مهندس طيران و كلية ظباط التحصص .. محتاج اهل الخبره

**mohanad elsaye** · 17-09-2015 10:39 PM

السلام علكم
انا لسه متخرج طازه من هندسة طيران القاهره .. انا عارف ان اسم طيران ممكن يخض كتير منكم ان ده المستقبل كله وبتاع .. ممكن يكون صح بس مش هنا للاسف الكلام ده بره
هنا عشان اشتغل في مجالي اما في المطار ودي محتاجه واسطه محترمه وشوية كورسات هتقف عليا بمبلغ محترم .. او اكمل في الجيش .. وعشان كدا جاي اسألكم

ايه رأيكم في فكرة ظباط التخصص لمهندس طيران تحديدا .. وبشكل عام .. وياااااريت لو حد عنده احتكاك بالوسط ده يديني فكره عشان انا ابيض .. من حيث المستقبل والخبرات وفعلا ممكن اخش ماشتغلش في حاجه تديني خبره .. والفلوس طبعا والاجازات .. ولا بلاش منها خالص وادور على فرص تانيه
فكرة السفر ملغيه بالنسبالي للاسف لأسباب عائليه .. عالاقل الكام سنه الجايين دول
محتاج رأي خبير لأني بصراحه محتار .. ناوي اصلي استخاره بس برضو من غير معلومات كافيه يبئا ملوش لزمه

وشكرا مقدما :)

**Omar.Shawki** · 17-09-2015 11:14 PM

انا هندسة طيران من 2006 ومعايا بيزيك ورخصة بطراز ايرباص 320 وخبرة سنتين فى القوات الجوية ضابط احتياط وعملت كل حاجة وقدمت فى كل شركات الطيران فى مصر وفى مصر للطيران مرتين وفى الاخر بياخدوا بتوع ميكانيكا عادى
انا والله مش بحبطك يمكن الوضع دلوقتى اتغير بس نصيحة لو مش معاك واسطة كبيرة جدا جدا فى مصر للطيران
كمل ضباط متخصصين وربنا يوفقك

**ahmed_eng2001** · 17-09-2015 11:27 PM

الاول مبروك التخرج .....

اهم حاجة فى الموضوع ده ... نصيبك حتاخده .. و رزقك حتشوفه ... لا تقلق من هذه الناحية ....

و زى ما العضو الفاضل بلغ حضرتك ....انت محتاج واسطة قوية علشان تدخل مصر للطيران .... و محتاج واسطة قوية تانية علشان تتعين فى حتة كويسة فى مصر للطيران ... علشان فيه حتت كدة بيعتبروها .... دفن ... زى الابحاث .. و عمرة الوحدات

لو انت حابب تكمل فى الجيش ... اتكل على الله و كمل .... و بالمناسبة .. ده مش بمزاجك ... ساعات بيكونوا عاوزين .. و ساعات مش بيكونوا عاوزين ...
فيه ناس زمايلنا كملوا ظباط فى الجيش ... و الحمد لله الناس كويسة و مبسوطين
استخير ربنا و لا تقلق

مين رئيس القسم السنة دى ؟؟ مين لسة عايش من دكاترة الايرو ؟ و مين بيدرس propulsion ؟ مين فى structure ؟ د هانى نجم لسة عايش ؟

**ahmed_eng2001** · 17-09-2015 11:31 PM

المشاركة الأصلية كتبت بواسطة omar.shawki

انا هندسة طيران من 2006 ومعايا بيزيك ورخصة بطراز ايرباص 320 وخبرة سنتين فى القوات الجوية ضابط احتياط وعملت كل حاجة وقدمت فى كل شركات الطيران فى مصر وفى مصر للطيران مرتين وفى الاخر بياخدوا بتوع ميكانيكا عادى
انا والله مش بحبطك يمكن الوضع دلوقتى اتغير بس نصيحة لو مش معاك واسطة كبيرة جدا جدا فى مصر للطيران
كمل ضباط متخصصين وربنا يوفقك

حضرتك شغال فى المجال و لا سبته ؟

خسارة ال 320 ... شغالة كويس اوى ..... و انا عاوز اقولك ال 737 شغالة احسن من ال 320
يااااه فكرتنا بالذى مضى

**mohanad elsaye** · 17-09-2015 11:51 PM

هوا المنتدى كله مهندسين طيران هههههه .. انا مأخدتش غير البيزك بس ومستكتر ادفع اكتر من كدا بصراحه

بالنسبه للقسم .. عايز اطمنك لسه بحطة ايدك .. هاني نجم بيطلع في عين الناس .. ومدبولي محدش بيفهم منه حاجه .. وعلي هاشم لسه صوتو واطي ومحدش بيسمعه .. والمستكاوي لسه اسطوري

رئيس القسم السنه اللي فاتت د/ايمن .. والسنادي د/فاروق عويس .. اكيد تعرفهم الاتنين

**Mecha** · 18-09-2015 12:32 AM

المشاركة الأصلية كتبت بواسطة ahmed_eng2001

الاول مبروك التخرج .....

اهم حاجة فى الموضوع ده ... نصيبك حتاخده .. و رزقك حتشوفه ... لا تقلق من هذه الناحية ....

و زى ما العضو الفاضل بلغ حضرتك ....انت محتاج واسطة قوية علشان تدخل مصر للطيران .... و محتاج واسطة قوية تانية علشان تتعين فى حتة كويسة فى مصر للطيران ... علشان فيه حتت كدة بيعتبروها .... دفن ... زى الابحاث .. و عمرة الوحدات

هي العمرات بقت دفن حاليا . ياريت الواحد يعتر فيها او الابحاث راحة دماغ ويروح البيت بدري وقبض معقول واجازات والدنيا تبا مريحه.

**ahmed_eng2001** · 18-09-2015 12:34 AM

المشاركة الأصلية كتبت بواسطة mohanad elsaye

هوا المنتدى كله مهندسين طيران هههههه .. انا مأخدتش غير البيزك بس ومستكتر ادفع اكتر من كدا بصراحه

بالنسبه للقسم .. عايز اطمنك لسه بحطة ايدك .. هاني نجم بيطلع في عين الناس .. ومدبولي محدش بيفهم منه حاجه .. وعلي هاشم لسه صوتو واطي ومحدش بيسمعه .. والمستكاوي لسه اسطوري

رئيس القسم السنه اللي فاتت د/ايمن .. والسنادي د/فاروق عويس .. اكيد تعرفهم الاتنين

يا نهاااااار
ربنا يديهم الصحة الاول علشان منقرش عليهم ....
لما تخرج للحياة العملية ان شاء الله ... حتعرف مثلا ان هانى نجم كان انسان محترم جدا ... على هاشم من اكثر الشخصيات الى ممكن تقابلها احتراما فى حياتك ... ده غير علمه .. ربنا يزيده

ايه اقصى حاجة ممكن دكتور يعملهالك ؟؟؟؟ يسقطك فى مادته ؟؟؟ ايه يعنى !!!! لما تخرج للحياة حتعرف ان الدكاترة مش مؤذيين اوى زى ما كنا فاكرين

هو كدة القسم مش بحطة ايدى اوى انا قديم شوية..... مين د ايمن ؟ و مين د فاروق عويس ؟؟

انت اخدت البيزك على حسابك ؟؟؟ لو معندكش مانع ... اعرف اخدتها فين و بكام
انا اخدت البيزك ب 4000 جنيه فى مصر للطيران :) كان معمول لنا تخفيض

المشكلة هى الشركة الى حتعينك .... لو اخدت فرقة الطيارة بيكون ليك اولوية عن الى مش معاه الفرقة ... لو بتتكلم عن مصر للطيران ... الاولوية للى معاه واسطة طبعا
للأسف انا منقطع عن المجال من فترة طويلة ... بس سمعت ان فيه شركة جديدة اسمها نسما .. و فيه المصرية ... و دى قديمة شوية ... و فيه BAS حدمات البترول الجوية و كان فيه AMC

حضرتك عارف السكة ؟ بيزك ... و بعدين ojt الى هو التدريب العملى بعد البيزك ... و بعد كدة تمتحن و تصدر without type rating و بعدين تخش على الطراز ... تاخد الكورس و تمتحن و تصدر رخصة الطراز ده ...
و ربنا معاك

**ahmed_eng2001** · 18-09-2015 12:42 AM

المشاركة الأصلية كتبت بواسطة Mecha

هي العمرات بقت دفن حاليا . ياريت الواحد يعتر فيها او الابحاث راحة دماغ ويروح البيت بدري وقبض معقول واجازات والدنيا تبا مريحه.

لا يا باشا .... عمرة الوحدات حاجة .... و عمرة المحركات حاجة تانية
عمرة الوحدات ... الى بيعمروا فيها وحدات الفرامل Breaks ..و سترات النجاة و صيانة العجل ... موال كدة ... بس مفيهوش فرق ( جمع فرقة ) .. و لا محطات ... و لا بدلات .. و لا ترقيات كويسة ... بيسموه .. مهندس تحت السلم

الابحاث شغلها اكثر من رائع ... للى مهتم بالنظريات و البحوث .... و بالطبع القسم ده مفيهوش فلوس كتير ... و محدش بيحب يشتغل فيه بالرغم من انه هو ده قلب اى شركة طيران .. و المفروض القسم ده الى يحدد فى النهاية .. نشترى ال 320 و لا 737 .... و انهى اقل فى الاعطال و اكثر كفاءة ... شغل معقد و اكثر من رائع ... بس مفيهوش فلوس كتير

**Mecha** · 18-09-2015 12:50 AM

المشاركة الأصلية كتبت بواسطة ahmed_eng2001

لا يا باشا .... عمرة الوحدات حاجة .... و عمرة المحركات حاجة تانية
عمرة الوحدات ... الى بيعمروا فيها وحدات الفرامل breaks ..و سترات النجاة و صيانة العجل ... موال كدة ... بس مفيهوش فرق ( جمع فرقة ) .. و لا محطات ... و لا بدلات .. و لا ترقيات كويسة ... بيسموه .. مهندس تحت السلم

الابحاث شغلها اكثر من رائع ... للى مهتم بالنظريات و البحوث .... و بالطبع القسم ده مفيهوش فلوس كتير ... و محدش بيحب يشتغل فيه بالرغم من انه هو ده قلب اى شركة طيران .. و المفروض القسم ده الى يحدد فى النهاية .. نشترى ال 320 و لا 737 .... و انهى اقل فى الاعطال و اكثر كفاءة ... شغل معقد و اكثر من رائع ... بس مفيهوش فلوس كتير

يعني الوحدات شغل عفشه وقطرة البوشباك ,اعذروني انا موش طيران .القصد يعني شغلانه ميري وقبض معقول ومريحه .يبا تحت السلم تحت السلم.

**ahmed_eng2001** · 18-09-2015 12:57 AM

طالما قلت البوشباك يبقى ليك فى كار الطيران كمان :) ... من ناحية مريحة .. ايوة طبعا مريحة .. و بتتعامل مع ماكينة ب 100 مليون دولار ( الطائرة ) بالميت .. و مش بتعمل حاجة بايدك ... و رعاية صحية و عربية تاخد و تجيبك من البيت

شكلك تعبت و لا ايه ؟1 .... ده انت لسة مشوارك طويل