نصيحة لشراء سيارة في حدود ٣٠٠٠٠ - ٣٥٠٠٠
السلام عليكم و رحمة الله و بركاته
سعيد جدا لإنضمامي لمنتداكم الرائع و بصراحة من فترة كبيرة لم اشارك في المنتديات بعد ان كنت مشرف في احد المنتديات الكبيرة قبل الثورة :crashcomputer4:
سيبكم من الرغي اللي فوق ده و خلينا في المهم عشان مضيعش وقتكم
انا عندي عربية ١٢٨ معدلة موديل ٧٩ و شغالة معايا تمام بس هضطر الفترة اللي جاية اغيرها لمتطلبات تحركي بالعربية هتكون اكبر شوية ومشاوير ابعد
عندي قناعة عند شرائي لاي حاجة ان تكون مناسبة لظروفي و متطلباتي الضرورية و الكماليات تبقى مرحلة تانية حسب الامكانات بتاعتي فالاختيار يكون بالانسب لظروفي و ليس الافضل المطلق
بداية ميزانيتي من ٣٠ الف الى ٣٥ الف
ثانيا اسكن في نجع حمادي محافظة قنا فبالتالي موش اي عربية هلاقي لها ميكانيكي و قطع غيار (اكتر حاجة بيفهم فيها الميكانيكية عندنا هي الفيات وتوابعها و البيجو )
ثالثا تحركي بيكون كتير في القرى فهحتاج لعربية حديد و مرتفعة و تستحمل البهدلة ومتسخنش خاصة الجو اللي عندنا في الصعيد ذي الفل :)
الرفاهيات بالنسبالي موش مهمة قوي يعني تكييف و سنتر و زجاج كهربة و غيرها تكون مرحلة تانية بعد المتانة و استهلاك البنزين و استحمال الدعك في المطبات الى جانب لخبطة الميكانيكية و قطع الغيار و طبعا مفيش مراكز خدمة معتمدة عندنا و لكن ان توفرت المتطلبات و الرفاهيات معا يبقى ذي الفل
محتاج عربية تكون حالتها كويسة موش محتاجة مصاريف ولف على ميكانيكية عشان ظروف وقتي ضيقة شوية
مع بحثي في موضوعات كتير و مقارنات عندي احساس ان الشاهين انسب لي حسب ظروفي ولكن خبراء المنتدى ربنا يبارك فيهم جميعا قد يكون لهم رأي اصوب ياريت يشاركوني به
لو كانت الشاهين هي الانسب فما هو افضل موديل مناسب في حدود السعر ده من حيث الامكانات و المتانة و الكماليات ان وجدت و من حيث حالة العربية
قرأت في المنتدى من احد الاخوة ربنا يبارك فيه المعلومات دي
(رأييى لو انت عايز تركب شاهين مستعمل دور على موديلات من 1997 وحتى 2003 (الموتور التمبرا والكاربوريتور الويبر) وافضلها السيارات موديل النص التانى من 2002 وموديل 2003 ، علشان تابلوهها احدث (مفتاح النور فى الدراع زى الكورى واليابانى، مفاتيح فوانيس الشبورة والإنتظار تاتش) ومزودة بفوانيس شبورة ومرايات بومبية ومجهزة لتركيب سنتر فى الشنطة
وفيه منها بالباورستيرنج والتكييف ، ومن اول 2003 فيه 1600 غير طبعا ال1400 الموجودة فى كل الموديلات)
سؤال لكم فهل موديل ٢٠٠٣ الافضل فعلا من حيث المتانة و الاعتمادية و عدم السخانة و البنزين و و و ... في حدود ميزانيتي و هل ٣٥ الف مثلا ممكن تجيب عربية حالتها كويسة و هل المبلغ ده يجيب ١٤٠٠سي سي ام ١٦٠٠ سي سي و هل بكماليات و لا لأ
آسف جدا على الاطالة و لكن اتعشم في خبراء المنتدى انهم يساعدوني ان شاء الله
ربنا يبارك فيكم و منتظر خبراتكم و معلوماتكم و لو كان فيه تصحيح لأي شيء من اللي كتبته ياريت تقولولي عشان اتعلم منكم
جزاكم الله خيرا