الموضوع: ايه السر

المشاركة الأصلية كتبت بواسطة Mohamed_Hamid

بص للصورة كاملة متبصش لجنب واحد بس
فيه واحد اسمهabdo fayed على الفيس. ده شاب مصرى عايش فى المانيا... ادخل على الفيس دور عليه وتابع بوستاته هتلاقى فيها كل الردود لتساؤلاتك وبيكشفلك الوهم ده. اه فى المان كويسين جدا وفيه المان عنصريين بجنون زى اى شعب على فكرة. احنا هنا فى مصر فينا الكويس مع الأفارقة مثلا اللى عايشين هنا وفينا اللى بيهينهم بالكلام او بالضرب بدون اى سبب.

انا عامله follow ومتابعه من زمان
وده اقتباس من كلامه

Abdo Fayed
واستكمالًا لأسطورة ماما ميركل الحبشية اللي بتنجد المسلمين..والسياسة الألمانية الكيوت اللي الود ودها تشيل اللاجئين من علي الأرض شيل..
-ألمانيا لو كانت عايزة من البداية تفتح الباب فعلًا للسوريين كانت سهلت لهم مهمة اللجوء من السفارات الألمانية في لبنان ولا الأردن..بلاش دي..كانت الحكومة الألمانية جابت السورين بنفسها لتطبيق مبادئها الانسانية التي لاغبار عليها..لكن ألمانيا معملتش كده..
ألمانيا استقبلت 10 الاف سوري علي دفعتين في سبتمبر 2013،وفبراير 2014 من مخيمات لبنان..وكان اختيار المتقدمين يتم علي 3 قواعد..إجادتهم الألمانية..أن يكون لك قريب في ألمانيا..او تكون أسرة بلا عائل..وبناء عليه ينقوا كريمة الكريمة ويشحنوهم علي ألمانيا..طبعًا كان في شرط رابع يعطي المتقدم الأفضلية اقترحه وزير الداخلية هانز بيتر فريدريش..وهو ان تكون الأسر مسيحية لكن الشهادة لله الناس أكلت وشه سواء منطمة برو أزول أو حتي الجمعيات الخيرية المسيحية كاريتاس ودياكوني..
لما السياسة الألمانية خيرة أوي كده..ما كانت ترحم لاجئي الأردن ولبنان والسودان ومصر..وتوفر عليهم ركوب الموج والغرق والصور اللي تقطع القلب..وتكرر القصة تاني وتستضيف 30 ولا 40 ولا 300 ألف لاجئ كمان..لكن لأ ال 10 الاف دول كانوا دفعة إنسانية عشان العالم مايكلش وشهم..وخلصت الحدوتة..والباقي نسيبه يركب البحر..ويا يوصل وما يوصلش..سمك القرش بلعه..كان بها ارتحنا..وصل كان بها..نديله 352 يورو شهريًا مش هيكلفونا كتير يعني..
ولما ميركل حبشية وبتحب المسلمين الغلابة المشردين..ليه كانت بتلف الاتحاد الأوروبي عشان تقنع هولاند ورفاقه بتطبيق برنامج أمني لاستهداف شبكات التهريب؟..وكانت إحدي بنود الخطة الأمنية والتي أُقرت في 18-5-2015..هي ضرب قواعد المهربين في ليبيا تحديدًا..والدنيا اتقلبت عليهم والحكومة المعترف بها دوليًا قالت الجدع يقرب بسفينة وهنغرقها..وبان كي مون طالب فريدريكا مورجيني باستبعاد الحل العسكري في التعامل مع أزمة المتوسط..و انتهت القصة إلي اللاشئ..طيب ما كنتي تسيبيهم من الأول ؟ ولما أنتي خايفة عليهم من استغلال المهربين؟ ليه لم تُعطي اللاجئين تأشيرات إنسانية وتبقي قطعتي الطريق علي المهربين؟ لأ ازاي..احنا ندمر شبكات التهريب،ونسيبهم يا إما في بلاد اللجوء الفقيرة..يا إما يركبوا وسائل أكثر تهالكًا أو ياخدوها عوم عشان يوصلوا لنا..
ألمانيا معرفتش تمنع تدفق السوريين من المنبع..لا موضوع انتقاء اللاجئين من المخيمات نفع..ولا السياسات الأمنية نفعت..وهوبا وصل اللاجئين لبلادهم في تصميم لا سابق له..وريحة الموت قربت من ألمانيا وصور الغرقي بدأت تنأح علي ضمير الناس، فخلاص مفيش حل حرفيًا غير انهم يستقبلوهم بعد ما استنفذوا كل الخيارات المتاحة بمنعهم..وده اللي حصل..
بس الناس بتنسي السيناريو من الأول ويمسكوا في آخر لقطة للفيلم ويصقفوا للحكومة الألمانية وينسجوا أساطير خزعبلية عن الكيوتنس الحكومي..وميركل اللي بتقول احنا أقرب من مكة..وهنا ألمانيا لاخوف بعد اليوم..علي مين؟..لو بايدهم يمنعوهم مكنوش اترددوا فيمتو ثانية من الزمن..بس تصميم السوريين بقي أكبر من أي شئ..
شُكرًا للمواطن الألماني..سُحقًا للحكومة الألمانية..ولا عزاء للطيبين..نمشيها الطيبين..اللي بيصدقوا أن في سياسي علي الكوكب قلبه رحيم !