الموضوع: ثقافه ولاد سليم اللبانين و مفيش صاحب يتصاحب

أنا ليا رأي مخالف لناس كتير أوي هنا

هو لي إحنا دايما كل ما حد بيطلع جديد يعمل أغنية أو فيلم أو أي حاجة ف الدنيا نحطه محل نقاش ونختلف ونضيع وقت ف الكلام عليه !
مع كل جيل بتظهر حاجات كتير غريبة وف بعض الأوقات بتبقى غاية ف القذارة والناس بتطلع تتكلم وتعمل مشكلة والموضوع بيخلص والناس دي مبتبطلش وبييجي بعدهم وهكذا !!

خلونا نحلل الأمر واحدة واحدة
كل الدول المتقدمة والمتخلفة عندها اختلاف ثقافات وعندها فنون كتير وأنواع أفلام كتير برضه
يعني في فرق بتعمل موسيقى روك وبيركبوا موتوسيكلات هارلي مع وشم أجسامهم وتيشيرتاتهم الواسعة الكبيرة وتدخينهم كل أنواع المكيفات
وفي فرق بتعمل سايلنت ميوزيك هادية وراقية
وفي عبدة شيطان وميتال ميوزيك
وفي فرق أعضاءها شواذ وبيدعوا للإنحلال
وفي فرق بتعتمد ف كل أغانيها على الجنس واستغلال الجسد
وكذلك ف الأفلام

ولكن لما هنيجي نبص على الدولة نفسها هنلاقي انها ممكن تكون من أقوى اقتصاد ف العالم وأعلى نسبة اختراعات والأقوى ف جيشها وهكذا
يعني ف ألمانيا مثلا مرخصين الدعارة والمومس هناك مهنة بتمتهن
ومع ذلك ألمانيا من أقوى الدول الأوروبية
وهكذا أمريكا وهكذا روسيا ......
وعلى فكرة أغلب الناس حلمها تسافر الدول دي بالرغم من ان فيها ألعن من هنا 1000 مرة !!

طيب خلونا ناخد الأمر بنظرة تانية خالص
كل المناقشات دلوقت بتتكلم عن ان جيلنا كان جيل متربي ومظهرتش اي حاجة تدعوا للإنحلال ف وقته !!
الجيل ده اللي هو جيل التمانينات والسبعينات اللي ظهرت فيهم أكبر كمية أفلام تجارية جنسية بحتة ظهرت ف مصر !!
ومع ذلك كان أهلنا بيخافوا علينا ومربيينا كويس ومشفناش الكلام ده
نفس الحال دلوقت لي منعملش كدة مع أولادنا !!
يعني لما أطلع أقول سرسجية وأشكال ضالة ومش عارف اي هل هيبطلوا !!
طب هل لو حتى بطلوا مش هيطلع غيرهم وغيرهم !!
مبدل ما افضل اتكلم عليهم أربي ولادي أفضل !!

الأمر من منظور تاني خالص !!
أكتر من 70% من سكان بلدك فقراء وساكنين ف عشوائيات
الأغاني دي هي اللي بيسمعوها ويفضلوها وعلشان كدة بيطلع منهم ناس تغنيها !
انت ولا هتقدر تخلي ال 70% دول أغنية ولآ هتقدر تقولهم بطلوا تسمعوا الكلام ده !!!!!!!
انت موجود ف مصر بحالها كدة هيطلع أحمد عدوية وبعدين شعبان وبعدين سعد وبعدين وبعدين أوكا وأورتيجا وبعدين ولاد سليم اللبانين وهكذا
وهيطلع برضه أحمد ذكي بقصة شعر كابوريا وهيطلع أولاد سليم اللبانين بقصتهم

المفروض نعلم أولادنا الصح م الغلط واختلاف الثقافات والأشكال والموضات واللبس ده مفيش عاقل ميعرفش يفرق بين الصح منهم والغلط
اللي ينفع يلبسه واللي مينفعش

المشكلة أولا وأخيرا ف الحكومة والنظام اللي سايب الناس ف الفقر اللي بيطلعلنا منه الناس دي المفروض نحاسبهم
مش نروح نحاسب الناس الفقراء انتم لي بتسمعوا ده أو بيطلع منكم ناس تغنيه !

مع اني بسمع أنواع كتير من الموسيقى بس ممكن اسمع أغنية شعبي مثلا بس ده ميدعيش لإني أعمل بكلماتها مثلا !
ممكن أتفرج على فيلم فيه سرسجية بس ده ميدعونيش لإني ألبس زيهم
ولما أخلف هعلم ابني ان ده غلط وده صح وهبقى معاه ومتابعه

الخلاصة ....... كل واحد يربي أولاده كويس ويبطل يجادل ف النقط دي لأنها مش هتنتهي ولو عايز يرمي اللوم على حد يروح يرميه على الحكومة ولو مش هيقدر يسكت أحسن

المشاركة الأصلية كتبت بواسطة Bassem Youssef

سمعت عنها

التعليم ملوش عازه في مصر

أنا ليا صديقي مهندس جايب توكتوك شغال عليه

لو عاوز الفرق بين دلوقتي و زمان

زمان كانت مصر بتطلع مشايخ بيقروا قرآن عشان يعلموا العرب والعالم ..وأظن الخليج كله عارف مين هو الشيخ محمود خليل الحصري والشيخ محمد صديق المنشاوي والشيخ عبد الباسط عبد الصمد ..ده الهنود ياراجل بيسمعوا الشيخ عبد الباسط عبد الصمد مع إنهم ما بيفهموش عربي ..بس بيسمعوه عشان هما عارفين إنه بيقول كلام حلو وكويس ..الكلام ده عن معرفه شخصية بواحد بنجالي في السعوديه ..مكانش يعرف من العربي غير الكلام اللي بيتكلم بيه مع الناس وسورة الفاتحه وكام سورة تانيه من قصارى السور ..

دلوقتي بقى ..إعكس ..مصر بقت تطلع المهرجانات والهبل والقرف للعرب وللعالم كله ..وبقى الخليج هو اللي يصدرلنا المشايخ والمقرئين ..شوف النهارده الشيخ مشاري راشد والشيخ ماهر المعيقلي والشيخ السديس والشيخ الشريم وغيره وغيره وغيره ..أنا طبعا مش بعيب في المشايخ اللي جايين من الخليج ..مش ده القصد خالص من كلامي ..أنا المقصد من كلامي إني أقولك لو عايز تعرف الفرق ..أهو ده أوضح بيان على الفرق بين الإثنين

وضيف على كده المشايخ اللي كانوا بيعلموا الناس دينهم ..زي مثلا الشيخ الشعراوي والشيخ محمد الراوي وغيره وغيره ..دلوقتي برضه إعكس ..شوف المشايخ اللي السعوديه مخرجاهم زي الشيخ العريفي والعوضي وعبد السلام المنجد ..حتى المشايخ اللي عندنا دلوقتي كوبي من مشايخ السعوديه في اللبس والشكل زي الشيخ حسان والشيخ الحويني والشيخ محمد حسين يعقوب

على فكره كلامي من وجهة نظر إسلاميه بتتبنى مبدأ تحريم الغناء..ومش بتهاجم المشايخ ..بل جزاهم الله عنا كل خير إنهم بيعلمونا أمور ديننا