الموضوع: للمهندسين، قسم ميكانيكا أو قسم حاسبات وإتصالات؟

مساء الخير.

سؤالي موجه ومفتوح لأراء الناس كلها بس الأخص المهندسين،

دلوقتي انا في كلية هندسه جامعه الاسكندرية وخلصت السنه الإعدادية بتقدير جيد جدًا و مجموع 81%.

كنت عايز قسم كمبيوتر في التنسيق بس جالي قسم عمارة ولأسباب طبيه مش هقدر ادخله.

عندنا دلوقتي حاجة في الكلية إسمها برامج علمية متخصصة، ودي بتدرس فيها قسمين مش قسم واحد "طبعًا أقسام مرتبطة ببعض." (حاجه زي قسم خاص، و شغال بنظام الساعات المعتمده ودي ميزة.)

و دي الأقسام بتاعتها:

1- برنامج ھندسة الغاز والبتروكيماويات
2- برنامج الھندسة الكھروميكانيكية
3- برنامج ھندسة الحاسبات والاتصالات
4- برنامج ھندسة العمارة والتشييد

انا حابب مجال الحاسبات والاتصالات، في القسم دا انت بتدرس تخصص كمبيوتر و تخصص اتصالات من المواد الي بتاخدها بروجرامنج و داتا ستراكتشر و الجوريزم و لوجيك و سيركتس


ده بالنسبة للبرامج، أما بالنسبه لعام ف انا ممكن احول ميكانيكا.

بالنسبة لميكانيكا بقى، القسم انا مش ميال ليه أوي و لدراسته بصراحة، بس مش اني بكرهه او مش عاجبني خالص يعني.

انا شايف مميزات البرامج:
- ساعات معتمده، بدرس قسمين مع بعض، المنهج اخف من عام شوية.

عيوبها:
مش ضامن الشغل بشهاده قسمين؟! أنا اسمع ان اتصالات شغلها بقى وحش جداً..


مميزات ميكانيكا:
شغلها كتير ومجالاتها واسعه جدا جدا و ممكن اشتغل في مجال السيارات ودي حاجه حلوة.

عيوبها:
القسم دراسته صعبه وسخيفه نوعًا ما لانك بتدرس مواد ٤ تخخصات فيها وتتخصص اخر سنة

ياريت ارائكم وخصوصا خصوصًا عن مجالات الشغل في القسمين!

بص بالنسبه للشغل فى اى مصنع او شركه فى اى مجال انتاج لاى حاجه فى الدنيا فى قسم التشغيل و اقسام الصيانه
( صيانه الميكانيكيه - صيانه الكهرباء - صيانه الاجهزه و التحكم) يعنى محتاجين مهندسين ميكانيكا و كهربا قوى و اتصالات و تحكم
دا شىء اساسى لاى صناعه فى الدنيا اما التشغيل فده بيكون حسب الصناعه اه و عامه بيكونوا ميكانيكا و كهربا باور
ركز على التالت اقسام دول بس و الباقى محصل بعضه
الشغل داخل الاقسام ديه بيعتمد على خبرتك فى مجال الصناعه اللى ابتديت فيه
عدد مهندسين قسم الاجهزه دايما بيقى اكتر لان الشغل فيه بيعتمد بشكل مباشر على خبره المهندس مع اجهزه التحكم الموجوده و اللى هى دائمه التطور و التغير
اما الميكانيكا و الكهربا فيكون دور المهندس فنى توجهى للفنين اكتر عن الشغل اليدوى بنفسه
اما بالنسبه للدراسه و الشغل فى الكليه بالنسبه للشغل بره اساسيات مش اكتر و اللى انت هاتدرسه فى الكليه
الدنيا بره فى الشغل سابقه بمراحل تكنولوجيه كتير
و بيقى الاعتماد اكتر على التدريب اللى بتخده فى الشركه بعد ما ربنا يكرمك و تتخلص من لعنه كلمه مهندس حديث التخرج
و بصراحه اكتر الشغلانه باظت و العمليه بقت وحشه اوى بسب التعليم الخاص اللى فتح الدنيا خالص و كتر الاعداد زياده عن قدره السوق و نموه و ندره المصانع الجديده فى البلد و ده غير النقابه اللى فاتحه الباب على اخره و الصراحه ان مش شايف المسقبل للمهنه عامه كويس
بس ربنا معاك و يهدى الحال