يوم جميل في طابور التجديد
والله يا جماعه الواحد مش هيعرف ينسى اليوم ده من حياته وهحكهولكم بالتفصيل
قمت من النوم بكل نشاط الساعه 6:30 روحت فوريره على المرور الساعه 7:45 وانا فاكر نفسي عبقري وهضحك على الناس كلهه اني رايح بدري وطبعا كنت محضر شهادة مخالفات من قبليهه عشان اجدد رخصة القيادة المهم دخلت المرور وبضرب عيني لقيت مش اقل من 500 مواطن عبقري زيي بالظبط جوه
وعشان مكتئبش قولت وماله كله بيعدي اشتريت ورق التجديد وضربت فيه ورقة المخالفات على شهادتين الباطنه والنظر واخش على الشباك وبعد ما رجلى ورمت وجيه دوري الاقي الموظف يقولي
بالنص والله لا يا برنس احنا مبنقبلش شهادات باطنه ونظر من بره احنا بأه عندنا وحدة كشف روح الخزنه ادفع 50 جنيه واكشف وزي الغلبان نفذت ووقفت في طابور طوووووووووووووويل لحد ما دفعت وجيه وقت الكشف وفعلا كشفت نظر ودخلت على الباطنه ودخلونا مجموعة 5 افراد لقينا الدكتور بيقولنا بصوت واطي جدا كل واحد يحط بطاقته وصورة والوصل على المكتب المهم كلنا حطينا ماعدا واحد قاله انت محطتش ليه يبقا انتا عندك مشكله في السمع وبصراحه انا ضحكت فقالي لا متضحكش ده اختبار بعمله بدل ما نجيبكم يوم تاني دكتور الاذن يشوفكم
هههههه المهم كلنا اتكتمنا وانتظرنا التعليمات فقالنا كل واحد يشمر الكمام والبنطلون ويقلع الجزمه هههههه كان هيمدنا باين كشف بسرعه على كل واحد وبعد ما وقفنا على مشط رجلينا علشان يشوف حجم الثمانه او السمانه مش عارف كتبلنا التقرير
خدت ديلي في سناني وداخل على مكان التجديد بقسم بالله الناس زي النمل متعرفش تحط رجليك ومره واحده لقيت ناس في الاول بتقع بتجري اتاري رئيس الوحده ماسك واد وحالف انه يسجنه عشان الواد قاله متزقنيش المهم دخلت بالتمام بعد ساعه ونص ووقفت على الشباك والله بدون مبالغه 3 ساعات ليه لان كان فيه 7 موظفين غايبين ازاي مش عارف المهم قدمت الورق وقعد من 2 لـ 4:30 مستني اتصور وكل اللي بعدي اتصور
قلت مبدهاش روحت المراجعه يا عم الحاج انا كل اللى ورايا خلصوا وانا لسه فيقولي وانا مالي ومش هشوفلك حاجه لان لو شوفتلك هشوف للناس كلهه يهديك يرضيك مفيش فايده وبعد لف ودوران وارتفاع ضغط الدم خدت حباية شجاعه ودخلت لرئيس الوحده اللي بصراحه كان محترم معايا وراح للمراجعه وبالكشف على الملف على الكمبيوتر وتدوير العساكر عليه اكتتشفنا ايه ههههههههههههههه ان الملف ضاع بيني وبينكم وشي جاب 100 لون يانهار اسود هلف كل ده تاني ولسه ه............... لقيت رئيس الوحده قالي ثانيه واحده يا مشعارف مين صوره واديله الرخصه
وتوتا توته خلصت الحدوته وسؤالي اللولبي مدام احنا بيطلع عينا واحنا بنجدد بنفسنا امال الخدمات الالكترونيه اللى قرفينا بيها هتتطبق ازاي