بنك qnb .. وشغل الفهلوة

من شهور فاتت روحت qnb علشان احصل على فيزا نت فقط
قابلوني بالترحاب والسلامات وقالولي لازم تفتح حساب توفير .. وهتاخد معاه فيزا نت

قولت وماله .. أفتح حساب توفير .. ايه المطلوب ؟
- صورة البطاقه ومبلغ ايداع

و قالولي مصاريف الحساب اد كده في السنه .. وخدمة النيتا بنك ب 7 جنيه في الشهر
والفيزا نت بكذا .. المجموع في السنه ( مش فاكر )

قولت طيب ايه المبلغ اللي اعمله ايداع في الحساب .. بحيث يغطى مصاريف الحساب بالفوائد

قالي نعملك شهادة ب 2000 جنيه تديك فايدة كل 3 شهور مش عارف كام .. هتغطي مصاريف الحساب في السنه

وهنعملك كريدت كارد بضمان الشهادة ( مصاريف الكارت مجاناً اول سنه ) .

المهم دفعت 3000 ( 2000 للشهادة و 1000 في الحساب )
واستلمت 3 كروت ( كارت ال atm وكارت النت وكارت الإئتمان )

تفاجئت بعد كده ان كارت الائتمان عليه مصاريف 125 جنيه تقريباً وكل شهر في معاد الدفع يخصموا حوالي 6.5 جنيه من حسابي فايده علشان مادفعتش مصاريف الكارت

ولما اشتكيت قالولي لازم تروح الفرع .. روحت الفرع .. عملت شكوى .. ومحدش عبرني شهرين

روحت تاني .. واتشالت المصاريف

واتفاجئت ان في مصاريف تاني نزلت عالكارت 1.38 جنيه فايده .. علشان المصاريف اتأخرت .

المهم دفعتهم اون لاين .. لأني مش هروح الفرع علشان جنيه .. لكن الجنيه ده عامل زي الشوكه في حسابي .

النهاردة .. بدخل اتفرج عالحساب عالنت .. الاقي حاجة رابعه في حسابي كأنها كارت او حساب
وعليها 2 جنيه بالسالب .. ومخصوم 75 جنيه من حسابي
والحساب كده كده عمال يتخصم منه جنيهات كل شهر في حجات انا مش فاهمها .

اتصلت بيهم قالتلي ده حساب جاري اتفتحلك الشهر ده .. علشان انت عندك كريدت كارد
واضافلك باقة بنكي ب 75 جنيه في السنه بتديك حساب التوفير مجانا وال atm مجاناً والكريدت كارد بخصم 25%

يا بنت الحلال .. ايه ده كله .. ازاي ده يحصل في حسابي بدون علمي وبدون ما اطلبه
امال ايه المصاريف اللي انا دفعتها دي كلها لحسابي وال atm وكل الشغل ده
هو كل شوية تطلعولي بحاجه تسحبوا بيها فلوس من حسابي وخلاص

وبعدين اصلاً ازاي تضيفولي خدمه مدفوعه وتخصموا فلوسها من حسابي .. وتفتحولي حساب جاري مع حساب التوفير وينزل عليه 2 جنيه بالسالب .

كل ده يحصل وانا نايم في بيتي عادي كده .

انا لو استمريت عالحال ده .. على اخر السنه هطلع مديون للبنك .. ده غير اني حطيت فيه فلوس تاني بعد كده

وحتى الأن لم استفد اي شىء من الحساب .. والكروت زي ماهي في الاظرف بتاعتها لم تستخدم

فأنا قررت اني اروح اقفل حسابي تماماً في البنك وانهي كل تعاملاتي معاه
لأن ده بنك بيتعامل مع فلوسك وحسابك كما يحلوا له .. ومش لاقي فيه مميزات تخليني استمر معاهم

وانا كل اللي كنت عايزه " فيزا نت " .. جرجروني شوفوا لأيه .

انا حسابي الاساسي في بنك مصر من سنين .. ومرتاح اخر راحه ومفيش الهبل ده .

لذا وجب التحذير .. راجعوا حسابتكم البنكيه .. انا لو ماكنش عندي خدمة النيتا بنك اللي مكلفاني 7 جنيه في الشهر

ماكونتش هعرف اي حاجه من اللي حصلت في حسابي دي .. وكنت ممكن افضل سنين معرفش ان في حساب جاري اتفتحلي وفلوس اتخصمت ومصاريف كريديت كارد .. ولا الجنيهات والقروش اللي عماله تتخصم عمال على بطال دي .

ياريت بقى لو في اي نصائح .. لغلق الحساب .. اخلي بالي من ايه .. علشان ما اتفاجئش بحجات غريبه بعد كام شهر .. ولا اي نصيبه عليه في البنك المركزي
بسبب البنك ده .