الموضوع: إن شاء الله نويت اشتري فيات سيينا

السلام عليكم ورحمة الله وبركاته

عندي شوية اسئلة لأهل الخبرة وياريت متكسوفنيش

ياريت تقولولي اخبارها ايه ؟

هل في رنج ٣٥الف يجيبو حاجة كويسة منها ؟

انهي افضل في موديلاتها ؟

اكتر حاجة اخد بالي منها في في فحص العربية وانا بشتريها ؟

هل قطع الغيار متوفرة ؟

بالنسبة للصيانة هل في ميكانيكي معين ولا اي حد يشتغل فيها ؟

هل بتستحمل السفر في حدود ١٠٠ ك يوميا ؟

هل العفشة بتاعتها كويسة تستحمل الطرق الريفية (الترابية والحصى) ؟

في اعادة البيع هتخسر مني كتير ؟

هل هي مناسبة لي لأول سيارة ؟

معدل استهلاكها للبنزين واي نوع يفضل من البنزين ؟


معلش اسئلتي كتيرة

دمتم بود

موضوع هام لكل من يبحث عن سيارة سيينا للشراء وضرورة الكشف الدقيق عليها *******
1 - أهم حاجة تكشف في بنزينة فيها مركز خدمة كويس.
2 - الكشف بيبقي علي اساسيات العربية من قوايم وشنطة وحوض.
3 - الدواخل متكونش فيها رش لاخفاء اي عيوب.
4 - حالة الصاج والعتب والابواب واذا كانت فيه بارومة ولا لأ.
5 - حالة الموتور وياريت تعمل كبس للموتور وتعرف كفاءته ويبقي تمام لحد 75%.
6 - علبة الدريكسيون تكون سليمة ومفيهاش بوش ولا ضاربة زيت في الدواسة تحت الدريكسيون.
7 - العفشة تكون سليمة والدنجل الخلفي مفيهوش مشاكل ولا انثناءات.
8 - بعد كده لو كله كويس تدخل علي الكماليات من سنتر وتكييف وتجربهم شغالين كويس ولا لأ.
خلي بالك كل ده اي حاجة فيهم بايظة بتنقص من تمن العربية المبلغ اللي هيتتصلح به. ده بالنسبة للحاجات البسيطة لكن الحاجات الخطيرة زي البارومة وعوجة في الشاسية ولا الدنجل الخلفي يبقي سيبك من العربية.
أهم حاجة قبل ده كله متتسرعش عشان تلاقي حاجة نضيفة ... وربنا يوفقكم جميعا

منقووول