك عن كده كذا مرة قبل كده
لكن اللى انا ملاحظه
انك فى احيان كثيرة بتحاول تكتسب قوة الدفع للسير قدما فى موضوع هجرتك بطريقة سلبية
يعنى ايه
يعنى انت المفروض يكون دافعك الوحيد للهجرة هو البحث عن الحياة الافضل فقط لا غير. . . يعنى تبص لقدام و تتطلع لتحسين حياتك
لكن الملاحظة اللى عندى
انك بتحاول تعمل كده بشكل سلبى عن طريق انك بتعمل تكتيل لطاقة سلبية عن كل ما هو سلبى حولك و تحاول ان تستمد من ذلك قوة دفع
ودليلى على ذلك شحنات الطاقة السلبية اللى بتظهر بوضوح فى مواضيعك اللى بتعذب نفسك بيها و كمان مش كل اللى بيقرأها بيتفهم ما بداخلك
انا رأيى
انك بدل ما انت عمال تشحن نفسك بطاقة سلبية عشان تستمد قوة الدفع اللازمة لانك تنفذ موضوع مش سهل زى الهجرة
بدل ما تعمل كده
حاول تفكر بشكل ايجابى فى حياتك و ان بحثك عن الحياة الافضل يستحق الغربة و البعد عن اهلك. . . و هو ثمن كبير و ثقيل مهما حاولت بلا وعى ان تقلل منه حتى لا يعوقك عن تحقيق رغبتك. . . و حقك فى البحث عن حياة افضل ده مفروغ منه و لا يملك احد ان يحرمك منه
اتمنى تكون تفهمت وجهة نظرى و تقبلت الكلمتين بتوعى دول بصدر رحب و كمان تعيد نظر مع نفسك كده فى افكارك و مسارها و دوافعها. . . لان صدقنى انت لو بتستمد طاقتك على المثابرة من شحن سلبى. . . طب هتعمل ايه لما تزول اسبابه و تلاقى الدنيا اللى انت رايح لها مثلا متعبة برضه و مش زى ما انت متخيل. . . هتستمد طاقة المثابرة من ايه. . . من حاجة واحدة بس. . . قوة هدفك داخلك فى البحث عن الحياة الافضل فقط لا غير. . . لذلك ارجوك عيد نظر فى طريقة تفكيرك. . . لان التغيير اللى انت عايز تعمله فى العالم من حولك. . . يبدأ فى داخل رأسك انت اولا
اتمنى انى اكون قلت كلام واضح له معنى و وصلت المعنى اللى عايز اقوله لانى مش غرضى خالص مجرد الفلسفة الفارغة
المفضلات