عايز أركب سوند سيستم من الأخر

عايز أركب سوند سيستم من الأخر و محتار بين الكاسيت ا لكينوود والبيونيير وكمان نوع السماعات والجى ام

كاسيت او هيديونيت يعني بيونير عن تجربة شخصية و تجارب ناس كتيير و سمعات كينوود ال 600 الدابل بيز بس هتحتاج جي ام قوي روكفورد فوسجيت امريكي مثلا بس مش هتلاقيه في مصر كتير و لو لقيته هيبقي غالي معدي ال 2000 جنية ال 2 شانيل , الالبين محترم برده هتلاقية في احمد عرابي و طبعا سمعات الابواب لو مقاسها 16 و هتكلف عندك ال mtx mercury او mtx black thunder دول بقي نازلين السمعات بالتويتر باكروس فير بتعهم علشان توصلهم علي ال جي ام حاجة كده صوت فخم مجسم محيطي زي السمعات البوز و كده عن تجربة بس هما غالين شوية حوالي 1500 جنية فا لو الامكانية متسمحش عندك السوني بالتويتر بتعهم ب حوالي 500 جنية صوتهم حلو بردو مش وحش جرب الحاجات دي من غير صب الاول و شوف الموضوع مرضي بالنسبالك ولا لا

شكرا على ردك يا باشا ومعلمات مفيدة بس أنا مش عايز السيستم يكلفنى 5000 جنية انا مثلا بكلم فى رنج 2500 3000 جنية ودة كاسيت وسماعات و جى ام وبازوكا .انا فهمت من كلامك ان البيونير أحسن من السونى فى الكاسيتات طيب لو سماعتين بيضاوى مع بازوكا مع جى ام يبقى اية اﻻنواع ؟

يا جماعة فى حد يعرف

شوف يا باشا
اولا تبتدى بكاسيت محترم وطبعا pioneer
عندك موديلات كتير بس هنتكلم عن موديل وسط فى السعر ومناسب جدا للعده اللى انت عاوزها:
هو موديله deh-x3750ui
ده كاسيت محترم وفى كل اللى انت محتاجه من اوبشنز من تحكم صبات و5 باند اكولايزر ومالتى كالر
واوبشنز كتير وكويس جدا ده طبعا غير نقاء الصوت المعروف بتاع بايونير وده صناعه تايلاندى مش صينى
وموديل 2015
وطبعا سعره فى السوق تقريبا 750 جنيه
ثانيا السماعات عندك اكتر من موديل فى السماعات الدبل بيز ومنهم Kenwood 320 Watt & Kenwood 400 Watt Kenwood 600 Watt
وطبعا كل اللى انا اقصدهم دبل بيز ال 600 بتخرج 150 rms وال 400 بتخرج 80 rms وال 320 بتخرج 80 rms
وافضلهم هما ال 600 وات الدبل بيز وطبعا دول لو هتركب سماعات فقط بدون صب او بازوكا
وفى الحاله دى هتركبلها جى ام 400 وات سيمفونى وتمام جدا او كينود 600 وات او بايونير820 وات كل دول 2 تشانل
اما فى حالة لو هتركب صب او بازوكا م مع السماعات يبقه لو بتحب البيز ركب سماعتين 600 دبل بيز ومعاهم بازوكا بايونير 1300 وات وياريت لو تلاقى موديل 304t القديمه بتاعت 2014 مش موديل 305t بتاعت 2015
مع السماعات والبازوكا وهتجيبلهم جى ام ممكن بايونير 760 وات 4 تشانل تشغل عليه السماعتين والبازوكا بس هو نقى بس مش قوى للغايه
او جى ام سيمفونى 640 وات 4 تشانل وده قوى ومحترم وهيظبط معاك وسعره كويس وحمال قسيه
او جى Rockford Fosgate Punch P 400-4
بس الجى ام ده بيبقه سعره عالى شويه بس طبعا هتنساه طول العمر مع قوة مع نقاء رهيب مفيش بعده ولا قبله فى كل حاجه خاصة بالصوتيات تبقى روكفورد لا قبلها ولا بعدها
فخليك فى السيمفونى ال 640 وات الكورى مع سماعتين كينود 600 وات دبل بيز مع البازوكا البايونير 1300 وات القديمه بس طبعا هدوخ عليها شويه لانها مش موجوده كتير دلوقتى بس هى افضل من الجديده مع ان الجديده المفروض انها اقوى بزياده 50 Rms
بس القديمه افضل واقوى بجد
مع الكاسيت 3750
اما لو عاوز صوت متناسق بدون ما يبقى الصوت مش باين من البيز يعنى البيز مش زياده عن التربل او الميدرينج هتركب سماعتين بايونير 500 فيتنامى القديم موديل 2013 ودول بردو هدور عليهم شويه لانهم مش بينزلوا دلوقتى جداد فلو ملاقتش شوفلك اتنين مستعملين حالتهم كويسه افضل من الجداد واوعى تشترى بايونير الجديده نهائى
نيجى للحسبات
الكاسيت البايونير 750 جنيه
السماعات الكينود 600 وات دبل 1000 جنيه
الجى ام السيمفونى 640 وات 4 تشانل 650 جنيه
البازوكا هتبقى فى حدود 800 تقريبا
يبقى الحساب كله
3200 جنيه
ولو حابب تقلل شويه هتجيبلك سماعتين كينود 500 وات صينى توكيل دول هيعملوا فى حدود 350 جنيه
وطبعا هتعمل حسابك فى 500 جنيه كمان وصلتين rca من رديو شاك جولد بلاتيد دول فى حدود 200 جنيه
وسلوك كهرباء وارضى وريموت فى حدود 100 جنيه
ومصنعية التوصيل طبعا
ولو انت عاوز تروح مكان محترم روح توكيل كينود وكلاريون فى شارع احمد عرابى فى المهندسين وهما هيظبطولك كل العده دى من عندهم بس انت اطلب اللى الموديلات دى ومتسمعش لكلام الصنايعيه هناك وركب اللى انا بقولك عليه وانسى

طيب انا عايز كاسيت يكون فى بلوتوث وكمان بالنسبة للسماعات الدبل بيز هل هى أفضل من البيونيير عشان بيز عالى ولا البيونير أفضل فى نقاء الصوت لان انا حجيب بازوكا وجى ام يعنى حيبقى عندى بيز جامد ولا بردو الدبل بيز انقى فى الصوت وبيز عالى وبصراحة انا مش عايز اجيب حاجة سمفونى خالص عشان دة باور منغير كواليتى وكمان بيقولك مس كورى ولا حاجة دة مكتوب علية كدة بس انا بفكر فى الجى ام الكينوود والبازوكا ال جى بى ال

لا تعليق

هو اية دة هو انا قلت حاجة تزعل ولا اية .انا عندى شوية استفسارات احب اعرف الرد عليها عشان لما اشترى اكون فاهم

انا مقولتش انك بتقول حاجه تزعل
بس انت بتاخد اراء الناس الى فى القسم
وانت واخد قرار تقريبا وعارف مين الافضل بالنسبه ليك
عموما انا بقولك على خبرتى فى تغيير وتجربة اكثر من ساوند سيستم
بس عموما :
لو انت عاوز كاسيت فى بلوتوث فى اكثر من موديل فى البايونير بس طبعا
السعر معدى 1500 : 1700 جنيه وافضلهم الجرافيك فى موديل 9550bt و 9650bt
وانت بتقول الساوند كله ميعديش 2000 : 3000 جنيه
يبقى الكاسيت بس هيعدى نص ثمن الساوند بتاعك بزياده شويه
اما بالنسبه للسماعات:
لو عاوز صوت مفتوح وفى ميدرينج يبقى تركب سماعات بايونير 500 او 600 الفتنامى القديمه او 500 التايلاندى بس دى استحاله تلاقيها جديده او الكينود 500 الاندونيسى العاديه
ولو معاك ميزانيه مفتوحه
يبقى ركب كاسيت بايونير جرافيك ببلوتوث
وباقى العدة روكفورد
بس العده دى هتعدى جامد
انا عن نفسى مركب
ما شاء الله
كاسيت بايونير جرافيك الوان
صبات وجى امات روكفورد
بازوكتين بايونير 1300
بس خد بالك ان ماركة روكفورد دى بتفرق خالص عن اى ماركه بمعنى الكلمه
فى القوة ونقاء الصوت بجد اسطوره
يعنى هقولك مثلا انا غيرت اكثر من 5 عدد صوت
وبعد ما جربت روكفورد عرفت انى مكنتش مركب ساوند سيستم اساسا رغم انى كنت بركب عدد ما شاء الله بتعدى 10000 جنيه
بوازيك jbl على صبات sony 15 على جى امات بايونير وكينود وسيمفونى جميع الانواع والماركات يعتبر جربتها تقريبا
لكن روكفورد مفيش مقارنه
وعلى فكرة انا كنت مركب 3 بوازيك jbl وبعدها غيرت وجبت 2 بايونير لانى فعلا حسيت بفرق كبير لما سمعت البيز بتاعها والنعومه والنقاء بتاع البيز اللى بيطلع من البازوكا ولما ركبت اتنين فى الشنطه كانوا اقوى بكتيييييييييييييييييير من ال 3 jbl
ورغم انى مركب صبات روكفورد الى انى مركب معاهم البازوكتين البايونير لانهم لوحدهم حكايه
جرب ومش هتندم بس البازوكا القديمه مش الجديده دور عليها هتلاقيها جديده بس هتلف عليها شويه

ما شاء الله واضح ان انت مجرب كل حاجة . بس اﻻقى فين السماعات الريكفورد دى فى القاهره وحتبقى عملة كام تقريبا. بالنسبةللبازوكا انا لقيت البايونيير ب 750 هى دى الكويسة ولا اعرف منين اﻻصلى من المضروب وكمان بالنسبة للسماعات البيضاوى عايز اتأكد من السماعات اﻻصلى واية رأيك فى محل أمبيير اللى فى مصطفى النحاس

شوف صعب انك تلاقى سماعات روكفورد
بس لو ليك حد مسافر قطر او امريكا ممكن يجيبهم ليك
لان الوكيل بتاع روكفورد فى قطر وامريكا
اما لو مفيش ممكن تدخل على موقع Ebay وتشوف ممكن تجيبهم من الموقع
بس عموما السماعات مش المشكله الجى امات هى الى حكايه عشان تلاقيهم
اما السماعات فلها بديل وبديل ممتاز زى البايونير القديم او كينود القديم
اما البازوكا فمفيش منها مضروب البايونير منضربتش ومينفعش تنضرب ال jbl بس هى الى فى منها مضروب لان تقليدها سهل جدا
بس عموما لو عاوز تجيب هات من مكان موزع معتمد او التوكيل عشان تبقى ضامن حاجتك كويس
وكذلك مع السماعات اشتريهم من مكان موثوق فيه
عندك اوتو ماركت ممتاز
عندك توكيل كلاريون وكينود وسيمفونى فى المهندسين فى احمد عرابى
عنك ارخصهم فى التوفيقيه والارخص دول موزعين معتمدين
وعندك محل اسمه فانتازيا فى جسر السويس
فى ناس كتير بس شوف افضل سعر وهات منه ونصيحه متجيبش من حد مش موثوق فيه نهائى

هو فى اوتو ماركت فى القاهرة. وياريت عنوان توكيل كينوود وكلاريون اللى فى المهندسين

اوتو ماركت له فرعين فقط
الاول فى سموحه على البحر فى اسكندريه
والثانى فى شبين الكوم على الطريق داخل بنزينة التعاون
اما بالنسبه لتوكيل كلاريون هو طبعا واخد توكيلات كتير منهم كينود وسيمفونى وجى بى ال
عنوانه
فى القاهرة 3أ شارع احمد عرابى المهندسين وفى واحد تانى فى مصر الجديدة ميدان سانت فتيما ودة رقم تليفون فرع احمد عرابى 33051809 و 33051895

:36_1_37[1]::36_1_37[1]::36_1_37[1]:

شكرا ليك جدا .انا رحت لتوكيل كينوود اللى فى أحمد عرابى اشتريت وركبت عندهم
بصراحة ناس محترمين . جبت كاسيت بيونيير 4750 وسماعات كينوود 600 وات فيتنامى وصب جى بى ال وجى ام كينوود 800 4 تشانل . اية رايككدة وعايزك تقولى اية أحسن توصيل لدول عشان حاسس انة مش موصلهم صح أوى وكمان لو عايز اجيب سماعتين باب عشان السروند اجيب نوعهم اية وأوصلهم ازاى بردو

اولا مبروووووووك
شوف انت اكيد 100% التوصيل عندك صح لان توكيل كلاريون ممتازين فى شغلهم
لكن ممكن بنسبة 70% ان الحاجه مش شغاله بكامل قوتها لان الجى ام ده ضعيف
فعشان تظبط الصوت قدامك حل من اتنين
الاول وهو انك تخلى السماعتين شغالين على الجى ام الكينود لوحدهم كل سماعه على 2 تشانل بريدج
وتجيب جى ام سيمفونى 300 وات للصب او البازوكا ... انت موضحتليش هو صب ولا بازوكا اوريجينال ولو صب ركبته فى بوكس شكله ايه
والحل التانى هو انك تغير الجى ام ده بواحد سيمفونى 640 وات 4 تشانل وتوصل عليه السماعتين والصب والصوت هيبقى اكيد اقوى لان السيمفونى اقوى والباور بتاعه اعلى من الكينود بكتير
اما بالنسبه لسماعات الابواب هتجيب سونى كمبوننت دول افضل سماعات للابواب بدون منافس
اخيرا ياريت لو انت تقولى الاسعار بتاعت السماعات كام حاليا والكاسيت
وحساب توصيل العده
ولو تقدر ترفع صور العده قطعه قطعه وهما راكبين فى العربيه
عشان تبقى نقلت تجربتك للناس هنا فى القسم والناس تستفاد من تجربتك وتعرف اكتر

انا متابع معاكم فيه معلومات تشكرو عليها

لو ممكن تدلونى عايزاعمل عده صوت فى المستوى المعقول انا عندى سمعتين سونى 400 وات 60 rms
عايز اجبلهم جى ام وصب اجيب ايه

اولا مبروك ليك .. وربنا يكفيك شرهم
ثانيا ايه تقييمك للتركيبات في كلاريون والتركيب كلفك كام