فلوانس : صوت تزييق من توكة حزام الأمان و طريقة علاجه

الأعضاء الكرام
ظهر عندى صوت فى توكة حزام الأمان ( القفل) اللى جنب السائق و هو صوت تزييق بيظهر فقط لما حد يقعد جنبى و يربط حزامه، غير كده مفيش اى تزييق.
طبعاً قعدت فتره لغاية لما حصرت الصوت بيظهر امتى ( لما حد يقعد جنبى و يربط حزامه)
و بعدين فتره تانية لما حصرت صوت التزييق طالع منين ( قفل حزام الأمان)
و بعدين عملية simulation للصوت و هى انى قعدت اضغط على توكة او قفل الحزام لغاية لما عرفت ان البلاستيك الاسود هو اللى بيزيق
التوكة عبارة عن قطعة بلاستيك سوداء و غطاء بلاستيك نفس الحجم و بداخلهم مجموعة الأمان و الزر الأحمر لفك الحزام
جسم التوكة البلاستيك بيزيق مع شد الحزام و تحرك الشخص اللى قاعد جمبى

* العلاج
جسم التوكة مربوط فى الغطاء بمسمارين Star او نجمة مقاس ١٥
فكتهم و فصلت الجسم عن الغطاء و حطين ما بينهم جزء صغير من اللزق ال double face و هو ليه سماكة بسيطة من الأسفنج عملت عازل بين الجزئين و ربط المسامير مرة أخرى
و انتهى الصوت للأبد
و رجعت الفلوانس صامتة كعهدها بدون اى اصوات او تزييق

اتمنى انى اكون ساعدتكم لو حد كان عنده نفس الشكوى و تحت امركم
تحياتى

لأ يا عم هانى أرجووووووووووووووووووك مش لدرجة صوت تزييق توكة الحزام ........... ههههههههههه
إحنا راكبين عربيات موديل 2012 ومزيكة حسب الله شغااااااااالة ولا إتهزينا

طبعا أنا بهزر .......... أنا مقدر إن العربية الزيرو بتعمل فى الواحد أكتر من كده ...... بس هتبقى زيينا فى يوم من الأيام

ربنا يباركلك فى الفلوينس

بس كلااااااااااااامك استفزنى بس بكوميديا ...... إفتكرت أول سنة والعربية زيرو

تحيااااااتى