البورصة النهاردة كسرت حاجز 4000 نقطة

**شريف** · 20-11-2008 11:49 AM

السلام عليكم

البورصة النهاردة كسرت حاجز 4000 نقطة
دة معناة اية
والانهيار دة اية نتيجنة؟
لان ايقاع البورصة سريع و بيعكس حالة السوق رايح لفين للمواطن العادى بالنسبة لنزول اسعار
السلع مهما كان نوعها

**AHMEDCAR** · 20-11-2008 12:41 PM

متوقعله دعم عند 3800 بس انا من رائى ان دى مش نقط دعم دى نقط دعك

**ahmed76** · 20-11-2008 12:45 PM

المشاركة الأصلية كتبت بواسطة AHMEDCAR

متوقعله دعم عند 3800 بس انا من رائى ان دى مش نقط دعم دى نقط دعك

مع انى مابفهمش فى البورصة بس ضحكنى تعليقك

**AHMEDCAR** · 20-11-2008 12:48 PM

نقط الدعم دى معناها ان المؤشر هايوصل للرقم ده و هايسند عنده او هايقف عنده لان الاقتصاد فى البلد هايساعد لكن بالمنظر ده نقدر نقول جبتك بعبد المعين تعنى لقيتك يعبد المعين عايز تتعان

و على فكره كان متوقع من اول الاسبوع ان المؤشر يوصل ل 3800

**mada121977** · 20-11-2008 01:28 PM

المشكله ان المؤشر ده لا يمت للواقع بصله يعنى غالبيه الشركات كسبانه وعندها ارباح كبيره تيجى شركه زى اوراسكوم دى تنزل تلاقى الدنيا كلها وقعت وده طبعا اكبر خطأ
بلد تقرف

**شريف** · 20-11-2008 02:50 PM

المشاركة الأصلية كتبت بواسطة mada121977

المشكله ان المؤشر ده لا يمت للواقع بصله يعنى غالبيه الشركات كسبانه وعندها ارباح كبيره تيجى شركه زى اوراسكوم دى تنزل تلاقى الدنيا كلها وقعت وده طبعا اكبر خطأ
بلد تقرف

يعنى هبوط قيمة السهم لا يعنى بالتبعية خسائر للشركات
وبالتالى تنزيل فى قيمة المنتج؟

**mada121977** · 20-11-2008 03:00 PM

المشاركة الأصلية كتبت بواسطة شريف

يعنى هبوط قيمة السهم لا يعنى بالتبعية خسائر للشركات
وبالتالى تنزيل فى قيمة المنتج؟

المؤشر بتاعنا بيتحكم فى صعوده وهبوطه مجموعه من الشركات القياديه اشهرها شركات اوراسكوم بتاعه ساويرس يعنى لما الشركات دى تنزل المؤشر ينزل معاها والعكس

**Samir Elshahawy** · 21-11-2008 12:22 AM

المؤشر بتاعنا بيتحكم فى صعوده وهبوطه مجموعه من الشركات القياديه اشهرها شركات اوراسكوم بتاعه ساويرس يعنى لما الشركات دى تنزل المؤشر ينزل معاها والعكس

حتي في دي كمان الكبار هما اللي بيتحكموا فيها مش أليات السوق و العرض و الطلب ؟

بلد غريييييبة و الله

**Miss_Pharma** · 21-11-2008 05:10 AM

طبعا انا مجرد اقرا كلمة بورصة ولا اسعار ولا اقتصاد بروح ناطة في الموضوع على طول
طبعا زي ماقال زميلنا احمد .. المفروض ان احنا واقفين على دعم 3800 ..
والله انا بقى عايزة اقول ان .. 3800 من 3500 ل 3300 مش فارقة ..
فعلا مش فارقة لان مؤشر السوق المصري وهو نازل مبيعرفش ابوه .. دعم بقى مش دعم .. مبيشوفش قدامه .. وده طبيعي
واي طلعات قادمة مش هتكون الا طلعات تصريفية لاختبار نقاط مقاومة قريبة ومن ثم الهبوط مرة اخرى .. وعشان كده قلت في موضوعي ان السوق ده سوق مضاربات ومحترفين فقط .. وهيفضل الوضع كده حتى نهاية يناير القادم اللي بتوقع انه هيحمل موجة هبوط عنيفة جدا طبقا للتحليل .. يعني نبتدي نفكر ندخل على ال valentine وكل سنة وانتم طيبين ..

شكلهم عايزيين يصفروا العداد عشان يبدأوا نظام التداول الجديد على نضافة :k44:
واللي فاضل مش قد اللي راح .. الا اذا كانوا ناويين يعملوا قيم سالبة للمؤشر ..

وبالنسبة لموضوع ان سعر السهم بيعبر عن قوة الشركة او سعر السلعة .. ده مش صحيح ..

وعلى فكرة بقى .. في اسعار سلع كتير نزلت .. ولكن المواطن المصري ولا هيحس بيها لسببين الاول انه نزول طفيف في سعر الطن وبالتالي مش هيبان قيمته بالنسبة للمستهلك
والسبب التاني ان احنا في مصر ..

وربنا على الظالم والمفتري ..
وشكرا

**شريف** · 21-11-2008 11:16 AM

شكرا على التحليل
بس انا عارف واحد عمال يشترى فى هيرمس كل يوم من الخميس اللى فات
اشترى الخميس على 23 و نصف
وكل يوم يشترى و السهم عمال ينزل لغاية امبارح اشترى على 14 و كسور و مبعش حاجة خالص
انا مش فاهم هو بيعند كدة ليه يمكن عندة اخبار سارة وحدش يعرفها؟
عايز اعمل ذية بس خايف اية رايكم؟