الموضوع: أسطورة الـ100 ألف كيلومتر... هل لها أصل؟؟؟

أتفق مع حضرتك تماما.. وكلامك بيأكد الفكرة اللي عايز أوصلها..

تحياتي لك


...

المشاركة الأصلية كتبت بواسطة عبدالله برعى

انا شايف الموضوع ليس تركيز النظر علي اللزوجة فقط ولكن توجد عناصر اخري مهمة اما اللزوجة التي تذكرها حضرتك دي اللزجة العامة او فئة اللزوجة

تغيير الزيت من معدني لتخليقي بناء علي Viscosity class
المذكورة في الكاتالوج او العبوه20w-50مثلا...
ولكن توجد عناصر اخري Viscosity class
Viscosity at 100c
Viscosity at 40
Density at 15 c
Flash point
Pour point
Sulphate وحدتها g/100g
وطبعا الكثافة(Density) وحدتها g/cm3(سم مكعب يشيل كام جرام)
وطبعا اللزوجة (Viscosity) وحدتها mm2/s(كام مم مربع يعدو في الثانية)
وانا شخصيا باضع بعض الاضافات والتركيبات مع الزيت لرفع كفاءتة (وكانت نتيحة اختبارات العادم بعد الاضافات اقل بكثير وال compression زاد بدرجة ملحوظة)
وبناء عليه: لو حنغير الزيت من معدني لتخليقي لابد من توافر المواصفات الفنية لكل زيت ونشوف الفرق بينهم لو متطابق اذن نغير براحتنا بلا شك او تردد ولكن لعدم توافر technical data
غير المنطقي الاعتماد علي اللزوجة فقط او رمز الخدمة
،،،،ولذلك نلاحظ ان بعض المواطنين يغير الزيت الي اخر بنفس اللزوجة ولكن لا توجد كفاءة محسوسة بعد التغيير(بغص النظر عن العوامل الاخري لكفاءة المركبه)
والملاحظ ايضا ان شركات الزيوت يطغي عليها جناح الربح والتجارة ولا توفر بيانات موثوقة وحتي لو وفرت لا توجد الارضية لتثقيف المواطن علي الزيوت وصيانتها
..النقطة الاخري نقطة 100 الف كم اظن ليست دوبا من الخيال ولكنها واقع في السيارات الشعبية بعد ال100 الف كم الكفاءة تقل بناء علي ان كل قطعه لها عمر افتراضي
ولكن رايي. الشخصي انه في عدم مراعاة الصيانات الضروريه والسوائل تظهر المشاكل في السيارة كالنار في الهشيم.. المقصود انك بعدم الصيانات واتباع الارشادات تقلل من العمر الافتراضي للاجزاء المتحركة(الموتور) ومعروف ميكانيكيا ان اي جزء متحرك له عمر افتراضي.
وبعض السيارات تصل الي 250 الف وصحتها تمام ولا تعاني من اي امراض مزمنة بسب المحافظة..
،،،اخيرا دا اجتهاد شخصي من حكم العمل في قطاع البترول
تحياتي للمهندس احمد البرعي
نتمني منك المزيد لاثراء وتكثيف المعلومات

أخي العزيز عبدالله برعي..

أشكرك على مشاركتك .. والحقيقة إنها فعلا بتثير تساؤلات كتير عند معظم الناس...


وعندي تعليقات كتير حابب أقولها:

أولا.. أكواد اللزوجة معمولة علشان تسهل على الناس مسألة قيم اللزوجة الحقيقية... خصوصا إن فيه كذا وسيلة لقياس اللزوجة زي ما حضرتك قلت..

وفي الحقيقة... أي كود من دول هو عبارة عن مواصفة... والمواصفة دايما بتدي قيمة أساسية ± سماحية أو ممكن تحط حد أدنى للقيمة أو حد أقصى ...

وبالتالي فمن المستحيل تلاقي تلاقي زيتين زي بعض تماما... ده حتى نوع الزيت الواحد لا يمكن تلاقي فيه "لوط" زي التاني... بس ما دام المنتج جوه حدود المواصفة.. يبقى المنتج كده "مطابق للمواصفات"... وبالتالي من المفترض إننا نلاقي المنتجات قريبة جدا من بعض من ناحية مواصفاتها.

طبعا... كل شركة بتعمل مواصفة خاصة بيها علشان تنتج منتجاتها عليها... بس لازم في نفس الوقت تلتزم بالمواصفة المعتمدة عالميا.. وإلا مش هتاخد تصنيف.


بالنسبة لدرجة الحرارة اللي بتتقاس فيها اللزوجة زي 100 و 40 .. فدي أنا كنت جاوبت من فترة على أسئلة شبيهة في موضوع http://www.nilemotors.net/Nile/466047-a.html

واسمحلي أقتبس منه علشان أوضح المعلومات أكتر..

المشاركة الأصلية كتبت بواسطة borio1704

اللزوجة باختصار بيعرفوها بإنها مقاومة المائع (السائل أو الغاز) للتغيير في الشكل ... ودي بتظهر في السوائل في شكل "التخانة".




عموما.. هحاول أتكلم عن المفاهيم الأساسية .. ومش عايز أدخل في معادلات لإن الموضوع فعلا كبير.. ويعتبر أحد المواضيع الأساسية في علم الموائع (Fluids).


اللزوجة ليها طريقتين لقياسها حسب وجهة النظر العلمية:


1- اللزوجة الديناميكية

ودي بتتقاس بمقدار حركة المائع مقارنة بالقوة الواقعة عليه لتغيير شكله..

وبتتقاس بوحدة إسمها "بواز" Poise .. ورمزها (P)

1 بواز = 0.1 باسكال.ثانية

والوحدة دي تعتبر كبيرة جدا.. فعادة بتتقسم على 100 ويسموها سنتيبواز (cP)

1 سنتيبواز = 1 ملليباسكال.ثانية

علشان كده.. الوحدة دي مهمة جدا مع العربيات علشان الزيت بيتضخ في الموتور تحت ضغط بمضخة (طلمبة) الزيت... ولازم نعرف الزيت هيتصرف إزاي أثناء الضخ.



2- اللزوجة الكينماتيكية

ودي بتعبر عن مقدار حركة المائع بدون ارتباط بأي قوى أخرى.

ودي ممكن تكون مهمة في العربيات خاصة في الأجزاء اللي بتتزيت بالانسياب الطبيعي للزيت.

بتتقاس بوحدة إسمها "ستوكس" Stokes أو ستوك" Stoke .. ورمزها (St)


1 ستوك = 1 سم مربع/ثانية

وبردو... الوحدة دي تعتبر كبيرة جدا.. فعادة بتتقسم على 100 ويسموها سنتيستوك (cSt)

1 سنتيستوك = 1 مم مربع/ثانية


لو حضرتك مهتم بالتفاصيل العلمية للموضوع تقدر تدخل على الويكيبيديا في الوصلات دي:

https://en.wikipedia.org/wiki/Viscosity
Motor oil - Wikipedia, the free encyclopedia
https://en.wikipedia.org/wiki/Dynamics
https://en.wikipedia.org/wiki/Kinematics



طيب ... إيه بقى موضوع الحرارة؟؟؟


طبيعة المواد كلها إنها بتتأثر بالحرارة... بتتمدد وتنكمش... وممكن لزوجتها تزيد أو تقل مع زيادة أو نقص الحرارة.

أغلب المواد لزوجتها بتقل مع زيادة الحرارة.. والزيوت واحدة منهم.. مع العلم بإن فيه مواد لزوجتها بتزيد مع زيادة الحرارة.. بس ده مش موضوعنا.


المهم..

اللي يهمنا هنا إن اللزوجة علشان نعرف نتعامل معاها هندسيا.. لازم نقيسها في درجة حرارة موحدة علشان نقدر نفرق بينها وبين بعض في الخصائص...


طبعا... الموضوع ده ممكن يجرنا لمسألة إن أداء الزيت هيختلف باختلاف درجات الحرارة اللي بتشتغل فيها العربية.. وإننا لازم نراعي الكلام ده واحنا بنختار لزوجة الزيت المناسب..


ده صحيح... وكان الموضوع ده سبب أساسي في وجود زيوت شتوية (لزوجتها خفيفة).. وزيوت صيفية (لزوجتها ثقيلة)

من هنا ظهرت فكرة الزيوت متعددة الدرجات (درجات اللزوجة) أو Multigrade oils... وكان الهدف منها هو إيجاد زيت يقدر يشتغل بكفاءة عالية في الصيف والشتا...

علشان كده الزيت عليه درجتين لزوجة... الصغيرة تكافئ زيت الشتا (اللي بعدها W).. والتانية تكافئ زيت الصيف.. وده كان أول ما اخترعوه في الخمسينات..




بس كان دايما فيه مشكلة.. إن بردو فيه اختلاف بين أداء الزيت في بداية التشغيل وأداؤه بعد الوصول لدرجة التشغيل المعتادة.


دلوقتي الزيوت متعددة الدرجات بتشتغل في مدى درجات حرارة (حد أقصى وحد أدنى).. والزيوت التخليقية الحديثة تقدر تشتغل كويس في كل درجات حرارة الجو المعروفة على سطح الأرض تقريبا.





ومع ذلك... مازال نظام الترقيم بدرجتين لزوجة متعارف عليه لحد دلوقتي..



حاليا.. درجتين لزوجة الزيت المكتوبين على العلبة بيتقاسوا في درجتين حرارة محددين...


الأولانية هي لزوجة الزيت في أقل درجة حرارة مسموح للزوجة دي بالتشغيل فيها..

وده بيبقى مهم جدا إننا نقيس لزوجته "الديناميكية".. علشان نعرف قدرة طلمبة الزيت على توصيله لكل أجزاء الموتور.


والتانية دايما هي درجة حرارة التشغيل عند 100 °م

وده مهم إننا نقيس لزوجته "الكينماتيكية" .. علشان نعرف قدرته على الانسياب والرجوع مرة أخرى لخزان الزيت (الكارتيرة) علشان يتضخ مرة أخرى لأجزاء الموتور


يعني... لو عندك زيت لزوجته 5W-40 مثلا.. فالـ5 تكافئ درجة اللزوجة المقاسة عند أقل درجة حرارة للجو مسموح للزيت يشتغل فيها ... والدرجات دي كالتالي:
(-35 °م) للزوجة 0W
(-30 °م) للزوجة 5W
(-25 °م) للزوجة 10W
(-20 °م) للزوجة 15W
(-15 °م) للزوجة 20W
(-10 °م) للزوجة 25W

أما الـ40 فدايماً تكافئ درجة اللزوجة عند درجة حرارة 100 مئوية.


ده جدول بيبين الفرق بين مستويات اللزوجة حسب مواصفة SAE J300 (ده اسم مواصفة منظمة الـSAE لدرجات لزوجة زيوت محركات السيارات)





طيب ليه ساعات بنلاقي في مواصفات الزيوت اللزوجة متقاسة على درجة حرارة 40 °م؟؟؟؟

ببساطة .. منظمة الـISO هي كمان عاملة مواصفات للزوجة الزيوت.. وأغلب اللي بيشتغلوا في صيانة الماكينات في المصانع عارفين الزيوت بمواصفات الـISO ... مش بمواصفات الـSAE.

المهم.. مواصفة منظمة الـISO بتقيس لزوجة الزيوت على درجة حرارة 40 °م .. لإن دي درجة حرارة التشغيل المعروفة في أغلب ماكينات العالم..


فملخص الموضوع إن شركات الزيوت بتحط اللزوجة على درجة حرارة 40 °م علشان تبقى زيوتها متصنفة حسب مواصفة الـISO... وعلى درجة حرارة 100 °م علشان تبقى متصنفة حسب مواصفة الـSAE


وعموما.. كل مواصفة بتعمل تصنيفات وأكواد للتسهيل على المستخدمين .. وكل درجة من دول ليها مدى.. يعني حد أدنى وحد أقصى


وده جدول بيعمل مقارنة بين لزوجة الزيوت حسب المنظمات المختلفة




طيب... يهمنا إيه من كل الكلام والدش اللي فوق ده؟؟


أنا كمستخدم... يهمني إن الزيت يكون بمواصفات مناسبة حسب ما مصمم الموتور بنى موتوره عليها.. لإنه اختار قيم الخلوص ونوع المعادن المناسبة بناء على افتراضات.. منها نوع الزيت المستخدم..



وبالتالي.. أنا شخصيا ما يهمنيش قوي غير إن الأكواد الموجودة على علبة الزيت تكون هي نفسها المطلوبة في الكتالوج... إذا ما كانتش أحسن منها.

والمفروض إني أخد فكرة عن إيه الفرق بين الأكواد... وإيه اللي ممكن أعمله لو ما لقيتش الأكواد دي زي الكتالوج.


...

بالنسبة لباقي ملاحظاتك .. فأنا هرد عليها في المشاركة اللي بعدها...



...