الموضوع: زهقت من بنك QNB وبفكر أحول لبنك تاني ومحتار بين Crédit Agricole و CIB

a7medalaa .... طيب وليه أصلا يطلعوا مراسلات !!
إي شغل التمانينات ده !!
ولي يجبرونا على كدة !

adorehearts ...... البريبايد كارد ده كارت بتقدر تحط فيه مبلغ معين مثلا وتشتري بيه حاجة من متجر أو تهادي بيه حد أو تشتري حاجة من ع النت
وده بيتشحن وتشتري بيه مثلا وتشحنه تاني وهكذا
في بنوك زي العربي الأفريقي وبنك مصر بيدوك البريبايد كارد ب 20 جنيه مثلا بيقعد معاك سنة ولما بتحب تشحنه بتروح البنك تشحنه بالمبلغ اللي انت عايزه ومش لازم يكون ليك حساب ف البنك أصلا

الماستر كارد ده كارت بيطلعلك مع الحساب الجاري مثلا او التوفير علشان تعمل عليه سحب وإيداع واسمه كارت ال ATM

المميز بقى ف كريدي أجريكول اني اقدر أشحن من الماستر للبريبايد من ع النت واقدر اسحب فلوسي من البريبايد من اي ATM على عكس بنوك كتير مش بتتيحلك تسحب فلوسك من البريبايد كارد ع ال ATM

ملحوظه بس مهمه ليك

أنا أكتر واحد لف عالبنوك وعمل اتصالات ليهم .. واتهريت بحث عالنت في كل معلومات البنوك
وضيعت ايام من عمري في التحدث مع خدمة عملاء البنوك بكل الوسائل

مبدئياً كده : مش كل معلومه عالنت صح .. ومش كل معلومه من خدمة العملاء صح

الصح هو اللي بيحصل وقت الجد .. وقت ما تروح تطلب الخدمه اللي انت قاعد تسأل وتبحث فيها شهور
بتلاقي حماده تاني خالص .

جريدي أجريكول : هيطلب منك أثبات عمل .. ولو طالب .. واقل من 23 سنه تقريباً .. هيفتحلك حساب شباب .
حتى فيزا النت اللي كانت بتاخدها وانت واقف بصورة البطاقة الشخصيه .. لازم أثبات عمل .
ولو حضرتك قولت انا مش موظف وصاحب عمل حر ..

البت الرخمه الاوزعه اللي راسمه حواجبها هناك ولابسه بنطلون محزق وشبشب بصباع
هتقولك هاتلنا سجل تجاري وبطاقة ضريبيه .

ولو حضرتك عملت مفتح وجبت سجل تجاري وبطاقه ضريبيه عملهملك محامي ولا محاسب قانوني بالحيله .
بعد فتره كده نفس البت الاوزعه دي .. هتقولك محتاجين فواتير البيع الخاصه بالنشاط بتاعك .
العربي الافريقي الدولي و الأهلى المصري و أغلب البنوك نفس النظام

QNB الوحيد اللي ماطلبش مني الطلب ده .. وكذلك البنوك اللي انت مش عايزها ورافضها أساساً .

أنا زيك قرفان من QNB وحاطه تحت الإختبار ومش مرتاح
لكن لقيت ان القرف ده موجود في باقي البنوك الخاصه بردو .. وكل بنك تلاقي فيه ميزه وقصادها كذا عيب .

في النهايه انا مرتاح جداً مع بنك مصر .. وبالأخص فرع المعاملات الدولية وسط المدينه
ناقصه بس يطور خدمة الاون لاين .. ويهتم أكتر بكروت الفيزا .

معلومات عالماشي :

فيزا الإنترنت فقط ( المدفوعه مقدماً ) ( البريبايد ) .. تقدر تطلعها بسهولة من العربي الافريقي الدولي و بنك مصر و cib .. وكل منهم ليه مميزات وعيوب وحدود عالبطاقه .

الكريدت كارد او بطاقة الإئتمان .. ملهاش اي تلاتين الف لازمه ومشاكلها وعيوبها أكتر بكتير من مميزاتها وان كنت لا ارى اي ميزه لها من الاساس . ( اللي جرب غير اللي سمع ) .

حساب التوفير أفضل من الحساب الجاري ويلبي إحتياجاتك .. طالما لا تريد دفتر شيكات .

المراسلات + مطبوعات في جميع البنوك كل 3 شهور .. ومصاريفها 15 جنيه تقريباً في ال 3 شهور .
ولا تصل اليك .. والغائها يعني انك ستحتفظ بها في البنك مقابل مصاريف اعلى .
ولا يمكن الغائها نهائياً ( المراسلات إجباريه ) . .. تقول غباء تقول روتين متخلف .. قول اللي تقوله هو كده .
امال شركات البريد اللي بتلهف فلوس الخدمه من البنك تشتغل ازاي .. وتدور عالموضوع واصله تلاقي وراه فساد او سبوبه كبيره اسمها مراسلات وشركة بريد وبنك .

المعلومه من خدمة عملاء الفرع .. نسبة صحتها 80% اذا كانت خارج نطاق المعاملات الالكترونيه والنت .
اما اذا كانت ضمن المعالمات الالكترونيه والنت .. نسبة صحتها 10% .

المعلومه من خدمة العملاء عبر الاتصال التليفوني بالكول سنتر .. نسبة صحتها 99% اذا كانت خارج التعاملات الاكترونيه .. وضمن التعاملات الالكترونيه نسبة صحتها 70% .

كفاية كده .

المشاركة الأصلية كتبت بواسطة mahmoud naguib

a7medalaa .... طيب وليه أصلا يطلعوا مراسلات !!
إي شغل التمانينات ده !!
ولي يجبرونا على كدة !

و الله هما بيقولوا ان ده عشان تراجع حساباتك و يخلوا مسؤليتهم القانونية لو في خطأ في الحسابات ! بس انا مش شايفله اي لازمة ولا عمري استفدت بيهم بس هو ده في كل البنوك مش اﻷهلي بس