ايه المشكله في الزواج من واحده عنها 19 سنه؟؟؟

**Bassem Youssef** · 12-09-2015 08:02 PM

19 سنه يعني طالبه لسه بتاخد المصروف و متقدرش تتحمل مسئوليه الزواج

استني عليها لما تتخرج تكون كبرت شويتين و تكون حوشتلك قرشين زياده

**Mahmoud Naguib** · 12-09-2015 08:07 PM

مع احترامي للجميع يعني أنا مش فاهم الناس اللي رافضة الموضوع إي سببها !!

خد عندك المميزات

1- قريبتك ودي ميزة كبيرة جدا لأنك ع الأقل عارف أصلها ونسبها وأخلاقها خصوصا انكم قريبين من بعض كمان
2- جميلة ودي حاجة ممتازة
3- البنت محترمة ومحتشمة وده كنز دلوقت
4- سنها مش كبير ودي ميزة مش عيب أبدا على فكرة

المفروض اصلا تبدأ تاخد خطوة من دلوقت وتتقدم قبل ما تدخل الجامعة يعني هي لما بتدخل مخطوبة محدش بيقربلها ولآ بيحاول يتكلم معاها سواء بقى كان بيهزر أو عايز يضيع وقت
وممكن يكون جاد وتحبه وساعتها بقى انساها تماما

كلم البنت مثلا على الفيس كلام عادي جدا ولو لقيت في انجذاب منها ليك قولها أنا عايز أتقدملك إي رأيك !
متقولهاش أنا بحبك مثلا !!
وسيبلها وقت تفكر مثلا وشوف ردها ولو قالت موافقة اتقدم تاني يوم على طول

ومبروك ياكبير عليك وممكن تأجلوا الخلفة لبعد الجامعة مش مشكلة كبيرة

**samyyousef** · 12-09-2015 08:36 PM

الجواز نصيب
و النصيحة في الموضوع ده خطيرة و شائكة لاني ممكن اقول كلمة لا القي لها بال و تكون نتيجتها ضياع فرصة قد تندم عليها...لذلك انا ساتحدث عن وجهة نظر عامة قد تنطبق على حالتك و قد لا تنطبق
فعلى سبيل المثال ان تطول فترة الخطبة مدة الدراسة في الجامعة بحد ادنى اربع سنين لهو امر مقلق و احتمال حدوث خلافات فيه كبير...اضف الى ذلك و جود فترات توتر في فترات المذاكرة و الامتحانات...اضف الى ذلك ما ذكرته انت من مسالة انها هي نفسها ستخوض تجربة الحياة الجامعية بكل ما تعنيه هذه الجملة من معاني و ما تحدثه هذه الفترة من تغيير في الشخصية و وجهات النظر
اما بالنسبة لمشكلة القرابة فهي من ثلاثة اوجه: اولا لو القرابة قريبة هناك مشكلة تخص ضعف الابناء و بعض الامراض الوراثية و يفتي في ذلك اهل التخصص...ثانيا اتفق مع العضو المشارك من ان المشكلة العادية التي تحدث في اية عائلة يزداد وطيسها في حالة وجود قرابة....ثالثا: الزواج من الاقارب بيصارع الانطباعات السابقة عن العائلة و يحرمك من النسب من عائلات جديدة
كل ما سبق قد لا ينطبق على حالتك و قد تكون امامك فرصة ذهبية فاستخر الله قبل اي قرار

**medosalah** · 13-09-2015 12:57 AM

كلامكم كله مظبوط

المؤيد والرافض للفكره

طبعا الموضوع له سلبيات ولكن برده له ايجابيات كتير زي ما انتم ذكرتم

مبدايا كده فكره اني استناها لما تخلص فده مش وارده .. الاول انها لو دخلت الجامعه ففرصه ان حد يعجب بيها او يتقدملها في الغالب هتحصل ... وكده ابقي ضيعت الحوار من ايدي خلاص

وفكره اني اخطبها واستناها لما تخلص .. فبرده مرفوضه لان الخلافات والمشاكل هتكتر وكمان بصراحه انا قدامي سنتين بالكتير علشان ارتبط.. ولو عدوا السنتين فانا امامي درسات عليا هكملها بره البلد ان شاء الله .. ماجيستير ثم دوكتوراه وفي طبعا الجيش .. وبكده لو اجلت موضوع الجواز او الارتباط يبقي هاجله لما يبقي عندي 30 او 32 سنه

علي فكره موضوع القرايب والمشاكل ان شاء الله غير وارد لاسباب
1) التوافق العالي بين العائلتين والاحترام المتبادل والمستوي الاجتنماعي
2)هما من المنوفيه .. واحنا من القاهره( يعني اصلنا من المنوفيه بس مولود ومتربي في القاهره)

الموضوع معقد شويه..

الفكره بس هو موضوع التفكير ومستوي التعليم

انا لسه متخرج من كليه الطب .. وهي لسه هتدخل الجامعه السنه الجايه

هل هحس بفرق في الاهتمام والتفكير

علي فكره انا مش من النوع القفل والدحيح والاتم واللي بيكون كل حياته مذاكره وكده

انا الحمد لله شخصيه مرحه جدا .. بحب السفر جدا جدا .. تقريبا في اثناء ال 6 سنين الكليه سافرت رحلات لكل حته في مصر(اسكندريه . ساحل . شرم الشيخ . الغردقه. مطروح. الاقصر واسوان. راس سدر . اسماعليه . السويس. طابا. دهب.) اكتر من مره
بحب السواقه جدا جدا .. والعربيات والتعديل عليها هوايه عندي

بس برضه خايف الاقي تفكيرها سطحي وكده
..
غالبا لازم احاول اكتر شويه من الزيارات للعائله في المنوفيه واحاول اركز اكتر علي الشخصيه وطريقه التفكير وكده
بس خايف اكون داخل في موضوع غلط من الاول