تقرير عن بيجو 508 2016 هاى لاين بعد 3500كم

الحمد لله استلمت بيجو 508 2016 هاى لاين لون فيراني بعد وقت طويل من المقارنة مع الأوبل اننسيجنيا وفورد فيوجن وده انطباعي عنها بعد 3500 كم:
الشكل العام:
طبعا الشكل العام مبهر ومودرن جدا والدواخل من مواد ذات جودة عالية
الموتور والتسارع:
العربية 1598سي سي 163 حصان والتسارع بتاعها ممتاز تقريبا عملت معايا 10.2ث من 0:100كم
الحاجة اللي مضايقاني هى:
- أن الموتور على السرعة البطيئة استجابته مش سريعة وزي ما يكون (بيعزم) العربية بتبطئ جزء من الثانية وبعدين تفتح (المشكلة دي بتختفي لو خليت نمط السواقة sport لكن خايف ده يأثر على استهلاك البنزين أو العفشة لو خليت نمط السواقة سبورت علطول)
-صوت الموتور عالى سنة بسيطة وفيه ترتيلة وعامل زي ما يكون موتور ديزل.

استهلاك البنزين بتاعها حتى الأن متوسط 9:9.5 لتر لكل 100 كم بالتكييف مع أني نادرا ما أمشى في الزجمة ومعظم مشاويري طوالي. أنا يحط بنزين 92 عادي من غير أي مشاكل.

العزل: جيد لكن بعد 140 كم/س بتسمع صوت الهوا والكاوتش على الأرض.

العفشة: ممتازة ومش بتحس بالمطبات وقوية (لسه واكل مطب على 130 وربنا ستر)

الصاج : ضعيف إلى حد كبير لدرجة ان أي حكة بسيطة بتعمل مشكلة.

الإضاءة: ممتازة وعلشان أتوماتيك مريحة جدا في الملفات.

التكييف: جيد جدا لكن مش ممتاز وحسيت أول ما استلمت العربية أن الباب بتاعي بيسرب هوا التكييف لبرة وبلغت التوكيل لكن كانوا مستغربين جدا وتقريبا معرفوش يعملوا إيه وقالولي جربها.

التوكيل: زرته مرة واحدة عند 2500 كم والتوكيل تعبان جدا لدرجة أني بسأل أي مهندس عن حاجة في العربية مش عارفين أي حاجة وكانوا عاوزين يسلمولي العربية من غير غسيل. غير حاجة مهمة جدا العربية دي ملهاش أي كماليات في التوكيل سألت على كسوة للكراسي قالولي استخدم الأصلية ولما يبوظ تعالى واحنا نركب لك فرش أصلي جديد بحوالي 2600جنيه. ومفيش دواسات ولا شماسات ولا كفر للدركسيون ولا للعربية ولا أي حاجة علما بأن الكلام ده كان متوفر جدا في توكيل نيسان.

انطباعي العام عن العربية ممتاز وبتدي برستيج عالي وسواقتها ممتعة إلى أقصى درجة غير ان نظام Entertainment صوته رائع ومفيد جدا للتركيز على الطريق.

أنا في انتظار تعليقات أسود بيجو وتجاربهم مع 508 2016

الف الف مبروك ...... ربنا يباركلك فيها ويديك خيرها ويكفيك شرها

بالنسبه لصوت الموتور: ماتستغربش الصوت ده من الكاتينه الجنزير بتدي صوت زي مواتير الديزل
ياريت تجرب ولو مره واحده انك تحط بنزين 95 ......... وحتلاحظ الفرق في السحب والتوفير

ممكن اعرف مقارنتها بالنسبه للسيتروين سي 5

شكرا للتواصل

ربنا يبارك يا باشا
دايما بشوف 508 مختلفة عن المنافسين

ألف مبروك ربنا يباركلك فيها ويبعد عنك شر الطريق ويحفظك من كل سوء
عندي سؤالين :
1/ ممكن تصور العربية عشان عايز اعرف اللون الفيراني شكله ازاي بالضبط لاني روحت فرع صلاح سالم ومكانش عندهم اللون دا وهل هو اسمه رمادي شارك ؟
2/ هل كرسي السائق يحتوي على ميموري سيت memory seats
http://s24.postimg.org/l8ehlvj8h/RYN_3302.jpg

ومبروك مره ثانية

متشكر جدا يا شباب على التوضيحات وبالنسبة للأسئلة:

- أول تفويلة لما أستلمت العربية كانت 95 وفعلا كان في فرق لكن في حدود 10:15% بس الفرق مش مهول.

- أنا مركبتشC5,ولا جربتها للأسف لكن من قراءتي في الموقع أنها تقريبا نفس العربية مع اختلاف الدواخل والعفشة الأمامية wishbone بدلا من ماكفيرسون في البيجو. بس البيجو برستيجها أعلى وشكلها مودرن أكتر غير أني أعتقد أن إعادة البيع بتاعتها أعلى غير انتشارها الكبير مقارنة بالسيتروين.

- اللون فعلا جراى شارك وححاول أصورها إن شاء الله.

- الكراسي في الهاي لاين مفيهاش ميمورى لكن فقط ظبط اتدعيم فقرات الظهر هو فقط اللي كهرباء.

تعقيبا على موضوع الصاج أتوبيس نقل عام ظبط الرفرف الخلفي وجزء من الباب لكن ححاول أدخل التوكيل وحقولكم على مستوى السمكرة إن شاء الله.

ايه ده .......... هاي لاين والكرسي يدوي وليس الكتروني !!! دي سعرها معدي 300 الف ج !!
هو في موديل اعلي من الهاي لاين , يعني توب لاين مثلا ولا مش بينزل مصر

الف الف مبروك
ربنا يباركلك فيها ويديك خيرها ويكفيك شرها

الف مبروك على العربيه بس اسمح لي اعلق على بعض النقط بحكم امتلاكي لها
بالنسبه للموتور الاداء هيتحسن عن كده بكتير و خصوصا بعد تغيير الزيت اول مره و التسارع بتاعها من 0-100 عمل ببنزين 92 8.6 ثانيه و فيه فيديو بالكلام ده موجود على جروب الفيس بتاع العربيه اللي اتشرف اكون الادمن بتاعه
استجابة العربيه تحفه بتطير من لمسه و نادرا ما بحطها على ال s الا لو هشد مع عربيه تربو زيي و حتة الاستجابه السريعه بتديك متعه في السواقه مش موجوده في عربيات تانيه تربو
الصاج بتاعها محمل و كويس جدا و مستغرب من ملحوظتك الا لو بتركن عمودي و ولاد الحلال اللي بيركنوا جنبك بيقوموا بالواجب
بالنسبه للتكييف انا بظبطه على 22 في عز الحر مع العلم ان فيه لغاية 14 يعني لسه قدامي 16 درجة بروده اكتر مش محتاجها عشان بينزل بالنص درجه

العربية هاي لاين لكن في توب لاين وهي دي اللي سعرها معدي 300 ألف.
بالنسبة للصاج أنا لاحظت أن الصاج في التلت التحتاني أضعف بمعنى أن كل ما تعلى الصاج بيتقل.
https://www.dropbox.com/sc/6ox6syrw3...8n_B7HpWnCzdca

اقتباس:

---

المشاركة الأصلية كتبت بواسطة valiant73

العربية هاي لاين لكن في توب لاين وهي دي اللي سعرها معدي 300 ألف.
بالنسبة للصاج أنا لاحظت أن الصاج في التلت التحتاني أضعف بمعنى أن كل ما تعلى الصاج بيتقل.
https://www.dropbox.com/sc/6ox6syrw3...8n_b7hpwnczdca

---

الف مبروك العربيه، هي حاليا ٣ فئات انت معاك الفئه التانية ولا الثالثه؟

الفئة الثانية

الف مبروك