كوميديا الجمارك فى مصر

**أشرف فتحى** · 07-09-2015 04:15 AM

كوميديا الجمارك المصريه والقرارات الحكيمه
عاوز تضحك..
اليومين اللى فاتوا الشغل عطلان وغرامات وارضيات بالكوم ومستوردين حلفوا بالطلاق ما هيشتغلوا فمصر تانى ...
أل ايه يا خويا المخابرات الحربيه خاطبت الجمارك بعرض كل ما هو سائل او بودر على مصلحه الكيمياء للتحليل..ليه بقى...قلك عشان نمنع دخول المواد الداخله فى صناعه المتفجرات....الله يا سيدى..ما ابدعك...هو محدش من الناس دى عنده معلومه ان المتفجرات دى مركبات...مش ماده صريحه...طب لو فى ماده لا تستخدم الا فى صناعه المتفجرات...هيستوردها مصنع شيكولاته ولبان؟

مش عاوز تضحك اكتر....لغايه النهارده كان القرار ده بيخلينى على الرغم من انى سبق وسحبت عينات واتحللت فى معامل وزاره الصحه وهيئه الرقابه على الصادرات والواردات ابعت برضو عينه لمصلحه الكيمياء وادفع عليها 1500 جنيه واستنى اسبوعين على نتيجه التحليل...لكن الحمد لله الموضوع فك شويه النهارده وبقى تحليل واحد بس..يا مصلحه الكيمياء يا معامل الصحه.....

عاوز تسخسخ بقى..فاكر حادثه التسرب الاشعاعى بتاعه اليابان؟
ايوه اللى كانت من اربع خمس سنين دى نزل ساعتها قرار بعرض كل ما هو من منشأ يابانى على هيئه الطاقه الذريه...عشان تفحص التعرض الاشعاعى للوارد... طب ومالو......ادفع الحواله ب 550 جنيه..واستنى تانى يوم لما يجى المندوب بجهاز الفحص ويلف حوالين الطرد واخر اليوم اخد افراج اشعاعى....طب لو انا جايب قطع غيار من المانيا أو أمريكا او اى بلد بس فيها حاجه وليكن بطاريه او شاشه منشأها الاصلى اليابان....الشحنه كلها تقف وتعطل يوم كامل عشان البطاريه دى تتفحص اشعاع....على اساس ان احنا هنعرف اللى ما شافوهوش فى البلاد دى .......
طب فين المشكله ما الناس بتحافظ علينا وعلى صحتنا اهو...
حضرتك الموضوع ده من 5 سنين تقريبا واليابان نفسها اعتبرت منطقه التسريب الناتجه عن الزلزال منطقه أمنه..واحنا لسه لغايه دلوقت بنوقف كونتينر اربعين قدم او شحنه اطنان عشان فيها مع المكن شاشه من منشأ اليابان علما اننا اصلا مستوردين المكن من فرنسا ..

هتقع من طولك بقى لما أقولك...
لو حاجتك جايه من الهند بتعرض مخدرات....
يا نهار اسود...أيه عرض المخدرات ده؟
حضرتك بتاخد مستندات الشحنه وتطلع على المطار وتدخل مكتب شرطه يدور فى كشف قدامه فى اسامى شركات ..انت مش فيهم ...امضا واتكل على الله...

امسك نفسك بقى فى اللى جى..
انت جايب قشاره سلك او سكينه أكل أو برواز تذكارى فيه خنجر او سيف انتيكه عشان تعلقه كتحفه او انتيك فى البيت او اى ما يمكن استخدامه كسلاح او يعرف فى المستندات بسكين.
هتعرض امن عام ومش هتطلع....

اللى جايه دى جديده...
لو جايب برنتر او اى حاجه بتطبع ولو ماكينه الكاشير او بتاعه الصيديليه اللى بتطلع لك الامبلغ او الريسيبت..لو بتطبع الوان حضرتك هتطلع على مجمع التحرير تاخد موافقه اداره التزييف والتذوير..ولو بتطبع ابيض واسود تاخد موافقه الامن الوطنى اللى هو امن الدوله سابقا..

كفايه كده عشان مش حاسس بجنبى الشمال ورجليا بتنمل....

**hesham fawzy h** · 07-09-2015 04:36 AM

طيب ما البلد كلها كدة روتين معروف :)

**mk3** · 07-09-2015 04:52 AM

هو حضرتك شغال فى التخليص ولا الموضوع منقول

**AlGhareeb** · 07-09-2015 05:16 AM

شىء عادى جدا محدش فاهم حاجة

**FAR!D** · 07-09-2015 07:16 AM

طب ماعادي على فكره
انا اعرف بني ادمين بتقلع و تتفتش ذاتي و هوا بيعدي من مطارات دول هولندا بالتحديد

**nilmaster** · 07-09-2015 11:43 AM

وده العادي من بنك مصر انت لو حتستور د موبايل من غير كاميرا لازم يعدي عل المرفق القومي للاتصالات وتاخد تصريح واذن
قدرنا

**Bassem Youssef** · 07-09-2015 01:06 PM

الكفته اسلوب حياه

**3adelnor** · 07-09-2015 01:15 PM

للاسف القررات اللي بتخنق الناس اللي زينا بيكون سببها مش غلاسه من الحكومة ولكن لان غالبية الشعب المصري فهلوي وتاجر شنطة ومهرب دهب ودولارات ,وبيتاحيلوا علي القانون ,فعلشان كدا الحكومة بتحاول تضيق الخناق عليهم بالقوانين والاجراءات دي واللي بيضايق هو اللي ماشي سليم لكن فعلا الحكومة عاملة اللي عليها .
اعتقد بما انك شغال في الجمارك عارف اد ايه المصريين بيستخدموا حيل علشان يهربوا اي حاجة ودا الطبيعي بتاع المصري للاسف الا من رحم ربي .

**ALYSALIM** · 07-09-2015 01:33 PM

المشكلة مبقتش في الروتين المشكلة اصبحت في تطبيق الروتين = يعني ممكن يعمل فروع للمصالح المهمة في نفس منطقة الجمارك يعني معمل الكيميا له فرع في الجمرك او المطار وكذلك الامن الوطني او مكافحة التزييف وكله يخلص في ساعتين والناس تمشي