مش عارفة اطلع رخصة

**إنسانة** · 24-08-2015 02:03 AM

السلام عليكم

انا رجعت السعودية من غير ما اطلع رخصة في امريكا وكان هدفي اني ارجع واطلع رخصة في البحرين لاني شوفت البنات عاملين كدا

روحت البحرين وروحت مدينة العيسى وقالولي لازم تروحي مجمع التأمينات مطلوب cpr روحت هناك وقالولي لازم تكوني مقيمة

يعني بيطلع للسكان بس قلتلهم طيب ابقى مقيمة ازاي قالي تستأجري بيت وتجيبي فاتورة كهرباء

وانا مش مقيمة هناك ولا هقدر استأجر بيت ولا هقدر اجيب فاتورة انا مسافرة بعدد اقل من شهر

وكمان من متطلبات الرخصة اني احضر 22 ساعة تدريب مش على طول يعني هروح هناك كتير والمشوار بيكلفني كتير 800 ريال سواق وحضانة بنتي يعني مش اقل من 1000 مشوار البحرين الواحد 22 ساعة هيكلفني مبلغ كبير لاني هروح كتير

وانا محتاجة الرخصة لاني جربت المواصلات مع بنتي في امريكا وكانت متعبة ليها بجد

فانا اول ما هروح ايرلندا هشتري عربية ومش عارفة نظام الرخص هناك ايه فمحتاجه رخصة دولية

اعمل ايه واجيبها ازاي ومنين

**Imhotep** · 24-08-2015 02:14 AM

حمد الله على السلامة
ربنا معاكى و يوفقك
ياريت كان عندى معلومات افيدك بيها بس ان شاء الله ربنا يدبر و يبعت حد عنده المعلومة

**mohamedzaki74** · 24-08-2015 02:32 AM

انا كنت طلعت الرخصة الدولية من وسط البلد من 10 سنيين في مصر
بيطلعوها علي الرخصة المصرية في نص ساعة ورسومها كلام فاضي
يعني ممكن تنزلي مصر احسن

**إنسانة** · 24-08-2015 02:34 AM

المشاركة الأصلية كتبت بواسطة imhotep

حمد الله على السلامة
ربنا معاكى و يوفقك
ياريت كان عندى معلومات افيدك بيها بس ان شاء الله ربنا يدبر و يبعت حد عنده المعلومة

تسلم تحياتي وشكرا على ذوقك

**إنسانة** · 24-08-2015 02:37 AM

المشاركة الأصلية كتبت بواسطة mohamedzaki74

انا كنت طلعت الرخصة الدولية من وسط البلد من 10 سنيين في مصر
بيطلعوها علي الرخصة المصرية في نص ساعة ورسومها كلام فاضي
يعني ممكن تنزلي مصر احسن

فيه ظروف منعاني انزل مصر

اشكرك جدا

**ESO101** · 24-08-2015 03:15 PM

حمدلله على سلامتك ... لسه مصرة ...
عمومًا
ياريت لما تسافري تنقلي تفاصيل المعيشة هناك
التجارب دي بتخلي المتابع كأنه راح هناك فعندك فرص لنقل معلومات هتفيد ناس
ياريت تعملي موضوع وتتابعي بنقل مصور بالتفاصيل
رحلتك لأمريكا كانت هتفيد ناس
دي فرصة أقولك كدا قبل ماتسافري

و إيه المشكلة في رخصة البحرين بالظبط
عدد الساعات , المشوار , المطلوب للإقامة ؟

**7oda** · 24-08-2015 04:18 PM

لازم تعرفى شروط استخدام الرخصة الدولية فى ايرلندا
بعض الدول الاوروبية بتسمح باستخدام الرخصة الدولية لمدة محددة (سته اشهر فقط) من تاريخ بداية الاقامة

**marsguy** · 24-08-2015 08:46 PM

المشكله كمان إن أيرلندا عقلة القياده فيها على اليمين. ودي تلخبط جداً :(

**wawamoha** · 24-08-2015 09:23 PM

اللي اعرفه - من النت - ان فيه رخصه دوليه بتطلع من النت بمدد طويله 10 سنين...
بس مش عارف هيا ايه شروطها و مش عارف تنفع فين بالظبط
بس كل ده سهل ..ممكن تتاكدي منه من النت كمان
بالنسبه للرخصه المصريه ..بتتعمل عادي ب 500 جنيه من غير امتحانات و لا دياولووو
انتي بطاقتك في مصر تبع ايه ؟؟؟ و صالحه و للا لأ؟؟

**إنسانة** · 24-08-2015 11:16 PM

المشاركة الأصلية كتبت بواسطة eso101

حمدلله على سلامتك ... لسه مصرة ...
عمومًا
ياريت لما تسافري تنقلي تفاصيل المعيشة هناك
التجارب دي بتخلي المتابع كأنه راح هناك فعندك فرص لنقل معلومات هتفيد ناس
ياريت تعملي موضوع وتتابعي بنقل مصور بالتفاصيل
رحلتك لأمريكا كانت هتفيد ناس
دي فرصة أقولك كدا قبل ماتسافري

و إيه المشكلة في رخصة البحرين بالظبط
عدد الساعات , المشوار , المطلوب للإقامة ؟

مشكلتي في الوقت

لو عندي وقت كنت هطلعها على فترة لكن انا همشي في اقل من شهر ومطلوب مني حجات تانية غير الرخصة

و بالشكل دا مستحيل

لانو بعد كل المتطلبات المعقدة دي والمبالغ اللي هتتصرف ومش عارفه هتكون دولية ولا لا مش عارفه هيطلبو ايه تاني وهتطلع في اد ايه

بالاضافة لكل دا انا معنديش الوقت اصلا

الشرط التعجيزي بالنسبالي فعلا اللي خلاني اصرف نظر حكاية 22 ساعه واطلع الجسر بكل زحمته مرتين كل شوية لمدة اسبوعين على الاقل

كنت فاكره الموضوع هيخلص في مشوار واحد

لكن كدا خلاص مش هفكر في البحرين خالص لاني معنديش متسع من الوقت

بخصوص ايرلندا حاضر الي منعني في امريكا الوقت واللابتوب والنت والجو بشكل عام كان مايساعدش لاني كنت ناويه اكمل رحلتي كلها

شكرا