الموضوع: تعريف مبسط لنظام الدفع الرباعى

المشاركة الأصلية كتبت بواسطة ahmed_eng2001

فيه لوكات للعجل ..... يعنى العجل ممكن يلف لوحده ملهوش علاقة بالكارونة .... فيه عجل زى الرانجلر القديمة بيلف على طول مع الكارونة

اللوكات فيه منها اوتوماتيك .. زى الشيروكى و اكتر العربيات الحديثة.... و مانيوال زى اللاند كروزر و بعض موديلات الفورد

اعتقد وجود نوع من الحركة النسبية فى حالة عدم التعشيق و ده الى بيخلى عمود الكردان الامامى يلف

اللوكات دى قصة كبيرة جداً ولو فاضى احكيلك الحكاية بتاعتها :)
لما العربية تكون فى ملف فالعجلة الخارجية بتلف بسرعة أكبر من العجلة الداخلية وده فى الوضع العادى بس لما بيكون فيه لوك فانت بتجبر العجلة الخارجية والعجلة الداخلية انهم يلفوا بنفس السرعة - لو ماشى فى خط مستقيم مافيش مشاكل بس لو ماشى فى ملف ده بيأثر على تاكل الكاوتش وبرضه بيسبب حمل على الكوارين والفتيس بس تصميمهم انهم بيتحملوا الحمل العالى ده - طيب ليه إخترعوا اللوكات والغلاسة دى :) - علشان حضرتك لو انت ماشى بالعربية وفيه عجلة عدت على رمل او طين يعنى اتزحلقت او غرست حتلف على الفاضى ولما الكورونة تلاقى عجلة جميلة بتلف على الفاضى حتحول العزم عليها اتوماتيك من نفسها لأن إيه اللى يخليها توجع دماغها وتودى العزم على عجلة ليها مقاومة ووجع دماغ فالعجلة التانية حتقف ومش حاتلف مع انها مش غارسة ولو الدفع ثنائى يبقى العربية حاتقف يامعلم وماهياش طالعة من الغرز ولا بالطبل البلدى - طيب نعمل ايه ؟ نقوم نخترع الدفع الرباعى يعنى عندك اكسين بيلفوا كل اكس عليه عجلتين فلما عجلة تلف على الفاضى يبقى العجلة التانية اللى معاها حاتقف برضه بس لو الاكس التانى العجلتين بتوعه فى السالك حيطلع العربية من الغرز لأن هنا العزم متوزع ٥٠٪ على الاكس الأمامى و ٥٠٪ على الأكس الخلفى - لغاية هنا والكلام ده جميل - إفرض بقى عندك عجلة على كل اكس اتزحلقت او غرست طبعاً العجلة اللى معاها على نفس الاكس حاتقف يبقى عندك عجلتين بيلفوا على الفاضى وعجلتين واقفين بيتفرجوا :) -
بقت العربية لاهى دفع رباعى ولا خماسى ولا الهوا !!!!! نعمل إيه بقى فى المشكلة المنيلة دى - نخترع اللوك - اللوك ده بيخلى العجلتين اللى على نفس الأكس بيلفوا بنفس السرعة سواء غرسوا او ماغرسوش - يبقى لما عجلة تلف على الفاضى التانية حتلف برضه مش حاتقف علشان هنا العزم اللى على الاكس ٥٠٪ من اجمالى العزم بيتوزع ٢٥٪ للعجلة اليمين و ٢٥٪ للعجلة الشمال فلو العجلة اليمين اتزحلقت او لفت على الفاضى العجلة الشمال حاتلف عالمليان وحاتطلع العربية من المحنة اللى هى فيها - وبالمثل لو عجلة على كل اكس لفت على الفاضى العجلة التانية من كل اكس حاتلف على المليان وحتى لو فيه ٣ عجلات بيلفوا على الفاضى فالعجلة الوحيدة السالكة حاتنقذ الموقف وتستر العربية :) - نفهم من كده إيه : إن أى عربية دفع رباعى لو مافيهاش لوك تبقى مش دفع رباعى - طبعاً محدش حايصدق الكلام ده بس هو ده الواقع.
عملوا حلول تانية علشان يحلوا المشكلة دى من غير لوكات - شخلل جيبك وانا أكمل