حبيت اعمل تقرير مفصل للعربية عشان لاحظت ان ناس كتير ماتعرفش عنها حاجة..
وإن شاء الله الموضوع هيبقى updated ولو جد جديد من اكتشافات او ملاحظات هاكتبها هنا..
أولاً، المواصفات الرسمية السيارة:
العربية أصدرت فى ديسمبر 2014
موتور 1400 سي سي - 2 كامة - VVT
95 حصان whp عند 6000 rpm - عزم 130 نيوتن عند 4000 rpm ( ال bhp من الموتور 107 حصان)
فتيس اوتوماتيك عادى 4 سرعات
فوانيس عدسات قابلة لتعديل الأرتفاع كهربائياً
فوانيس شبورة قابلة لتعديل الأرتفاع يدوياً
عجلة قيادة باور كهربائية
عجلة القيادة قابلة لتعديل الأرتفاع
عجلة قياده متعددة الوظائف للتحكم فى الصوت والاستقبال المكالمات
كمبيوتر رحلات
مقابض ابواب من الكروم
شبكة امامية من الكروم
جنوط سبور 16 بوصة
اشارات بالمرايا الجانبية
مرايات جانبية كهربائية
مرايات جانبية ضم كهرباء
فرش نصف جلد نصف قماش
تكييف اوتوماتيك ديجيتال
مخدع امامى مع مساحة تخزين
مخدع خلفى مع 2 حامل أكواب
حامل نظارة شمسية علوى
ستارة خلفية مدمجة (يدوية)
كاسيت سى دى وبلوتوث مكالمات وميديا و usb و aux
أريال مدمج بالزجاج الخلفى
اربع سماعات و عدد 2 تويتر
اضاءه صالون 3 اوضاع
اضاءة للركاب فى الخلف للقراءة
اضاءه فى الكونسول الامامى اسفل الكاسيت
اضاءة اسفل التابلوه - Footwell light
عدد 4 زجاج كهربائى
مفتاح ذكى Smart Key - بصمة Keyless Go
زر ستارت انجن
نظام ايموبلايزر ضد السرقة
انذار
فرامل ABS و EBD
عدد 2 ايرباج (للسائق والراكب الامامى)
أحزمة أمان Pretension
نظام تذكير حزام الامان
مخرج تكييف خلفى
ثانياً، تقريرى الشخصى:
تقريري عن سيارتى سوزوكى سياز ٢٠١٥
بسم الله الرحمن الرحيم..
-
العربية معايا بقالها 6 شهور عملت بيها 10500 كيلو واشتريتها من الطارق ب ١٢٨٥٠٠ فى اول ابريل ٢٠١٥.
-
سعرها دلوقتى فى المعارض مابين ١٣٤ ل ١٣٨ الف
-
موتور ١٤٠٠ سي سي DOHC VVT بيولد ٩٥ حصان عند ٦٠٠٠ ار بى ام و عزم ١٣٠ نيوتن عند ٤٠٠٠ ار بى ام- سير كاتينة جنزير- تسارع من صفر ل ١٠٠ فى ١١.٥ ثانية
-
الموتور سحبه ممتاز وماتحسش انه ١٤٠٠ نهائى وتم تجربته مع تحميل ٥ اشخاص وشنط مافيش اى تأثير على السحب الحمد لله. صوت الموتور غير مسموع تماماً على ال idle وعند السير بسرعات ثابتة بس بيعلى عند القرص على العربية والشد وده راجع لأن سير الكاتينة جنزير والتروس الى لافف عليها معدن.
-
فتيس اوتوماتيك عادى ٤ سرعات.. استجابته هايلة ونقلاته مش محسوسه ولما بتقفل الاوڤر درايڤ الفرق رهيب والسحب بيزيد بصورة ملحوظة.
-
العفشة ممتازة وناعمة ومدية ثبات كويس عند المناورات تم تجربة المناورات على سرعات ٦٠ و ٨٠ وكان الثبات تمام والغرز على ١٤٠ و ١٥٠ مافيش اى مشاكل.
فى صوت لقلقة خفيفة فى المساعدين الاماميين فى جميع العربيات وماحدش عارف مصدره ايه بس مالوش تأثير على اداء العفشة.
والعفشة حصل كذا موقف معايا قلت اكيد حاجة هتحصل مقص يتكسر مساعد يضرب زيت بس الحمد لله العربية عدت من نقر ومطبات غبية على سرعات عالية.
-
دركسيون كهرباء مش زيت- وبيتقل مع السرعة لزيادة الثبات والامان- طبعاً مالتي فانكشن والطارة جلد.
- بالنسبة
للأمان العربية فيها ABS و EBD واتنين اير باج واحزمة امان Pretension بموتور يشدها وقت الفرملة القوية. وكل وسائل الامان تعمل بأمتياز الحمد لله.
- الچنوط سبور 195/55/r16 كاوتش جوود يير. الكاوتش صوته عالى وخصوصا مع الاسفلت الحرش انما مع الناعم زى الفل.
-
ارتفاع العربية عن الأرض ١٦ سم ومافيش اى مشاكل مع اغلس المطبات وتم تجربة العربية وهى محملة ٤ اشخاص غيرى والحمد لله برضه مافيش مشاكل.
-
الفوانيس عدسات وقابلة لتعديل الارتفاع، مع فوانيس شبورة امامية وعواكس خلفية.
-
التكييف تسقيعه هايل جداً وفتحات التكييف الخلفية بتسرع من تسقيع الصالون وتوزيع الهواء البارد. ومالوش اى تأثير على سحب العربية نهائى.
-
ثبات العربية لحد ١٤٠ ممتاز وعند ١٦٠ جيد وبعد كدة تحس انها خفيفة. بس ده مايمنعش ان ناس كتير قفلت العداد (٢٠٠ كم/س). -والآر بى ام عند ٢٠٠كم/س بيبقى على ٥.
-
الاوبشنز كلها شغالة تمام جداً البلوتوث واليو اس بى والمالتى فانكشن والتكييف الاوتو والمرايات الضم. كله تمام.
-
الصالون واسع والقاعدة على الكنبة مريحة جداً حتى لو الكراسي راجعة ورا. بس التنجيد ناشف شوية فى ناس تعبانة منه بس بالنسبة لى مش مسبب مشكلة. الفرش نص جلد ونص قماش شيك جداً ومسند الذراع قدام وورا مريحين.
-
خامات التابلوه ممتازة بالمقارنة بعربيات فى نفس الفئة والتقفيل جيد.
-
استهلاك البنزين معايا شخصيا ١٣.٥ كيلو/لتر مع التكييف ١٤.٥-١٥ كيلو/لتر بدون تكييف. فى ناس الاستهلاك عندها احسن وفى ناس اسوأ طبعا بيختلف مع طبيعة المشاوير اليومية واسلوب القيادة.
-
عيبها فى نظرى عدم تدعيم الاكصدام الخلفى بشكل جيد وده بيخلى اى خبطة ورا يبقى تأثيرها جامد.
-
بالنسبة لى العربية صافقة رابحة واحسن من فلوسها كتير ولو رجع بيا الزمن هشتريها برضه.
-
التوكيل بقى.. تعاملاته فى الصيانة الحمد لله زى الفل.. انا جربته فى قطع الغيار بالنسبة لى كانت الشماسة الشمال فوق السائق كانت المفصلة بتاعتها اتقطمت وماكنتش متوفرة بس بعد يومين كلمونى وقالولى انها وصلت ورحت وركبتها الحمد لله تبع الضمان بدون اى تكلفة.
-
العربية كمان ليها جروب من اقوى جروبات السيارات على فيس بوك واقف فى ضهر العربية والملاك وفى كارت عضوية ليه خصومات فى اماكن كتير ليها علاقة بالعربيات واماكن تانية زى كافيهات ومطاعم وعيادات، والتوكيل بيحترم الجروب وبينصاع لمطالبه بشكل جيد زى مثلا ان التوكيل غير نوع الزيت من 5w40 ل 5w30 بناءً على طلب الجروب بعد ما قرينا فى الكتالوج بتاع العربية ان دى انسب لزوجة زيت للموتور. ومواقف تانية كتير التوكيل بصراحة لم يخذلنا فيها. فى بعض الاخطاء من التوكيل ليست قاتلة وشأنه شأن اى شركة او جهة فى مصر.
- تم عمل
صيانات ال 1000 وال 5000 وال 10000 فى التوكيل وكله تمام
-
اسعار المصنعيات للصيانة رخيصة مقارنة بسيارات اخرى فى نفس الفئة وفئات اقل كمان.
-
قطع الغيار اسعارها طبيعية مش رخيصة ومش مبالغ فيها. موجودة فى التوكيل وبعض التجار برة.
-
لم يظهر عيوب جوهرية ومتكررة مع كل الملاك حتى الآن الحمد لله وربنا يستر وتفضل ماشية كويس.
أرجو اكون افادتكو وربنا يوفقكوا لما فيه الخير.
