الموضوع: كوميديا الجمارك فى مصر

المشاركة الأصلية كتبت بواسطة أشرف فتحى

كوميديا الجمارك المصريه والقرارات الحكيمه
عاوز تضحك..
اليومين اللى فاتوا الشغل عطلان وغرامات وارضيات بالكوم ومستوردين حلفوا بالطلاق ما هيشتغلوا فمصر تانى ...
أل ايه يا خويا المخابرات الحربيه خاطبت الجمارك بعرض كل ما هو سائل او بودر على مصلحه الكيمياء للتحليل..ليه بقى...قلك عشان نمنع دخول المواد الداخله فى صناعه المتفجرات....الله يا سيدى..ما ابدعك...هو محدش من الناس دى عنده معلومه ان المتفجرات دى مركبات...مش ماده صريحه...طب لو فى ماده لا تستخدم الا فى صناعه المتفجرات...هيستوردها مصنع شيكولاته ولبان؟

مش عاوز تضحك اكتر....لغايه النهارده كان القرار ده بيخلينى على الرغم من انى سبق وسحبت عينات واتحللت فى معامل وزاره الصحه وهيئه الرقابه على الصادرات والواردات ابعت برضو عينه لمصلحه الكيمياء وادفع عليها 1500 جنيه واستنى اسبوعين على نتيجه التحليل...لكن الحمد لله الموضوع فك شويه النهارده وبقى تحليل واحد بس..يا مصلحه الكيمياء يا معامل الصحه.....

عاوز تسخسخ بقى..فاكر حادثه التسرب الاشعاعى بتاعه اليابان؟
ايوه اللى كانت من اربع خمس سنين دى نزل ساعتها قرار بعرض كل ما هو من منشأ يابانى على هيئه الطاقه الذريه...عشان تفحص التعرض الاشعاعى للوارد... طب ومالو......ادفع الحواله ب 550 جنيه..واستنى تانى يوم لما يجى المندوب بجهاز الفحص ويلف حوالين الطرد واخر اليوم اخد افراج اشعاعى....طب لو انا جايب قطع غيار من المانيا أو أمريكا او اى بلد بس فيها حاجه وليكن بطاريه او شاشه منشأها الاصلى اليابان....الشحنه كلها تقف وتعطل يوم كامل عشان البطاريه دى تتفحص اشعاع....على اساس ان احنا هنعرف اللى ما شافوهوش فى البلاد دى .......
طب فين المشكله ما الناس بتحافظ علينا وعلى صحتنا اهو...
حضرتك الموضوع ده من 5 سنين تقريبا واليابان نفسها اعتبرت منطقه التسريب الناتجه عن الزلزال منطقه أمنه..واحنا لسه لغايه دلوقت بنوقف كونتينر اربعين قدم او شحنه اطنان عشان فيها مع المكن شاشه من منشأ اليابان علما اننا اصلا مستوردين المكن من فرنسا ..

هتقع من طولك بقى لما أقولك...
لو حاجتك جايه من الهند بتعرض مخدرات....
يا نهار اسود...أيه عرض المخدرات ده؟
حضرتك بتاخد مستندات الشحنه وتطلع على المطار وتدخل مكتب شرطه يدور فى كشف قدامه فى اسامى شركات ..انت مش فيهم ...امضا واتكل على الله...

امسك نفسك بقى فى اللى جى..
انت جايب قشاره سلك او سكينه أكل أو برواز تذكارى فيه خنجر او سيف انتيكه عشان تعلقه كتحفه او انتيك فى البيت او اى ما يمكن استخدامه كسلاح او يعرف فى المستندات بسكين.
هتعرض امن عام ومش هتطلع....

اللى جايه دى جديده...
لو جايب برنتر او اى حاجه بتطبع ولو ماكينه الكاشير او بتاعه الصيديليه اللى بتطلع لك الامبلغ او الريسيبت..لو بتطبع الوان حضرتك هتطلع على مجمع التحرير تاخد موافقه اداره التزييف والتذوير..ولو بتطبع ابيض واسود تاخد موافقه الامن الوطنى اللى هو امن الدوله سابقا..

كفايه كده عشان مش حاسس بجنبى الشمال ورجليا بتنمل....

- لاء أنا مش عايز أقع من طولى.

- يعنى أنت عايز المخدرات تخش مصر وابنى وابنك يروحو فى داهية.

- أى سلاح أبيض يوقفك فى أى مطار أنتيكه أو مش أنتيكه.

- فى بطايق وعملات بتتطبع بى أجهزة برنتر حديثه وياما ناس اتمسكت.

- كفايه كده عشان مش حاسس بجنبى الشمال ورجليا بتنمل.

- أسأل نفسى هى ليه البلد بتعمل كده وهيطلع بأذن الله فى سبب.

- يعنى نسيب الإرهابيين إللى لا ليهم وطن ولا دين يستغلونا فى الجمارك ويدخلو عناصر كيميائيه لو اتخلطت مع عناصر موجوده فى مصر تعمل مُركابات شديدة الإنفجار ونسكوت!!!!!!!!!!

- ومفيش أى بيروقراطيه وأنا رديت عليك بالأسباب فى حاجات أنت بتتعجب منها.

- بعد متثبتله كل حاجه بالأدلة.

- تلاقى فى ناس بتعترض من اجل الأعتراض.

- مع أنه لو فكر دقيقه هيلاقى السبب.

- ناس وصلت لمنتهى العلم.

- شايفيين إللى الحكومه مش شايفها.

- وقال أيه بيعدلو عليها كمان.

المشاركة الأصلية كتبت بواسطة volociximab

و انا ادفع جمارك ليه
حاجتى ملكى-بتاخدوا اتاوة عليها ليه؟

- عشان مصر تكون بإذن الله قد الدنيا أم الدنيا.

المشاركة الأصلية كتبت بواسطة أشرف فتحى

استاذ صاصا

ممكن ارد على تعليق حضرتك
لكن ما شاء الله انت افحمتنى بالحجه وبليغ المنطق وسلامه جنبك الشمال ورجليك الاتنين

- حصل خير.