عايز نصيحتكم فى مشكلة حصلت وانا مأجر عربية

**Mody2500** · 17-09-2015 12:36 PM

انا اجرت عربية من شركة عالمية طوال فترة اجازتى ووقت الايجار تم الحجز على مبلغ 650 دولار فى الفيزا حسب الشركة 150 لو حصلت مخالفات و 500 لو حصلت حوادث بحيث ان ال 500 دولار هو الحد الاقصى اللى بدفعه فى حالة ال total loss بالاضافة ان المسئول عن التأجير قالى لو حتى البربريز بتاع العربية اتكسر فهو ال 500 دولار برضو لان تمنه آلاف

بعد ماستلمت السيارة حصل تجريح فى جانب اثناء مرور عربية تروسيكل بحيث ان الباب اتخدش وحصل ان مكان الخدش اتعلم على الباب والصاج دخل لجوه وكمان اتخدشت العتبه والصاج اتعوج

ده غير بعد ماركنت تانى يوم العيال اللى بتمشى بالمسامير خدشت الباب والرفرف
وبعدها بيومين لاقيت بقايا حبر جاف على شنطة العربية
رحت لسمكرى قالى محتاجه تتعمل على السخن مينفعش بارد
والبوهيجى قالى هتتكلف على الاقل بويه 700 جنيه غير شغل السمكرى ولما عرف انها ايجار قالى حرام وحاول تتفق مع المكتب

من خبراتكم ايه المفروض اعمله دلوقتى وخصوصا اننا داخلين على العيد والوقت ضيق جدا وهاسلم العربيه بعد العيد مباشرة
خايف اسلمها للمكتب ياخدوا ال 500 دولار كاملين

**pepo2011** · 17-09-2015 12:43 PM

لا سيبهم يا خدو 500 دولار لانك اساسا غير مصرح ليك بعمل شغل في العربية بنفسك وحضرتك بتقول خبط وعوج وتجريح باب وجنب وعتب وشنطة يعني 500 دولار كويس واشتري دماغك طبعا حاول تفاصل معاهم لكن مفيش وقت عندك لعمل الكلام ده وتاكد انك مش هاتعرف تغلب او تضحك علي مكتب ايجار ابدا

**K_E** · 17-09-2015 01:13 PM

انا كمان رأيي تسيبلهم ال 500 دولار ولو حسبتها انت الكسبان
سمكره وعطله غير انك مأجر العربيه يعني وقتها بفلوس وتكاليف الشغل وكمان ممكن جداً لما تروح يكتشفوا انك عملت كده ويلزموك بال 500 دولار برضه

**Mody2500** · 17-09-2015 03:21 PM

المشاركة الأصلية كتبت بواسطة k_e

انا كمان رأيي تسيبلهم ال 500 دولار ولو حسبتها انت الكسبان
سمكره وعطله غير انك مأجر العربيه يعني وقتها بفلوس وتكاليف الشغل وكمان ممكن جداً لما تروح يكتشفوا انك عملت كده ويلزموك بال 500 دولار برضه

ياجماعه يعنى اؤجر العربية اسبوعين ب 600 دولار تقريبا وادفعهم زيهم علشان خدوش
ياترى مفيش اى حل تانى !!

**MOTOR HEAD** · 17-09-2015 03:45 PM

مش انت اللى كنت موافق على الشرط ده من الاول و لا حد غصبك !!

**دكتور خالد** · 17-09-2015 04:58 PM

الاعضاء عندهم حق فى كل كلمة قالوها

**Mody2500** · 17-09-2015 05:17 PM

المشاركة الأصلية كتبت بواسطة motor head

مش انت اللى كنت موافق على الشرط ده من الاول و لا حد غصبك !!

ياخى انت محسسنى انى باحاول استهبل عليهم او انصب على شركة الايجار
انا كنت عايز اؤجر عربية فى اكتر حاجه مضمونه فى مصر ومفيهاش تمضى على ايصالات امانه بكامل مبلغ العربية زى باقى المكاتب التعبانه دى

وكمان انا اجرت قبل كده بره مصر ومفيش الكلام ده كله حتى مبلغ التأمين مايعادل 250 دولار فى عربيات اعلى بكتير من اللى هنا

**aymanshebl** · 17-09-2015 06:43 PM

والله الواحد خايف يقولك صلحها المكتب يكتشف الكلام ده و بعدين تغرم مبلغ التامين زاد تمن تصليحك ليها احسن شى قولهم على اللى حصل بامانة و حاول تفاصل فى مبلغ التامين و ان كنت اشك انهم هيخفضوه

**moha sasa** · 17-09-2015 08:02 PM

- ريح دماغك وسيبلهم ال 500 عضمة بتاعتهم.

**K_E** · 17-09-2015 08:44 PM

المشاركة الأصلية كتبت بواسطة mody2500

ياجماعه يعنى اؤجر العربية اسبوعين ب 600 دولار تقريبا وادفعهم زيهم علشان خدوش
ياترى مفيش اى حل تانى !!

حاول تتفاهم معاهم شوية وتقولهم انه ممكن انت تصلحها على حسابك وتدفعلهم 100 دولار مثلاً
لكن حتى لو دفعت ال 500 دولار ده حقهم حسب الاتفاق واريحلك بكتير لو كنت ماضي وصل امانه