الموضوع: الى الاستاذ المحترم الباشمهندس طارق

اهلا يا استاذ هشام

السؤال مش غريب ولا حاجه وفيه ناس كتير مش بتعرف تفاصيل الموضوع ده

انا سوقت سنين طويلة نيسان باترول ونيسان سيدريك في السعودية والاتنين اوتوماتيك وما اهتمتش اعرف اكتر من P,R,N,D رغم ان الباترول زي الباجيرو في الميتسوبيشي واللاند كروزر في التويوتا عربية 4×4 وفيها فتيس غرز انما عمري ما استخدمته ولا احتجته.

أنا هاضيف شوية شرح الى كلام الأستاذ محمد السيد وهو الآتي :

بخصوص استخدام الفتيس الاوتوماتيك في اللانسر واختياراته :

الاختيارات هي

P R N D Ds L


طبعا P دي Parking يعني الركن (كل الناس عارفينها) انما الجديد هنا ان ناس كتير تنصح انك لما تركن العربية بلاش تسيبها على P علشان لو واحد ابن حلال عاوز يزق عربيتك قدام شوية او ورا شوية لأي سبب هيتلف التروس ، وبيقولوا الأفضل تجيب الفتيس على N وتشد فرامل اليد. (الموضوع ده طرح في الموضوع اللي رد فيه الاستاذ محمد السيد)


بعد كده R دي الرجوع للخلف Reverse مش محتاجة شرح


بعد كده N يعني المور او Neutral ويفضل في الاشارات او الوقفة المؤقتة والعربية دايرة تجيب الفتيس على المور وتشد فرامل اليد ثم لما الاشارة تفتح ترجع للـ D وتنزل فرامل اليد وفيه ناس بتديها D وخلاص لكن في الاشارة بتدوس فرامل طول الوقت وده طبعا بيقصر من عمر تيل الفرامل


بعد كده D يعني القيادة العادية Drive ودي اساس السواقة كلها وتحتوي على كل السرعات الداخلية (اول - تاني - تالت - رابع اوتوماتيك بتنقل ما بينهم)

بعد كده Ds او Drive Sport او القيادة الرياضية ودي تعني ميكانيكيا انك بتسقط نقلة او يعني لو كنت على التالت في D ونقلت الى Ds فانت اصبحت على التاني او لو على الرابع ونقلت الى Ds فانت اصبحت على التالت ، وبالتالي عزم العربية يزيد وتستجيب معاك اسرع لعمل مناورة مثلا او تخطي عربية امامك ، وفيه ناس بتعتبرها قيادة رياضية وتستخدمها كتير انما المهندس عبد الجليل (مدير الاستقبال بمركز الخدمة الرئيسي في التوكيل) قال لي ان الوضع ده المفروض يكون مؤقت مش دائم لأنه بيتعب المحرك وكمان استهلاكه اكتر في البنزين
وفي الكتالوج وضع Ds مخصص للمنحدرات والمرتفعات متوسطة الانحدار


بعد كده الوضع L أو Low يعني زي الأول كده في الفتيس اليدوي وده لازم يكون على سرعات قليلة ويستخدم في المنحدرات والمرتفعات شديدة الانحدار يعني بتجبر العربية تمشي على الأول

طبعا 95% من الناس لا بتستخدم Ds ولا L وكله شغال D ودمتم