الموضوع: اقصي سرعه ممكن الواحد يمشي بيها وهو مشغل التكييف ؟؟

تشغيل التكييف وانت ماشي بسرعة عالية مالوش تأثير على الموتور ولا بيسبب إجهاد للموتور.. ﻹن الطاقة اللي بيستهلكها التكييف في الحالة دي تعتبر صغيرة جدا بالنسبة لطاقة الموتور الخارجة منه

بمعنى.. لو فرضنا إن كمبريسور التكييف قدرته 5 حصان وإن قدرة الموتور 120 حصان.... حضرتك بتحس بإن العربية سحبها قل لإن طاقة الموتور وانت ماشي على 60 مثلا بتبقى في حدود 50 حصان تقريبا ( تختلف حسب انت معشق أنهي سرعة في الفتيس )... يعني التكييف ساحب حوالي 10% من قدرة الموتور..

لما بتمشي على 180... الموتور بيبقى تقريبا جايب أقصى قدرة ليه اللي هي 120 حصان... في الحالة دي الكمبرسور ساحب حوالي 4% بس من قدرة الموتور..

مش دي النسبة اللي تتعب الموتور..


اللي بيتعب الموتور فعلا هو الدوران العالي للموتور واللي غالبا بيكون قريب من الخط الأحمر.. وده بسبب:

1- التآكل اللي ممكن يحصل بسبب عدم قدرة الزيت على توفير طبقة التزييت الكافية.
2- كمية الحرارة الكبيرة اللي الموتور بيولدها وبتبقى محتاجة تتبرد أسرع.
3- الأحمال الزايدة نتيجة مقاومة الهواء.

على فكرة... ما تستهينش نهائي بموضوع مقاومة الهوا... تأثيرها كبير فوق ما تتصور... وأنا شخصيا أعرف ناس عندهم عربيات نقل مواتيرهم فوتت بسبب مشيهم بالعربية ومحملين بحمولة خفيفة بس محطوطة بطريقة تزود مقاومة الهوا جدا.


...