مشروع ملعب نجيل صناعي مجذي ام لا ؟

**حسام الغرباوي** · 16-09-2015 04:26 PM

السلام عليكم

بفكر اعمل ملعب نجيل صناعي ...الارض ملك لكنها تبعد عن العمار والمدينة حوالي كيلو تقريبا ..

كلمت شركات عرفت ان التكلفة حوالي 180 الف جنية وبيسلمك الملعب علي المفتاح ...الخوف ان المكان ميكنش مناسب مع العلم ان الملعب في مدينة رئيسية عاصمة المحافظة

**Dr.Karim Emam** · 16-09-2015 05:56 PM

هي فكرة مربحة جدا
واحد صاحبي شغال في الموضوع ده بيقولي ان الملعب بيلم تمنه في خلال سنة, بس أهم حاجه الصيانة.
هو بس محتاج دعاية في الأول عشان الناس تعرف المكان

**sha2e** · 16-09-2015 06:41 PM

180 الف جنيه في شوية حشيش ؟
وكمان صناعي ؟
حاول تسأل اي جنايني او حد بيفهم فى الزراعة لو هزرعها حشيش (نجيل) هتاخد فترة قد ايه وهتتكلف كام ؟
معتقدش هتتكلف الفين تلاته (اعتبرهم فلوس ميته) لتجربه فقط
وشوف هل المشروع في المكان ده هيبقى عليه اقبال ولا لأ
لو عليه اقبال وحسيت انه هيبقى مجدي معاك اعمله صناعي

**Bassem Youssef** · 16-09-2015 07:30 PM

فكره مربحه بس لازم الملعب يكون في قلب المدينه نفسها في حي مليان عيال صغيره و شباب و يكون في كشافات زي بتوع الاستاد

**besso** · 16-09-2015 07:36 PM

انا كمان اظن ان لو اتزرع نجيله طبيعي مش هايكلفك

**hesham fawzy h** · 16-09-2015 11:02 PM

النجيلة الطبيعية صعبة فى الرعاية

و الصناعية بتجبها لحد متبوظ و تغيرها .. و بعدين انضف مفيش طين لو حد وقع و مش صلبة زى الارض الطبيعية

**حسام الغرباوي** · 17-09-2015 01:09 PM

المشاركة الأصلية كتبت بواسطة dr.karim emam

هي فكرة مربحة جدا
واحد صاحبي شغال في الموضوع ده بيقولي ان الملعب بيلم تمنه في خلال سنة, بس أهم حاجه الصيانة.
هو بس محتاج دعاية في الأول عشان الناس تعرف المكان

بخصوص الدعايا هعمل دعايا كبيرة لو تقدر تسأله عن المكان انو لو علي اطراف المدينة يكون برضو كويس ولا لأ مع العلم اني لو عملته إن شاء الله هعمل اقل سعر

**حسام الغرباوي** · 17-09-2015 01:12 PM

المشاركة الأصلية كتبت بواسطة sha2e

180 الف جنيه في شوية حشيش ؟
وكمان صناعي ؟
حاول تسأل اي جنايني او حد بيفهم فى الزراعة لو هزرعها حشيش (نجيل) هتاخد فترة قد ايه وهتتكلف كام ؟
معتقدش هتتكلف الفين تلاته (اعتبرهم فلوس ميته) لتجربه فقط
وشوف هل المشروع في المكان ده هيبقى عليه اقبال ولا لأ
لو عليه اقبال وحسيت انه هيبقى مجدي معاك اعمله صناعي

مش هينفع الطبيعي اكيد لان الملعب بيتلعب عليه اكتر من 7 ساعات يوميا ..لو طبيعي هيحتاج يتغير كل 4 ايام غير الطينة والصيانة ..دا غير ان في ملاعب تانية كتير , فاية اللي هيخلي واحد يروح يحجز نجيل طبيعي مش كويس ويسيب الصناعي ؟

غير ان ال180 مش تكلفة النجيل فقط ..النجيل فقط حوالي 70 الف ..الباقي تسوية الارض والشبك واعمدة الانارة والبوابات وغرفة مبنية والعرض والتخطيط والصيانة لمدة 3 سنوات ..الخ

**حسام الغرباوي** · 17-09-2015 01:13 PM

المشاركة الأصلية كتبت بواسطة besso

انا كمان اظن ان لو اتزرع نجيله طبيعي مش هايكلفك

التكلفة مش النجيلة فقط التكلفة شاملة والنجيلة الطبيعي متستحملش لعب كتير هتبوظ

المشاركة الأصلية كتبت بواسطة hesham fawzy h

النجيلة الطبيعية صعبة فى الرعاية

و الصناعية بتجبها لحد متبوظ و تغيرها .. و بعدين انضف مفيش طين لو حد وقع و مش صلبة زى الارض الطبيعية

بالظبط

**eslamrace** · 17-09-2015 07:45 PM

اظن مشروع كويس جدا طالما الارض ملك حضرتك حاول بس تتقلل تكاليفك بانك تعمل كل حاجه بنفسك بعيدا عن الشركات المتخصصه"بالرغم انها افضل واكثر احترافيه" بمعنى النجيل الصناعى له ناسه اللى ممكن ييجوا يركبوه ويظبطوه وتقدر تفاصل معاهم وتاخد افضل سعر وكذلك العارضات والاناره ممكن حضرتك تشوف الخامات اللى بتتعمل بيها ايه وتجيب صنايعى ينفذهالك بتكاليف اقل والاضاءه اى كهربائي حتجيبله الكشافات اللى تعجبك وهو حيركب ومش حتتكلف مصنعيه كتير اما غرف الخدمات تقدر انت تنفذهم بأقل التكاليف وافضل الديكورات من غير شركه تطلع منك مصلحه
ده بالنسبه للتأسيس

بالنسبه للتشغيل حضرتك اهم حاجه الدعايه والخدمات شويه اعلانات على النت والجرايد الدعائيه وتجيب تلاجات عصائر ومياه فى المكان وكخدمه افضل لو تقدر تتفق مع شخص معاه عربيه فان انه فى حاله احتياج اشخاص لوسيله مواصلات توفرهالهم بمقابل معقول حتكون تغلبت على البعد النسبي للمسافه لانك حتتعامل مع شباب مش حيفرق معاهم المسافه طالما فى وسائل مواصلات وخدمات كويسه

بس خللى بالك الموضوع برضه الشغل فيه مواسم يعنى فى الصيف غير الشتاء وشهر رمضان غير باقى الشهور
ادرس الموضوع وقلل التكاليف وابتدى وواحده واحده الموضوع لو مشي ابدأ طور ولو لا قدر الله ممشاش تقدر تأجر الارض لحد او تبيع الاصول الثابته وتقلل خسايرك
تحياتى .