الموضوع: تقرير مستخدم لانسر Ex 2015

معلش التقرير طويل شوية بس حبيت انقل خبرتى كلها عشان الناس تستفيد زى ما انا استفدت الصراحة من المنتدى
انا الصراحة اول مرة اكتب حاجة فى منتدى لكن انا كنت بقرأ على طول اراء الناس فى العربية دى و الحمد لله بعد تفكير طويل من اول السنة لحد شهر فات استلمت عربية لانسر شارك موديل 2015 فرانى فرش بيج فئة تالتة وكيل عامل بيها 1300 km لحد دلوقتى معملتش لسة صيانة الالف عشان كلمتهم احجز لما عملت 800 km ادونى معاد بعد 3 اسابيع ,مواصافات العربية ,
Abs
single air bag
جنوط سبور
, فتحة سقف
طارة مالتى صوت بس
, طارة و فتيس و فرامل يد جلد
, aux,Cd,6 speakers
, تكيف بكر,
غطاء متور
ب 151000 من سمير ريان و سعرها الرسمى ساعتها كان 148000.

العربة من ناحية الكماليات فقيرة شوية الصراحة حتى الفئة الاخيرة اللى بتزيد
Double airbag
, Fog light
, Usb
, Spoiler
, مخدع امامى و خلفى و حامل اكواب خلفى و كانبة قابلة للطى 60/40 و مساند رائس خلفية
وفرش اسود شكله حلو اوى و شبكة نيكل امامية و شوية كروم فى العربية مخلية العربية احلى شكلا
و ريموت وتشغيل بدون مفتاح
كانت ب 166000 بس مكنتش لقيها اصلا

بس دى حاجة بتتعود عاليها يعنى زجاج السائق بس هو اللى تاتش و الباقى كله لازم تفضل دايس عليه مفيش وحدة رفع زجاج , مفيش بلوتوث , مفيش حساسات ركن ولا كاميرا خلفية , مفيش طى مرايات كهرباء , مفيش اضواء نهارية, مفيش مسبت سرعة , عزل حرارى للكبوت , فامية للزجاج الخلفى تقريبا دى معظم الكماليات اللى بتيقى موجودة فى نفس الفئة السعرية اللى هما نيسان سنترا و فلونس و الانترا.

ده من ناحية الكماليات اللى الصراحة مش فارق معايا فعلا غير المسند الامامى , fog light و هركبة ان شاء الله و طبعا حساسات الركن و دى برده بفكر اركبها بس المشكلة انى مبحبش اللعب فى العربية فى الكهرباء او افك اى حاجة جوة عشان اللى بيتفك مبيركبش زى الاول و هتسمع بقا صوت تزيق و هى اصلا العربية خامات البلاستيك فيها مش حلوة اوى . يعنى الصراحة فرق الفلوس كان يستاهل الفئة الاخيرة بس ملقتهاش سعتها و الفلوس اصلا كانت على القد كدة يلا الحمد لله.

اما بالنسبة للاداء كل عربية ليها مميزات و عيوب :
العيوب
*صوت المتور عالى و ده عشان العزل ضعيف و حاجة تانية ان سير الكاتينة جنزير

*عزل الصوت الخارجى سئ اوى فعلا انت سامع كل دبة نملة بتحصل حوليك فعلا لو زلطة خبطت فى العربية من تحت بتسمعها و صوت الكاوتش دوشة اوى و اللى بيقول تقليل ضغط الاطارات ده غلط جدا

*العربية عالية اوى من على الارض و ده عيب فى الثبات على المنعطفات و المناوارات و مفهاش traction control او dynamic stability program بس ده صعب اوى على سعرها الصراحة

* فى منطقة العزم فيها بيقل اوى لو انت مش حارق بين ال 50 و 80 km/hr يعنى انت مش هتحس العربية تقيلة فى الطلعة بس هتحس انها بتموت شوية فى التسارع بعدين هتحس انها بتجرى منك بس ده تعود على طريقة السواقة

* الرفرف و الاكصدام و السقف فعلا ضعاف و بس ده مش سوق خامات اوى على اد ما هو تصميمهم كدة انهم مفهمش تعريجات و مساحتهم كبيرة

* المفاجئة ان الكاتلوج بتاع العربية مكتوب فيه ان المتور ده بياخد بنزين 95 او اعلى بس اصلا البنزين فالبلد دى كدة كدة مغشوش فمش فارقة

* الشنطة صغيرة فعلا يعنى السفر ديما هيبقى فيه مشكلة مفهاش كلام طبعا .

* استهلاك الوقود معتدل مش موفر و مش حريقة بنزين هى على حسب السواقة يعنى انا ساكن فى اكتوبر و شغلى فى القرية الذكية و طريقى 20 كيلو رايح و 20 زيهم راجع و مفيش زحمة و بنزل الهرم مرة او اتنين فى الاسبوع فى الزحمة يوم خميس و جمعة مثلا و استهلاك الوقود ال 10 لتر بيمشونى 100 km استهلاك حقيقى بس انا بحب اجرى و اطلع بسرعة مش بحب سواقة البطة ,

* الفرامل فيها هواء تحس انك بدوس على مخدة اسمها فرامل Spongy بس هقولهم يعالجوها فى التوكيل و لقيت كذا واحد بيكلم فى ده وفاكر ان ده طبيعى بس هو عيب ناتج عن دخول هواء فى خط الفرامل .

*دركسيون تقيل شوية عشان باور عادى مش كهرباء بس ده عشان الثبات على السرعات

المميزات

* ماتور كويس على وزن العربية 1250 كيلو بدون ركاب

*فتيس سلس جدا .

*طلعة العربية جميلة

*ثبات ممتاز على 160 اقصى سرعة طوالى عشان مش عاوز اقرص قبل ما اعمل الصيانة الكاتالوج بيقول متزودش عن 120 فى فترة التلين بس الصراحة العربية بعد ال 120 بتسحب لوحدها .

*واسعة اوى من جوة

*عالية على الارض ميزة مع المطبات و الشوارع المكسرة

*فرامل كويسة بس لسة مجربتش ال ABS الصراحة

*عدادات واضحة و كبيرة

*تكييف معقول اوى هى اصلا العربية محققة مواصافات الخليج على فكرة حتى الوكيل

*العربية قابلة لكل التعديلات الممكنة يعنى فيها مكان لكرونة خلفية و ده اللى مصغر حجم الشنطة مع الاستبن الداهية طبعا ممكن

العربيات اللى ركبتها عشان الناس تفهم انا بقارن بين ايه و ايه عشان غصب عنى هتأئر ب العربيات اللى سوقتها قبل كدة .
اولا العربيات اللى سوقتها كتير
*اتعلمت سواقة على بولونيز 89 من 13 سنة انا فى ثانوى و قعدت مع ابويا لحد 2007
*غيرها و جبنا اسبرنزا A516 كانت لسة نازلة و مبيعنها كانت رقم 2 ساعتها المهم شقيت معانة العربية دى كنت انا و ابويا و اختى بنهلك فيها و اختى و الصغيرة اتعلمت عليها و دلوقتى مراتى خدتها تتعلم عليها عربية كويسة بالنسبة لسعرها بس مشكلتها مبتتصلحش قطع غيار سيئة و توكلها زبالة و مفيش ناس كتير بتشتغل فيها.
*ابويا مهاه كارنز 2013 عربية عائلية جدا من بس بطة اوى .

عربيات صحاب او معارف سوقتها كتير:
*128 طبعا
* لانسر بطة 92
*بيجوه 505
*بيجو 206 cc
*سكودا فلشيا
* لانوس
عربيات جربتها مشوار او اتنين بالكتير
*اوكتافيا A5
*سيراتوا 2010
*جيتا 2012
طولت فعلا بس فعلا مهم اوى عشان لما اقول فرامل الانسر كويسة يبقى الناس عارفة انى جربت فرامل الالمانى و الصينى و اليابانى و بقول كويسة بالنسبة لسعر العربية .


يا رب اكون عرفت انقل تجربتى دى كويس و الناس تستفيد من العربية , و رأى المتواضع ان العربية عاوزة واحد بيحب السواقة و واحد مش بيمشى فى جوة القاهرة كتير فى الزحمة

يا جماعة الحمد لله انا عملت اول سفرية بالعريية للساحل الاسبوع اللى فات و رجعت بالسلامة النهارده اولا الشنطة فعلا صغيرة اوى يعنى انى اسرتى تتكون من زوجتى و ابنى سنة و نص وكنا طالعين اسبوع و تقريبا مكنش فى مكان للعؤبسة لحد تانى يركب معانا لانى كنت مكربسها حاجتنا بس للعلم كنا طالعين اسبوع فواخديين حاجات كتير معانا لبس و شوية ادوات مطبخ و لعب ابنى و غطاء العربية .
ثانيا العربية مريحة الحمد لله فى السفر و استهلاك بنزين كويس و متور العربية محترم فعلا انا كنت مشغل التكيف و مش مريح بس رجلى على البنزين و جبت بيها 180 يس للاسف مجرتش كتير عشان مراتى و ابنى
بس فعلا انا اتبسط منها محسناش قعلا بالطريق