احنا ناس غريبه فعلا وبنعمل كده ليه مش عارف؟

**osama** · 19-11-2008 01:25 PM

المصري هو اللى

يقف يتكلم على الباب نص ساعة بعد إنتهاء الزيارة والسلام

لمّا تفتح نملية المطبخ هتلاقي عنده عشرين برطمان بتاع مربى فاضي بقالهم سنين ومازال مُصِر على جمع المزيد
ييجي بعد معاده بساعتين ويفتكر إن ده عادي

لسه عنده إصرار إنه يتكلم بصوت عالي في التليفون لما تكون المكالمة دولية عشان التاني يسمعه

بيحتفظ بأكياس محلات اللبس والأحذية وورق الهدايا تحت مرتبة السرير لسنوات ومابيستخدمهاش البيت لسه ماستخدمهاش

بيكون عنده شواية لزوم الرحلات أقصى استخدام لها كان مرة واحدة في العيد

بيشيل طابع البريد من على الظرف لو الختم ماكانش عليه

بيفتكر إن أي حد بيشتغل في الخليج بيغرف فلوس من غير حساب

بيكون مشغول بقيمة التيبس أو البقشيش طول العشا ياترى ربع جنيه ولا نص جنيه

برده بيتخانق ساعة دفع الحساب بحرارة شديدة على إنه هو اللي لازم يدفع

بيفرش ملاية سرير على طقم الأنتريه عشان يفضل نضيف لما ييجي ضيوف ومابيشيلهاش لما ييجوا

والأهم إنه اللي بيحب يسخر من نفسه ومن بلده وحكامه بس مايطيقش حد
تاني يسخر منهم ، وساعتها(بيفرش له الملاية)

**Samir Elshahawy** · 19-11-2008 01:29 PM

والأهم إنه اللي بيحب يسخر من نفسه ومن بلده وحكامه بس مايطيقش حد
تاني يسخر منهم ، وساعتها(بيفرش له الملاية)

ماهو هو ده صاح المثل اللي بيقول " ادعي علي ابني و اكره اللي يقول امين "

**osama** · 19-11-2008 01:35 PM

*ليه اذا شفناعلى جدار او عامود نور عبارة: احترس من الدهان؟...مانصدقش ونجرب بأصابعنا؟؟..

>> يعني لازم يحلفوا ..؟؟!!

* ليه اذا كانت بطارية الريموت كنترول ضعيفه نضغط بقوووووه على الأزرار؟؟؟؟

>>يعني هو كده هتتشحن البطاريه؟؟!!!

*ليه اذا تأخر الاسانسير نضغط علىالزرار مية مرة؟؟؟

>>يعني كده خلاص هيحس على دمه وبيفتح

*ليه لما بنكون قاعدين في مكان عام ونسمع رنة مسج ولارنةموبايل على طووووول نشوف موبايلنا؟؟

>>ليييييه حضرتك مهم للدرجة دي علشان يرن بين البشر دي كلها ..؟؟!! ولا يعني انت مش عارف رنة موبايلك عشان كل ماواحد يرن تبص

**نور القمر** · 19-11-2008 05:11 PM

الموضوع طريف ممكن ناخده for fun
لكن اعتقد الجزء الاولاني من الموضوع محدش بيعمله دلوقت
اساسا النملية دي اتلغت من قاموس المطبخ من زمان هههههههههههههههههه
انا عن نفسي بتخلص من اي حاجة مش مستخدمة اول باول
شكرا على الموضوع الجميل

**elassar2010** · 19-11-2008 05:46 PM

موضوع ظريف فعلا وواقعى :k18:

**sh23** · 19-11-2008 05:55 PM

أستاذ/osama...... تحياتي
بس سيادتك مش شايف أنه لو كان كلامك صحيح والأوصاف التي وصفت بها الناس صحيحة وقابله للتعميم علي كل المصريين ؛ فهذا معناه اننا شعب متخلف وعايش في الماضي

**EL_3OMDA** · 19-11-2008 06:14 PM

موضوع دمه خفيف جدا شكرا لحضرتك
وبالذات الحته بتاع التليفون دى واضيف الموبايل كمان مش عارف ليه
ولو تلاحظ فيه ناس تحب تمسك سماعه التليفون جامده جدا
وتدوس كمان بيها على ودانها قوى لدرجه انها تبقى معلمه فى وشهم
يجى نص ساعه بعد المكالمه مش عارف ليه بس نرجع ونقول طبع
كلام والسلام