الموضوع: أسطورة الـ100 ألف كيلومتر... هل لها أصل؟؟؟

كتير سمعت الموضوع ده من زملا لينا في المنتدى.. خصوصا اللي معاهم عربيات قديمة أو ماشية مسافات طويلة.. تلاقيهم بيدوروا على زيوت معدنية ولزوجتها عالية.. لإن العربية عدت الـ100 ألف كيلو .

بصراحة موضوع الـ100 ألف ده مش داخل دماغي ولا عارف أستسيغه خالص.


هو إيه الحكاية؟؟

بيقولوا إن الزيت التخليقي لا يصلح للسيارات القديمة ... وإن العربية لو مشيت أكتر من 100 ألف فالمفروض يتحطلها زيت معدني .. حتى لو كانت شغالة بزيت تخليقي قبل كده..



ليه يا عم؟؟

علشان التآكل اللي في الموتور خلى الخلوصات كبيرة.. فاحنا لازم نحط زيت تقيل علشان نعوض التآكل اللي حصل !!!

وإن العربية لو شغالة من الأول بزيت لزوجته عالية يبقى كده العربية "اتعودت" على الزيت التقيل وما ينفعش تقرب لها زيت تخليقي "خفيف" أبدا.
نفسي أفهم يعني إيه "اتعودت" ؟؟؟


الحقيقة.. الكلام اللي فوق ده فيه خلط لكذا حاجة في بعض وتجاهل لمعلومات المفروض إن تسويق الزيوت التخليقية بيشتغل عليها..

ولحد دلوقتي.. ما لقيتش أي دليل علمي أو منطقي يثبت الكلام اللي فوق ده..




المعروف إن الزيوت الثقيلة (ذات اللزوجة العالية) بتدي حماية أكبر ضد التآكل.. خصوصا في حالات التحميل على الموتور.. زي التسارع العالي بالعربية أو تحميل العربية بأوزان كبيرة.

فـ منين الزيت الثقيل بيدي تزييت أحسن وحماية أكبر ضد التآكل .. ومنين الخلوصات تبقى عالية علشان استخدمنا زيت لزوجته عالية؟؟؟

ماهو الخلوصات هتزيد لما التآكل يزيد.

يعني المفروض إن العربية اللي بتستخدم زيت تقيل يكون موتورها حالته أحسن.


طيب بلاش دي...


إزاي لما نحط زيت تخليقي في موتور جديد يحصل تآكل عالي للموتور بعد 100 ألف يخلينا لازم نحط زيت معدني تقيل؟؟

ده المفروض إن ميزة الزيت التخليقي الكبيرة هي توفير حماية أكبر للموتور ضد التآكل اللي بيحصل في أول كام ثانية مع بداية التشغيل... وبالتالي عمر الموتور هيطول... يعني هيفضل بحالة الفبريكا مدة أطول.


اللي أفهمه إن التآكل ممكن يزيد علشان الزيت التقيل بيبقى أبطأ مع الدوارة الصبح بدري.. أو بمعنى أصح.. الزيت المعدني بطيء في الوصول لجميع أجزاء الموتور في خلال أول 30 ثانية من التدوير.

اللي أفهمه بردو إن ضغط الزيت ممكن يبقى أخف شوية مع الزيت الخفيف.. بس لو الزيت ضغطه أقل شوية.. هل كده مش هيوصل للكامات أو التاكيهات في وش السلندر؟؟؟


على فكرة.. الكلام ده بيحصل سواء العربية جديدة أو قديمة.


واللي أفهمه كمان إن الموتور لو خلوصاته كبرت للدرجة اللي تخليني استخدم زيت تقيل للدرجة دي ... يبقى يترمي ونجيب موتور جديد أحسن.


إنما حكاية الـ100 ألف دي بصراحة.... أصلها مش زرار بندوسه فالعربية تتحول إلى حالة تانية بعد الـ100 ألف..


طيب افرض لقينا زيت تخليقي لزوجته عالية زي الزيت المعدني... ده يبقى كويس ولا وحش؟؟؟

مممممم.... بناء على الأسطورة الشايعة وبنفس المفهوم ده... زيت تخليقي وكمان لزوجة عالية... إحنا كده بندمر الموتور!!!!

على فكرة... الزيوت التخليقية فيه منها أنواع بلزوجة عالية (20w-50 و 20w-60) مخصصة لسيارات السباق.. بس ما بتنزلش مصر ولا الشرق الأوسط أصلا.




طيب إيه أصل الحكاية ؟؟

أصل الأسطورة دي كان مع بداية ظهور الزيوت التخليقية في السبعينات... وأيامها كانت الزيوت التخليقية لسه حاجة جديدة وما تطورتش بالقدر الكافي..



وكانت أبرز مساوئ الزيوت التخليقية في الفترة دي إن المواتير بتبدأ تسرب زيت من كل حتة علشان ليها تأثير سيء على الجوانات والأويلسيلات... بالذات لو كانت العربية قديمة.

من هنا ظهرت الأسطورة اللي بتقول "إن الزيوت التخليقية ما تنفعش مع العربيات القديمة"... والموضوع اقتصادي بحت.. وما لوش علاقة بأداء التزييت نهائي.

دلوقتي الزيوت التخليقية تطورت جدا.. ومبقاش فيها التأثير السيء ده... إلا في بعض الأنواع الرديئة من الشركات اللي تحت السلم.




من الآخر...

أسلوب استخدامك وصيانتك لعربيتك هما اللي بيحددوا حالة الموتور... مش المسافة اللي ماشياها العربية.

ومهما كانت حالة موتور عربيتك... اللي يمنعك تحط زيت تخليقي في موتورك القديم 4 حاجات:

1. إن الموتور يكون بياكل زيت.. ويبقى وضعك لزيت تخليقي غالي يعتبر إسراف .. في حين إنك ممكن تحط زيت معدني يأدي الغرض بنص السعر أو أقل .. لحد ما تعمر موتورك.

2. إن الموتور يكون بيسرب زيت بسبب تهالك الجوانات والأويلسيلات بتاعته... والكلام ده أحيانا بيحصل بعد ما تحط الزيت التخليقي في الموتور... لإن بعض أنواع الزيوت التخليقية بتظهر تشرخات الجوانات والأويلسيلات القديمة... ودي حلها إنك تغير كل الجوانات والأويلسيلات بتاعت الموتور...

3. إن لزوجة الزيت التخليقي المتاح ما تكونش من ضمن اللزوجات الموصى بيها في كتالوج العربية.

4. إن مستوى جودة الزيت التخليقي أقل من مستوى جودة الزيت المكتوب في الكتالوج.

لو لسه مش عارف تختار الزيت المناسب لعربيتك... لازم تدخل على الموضوع ده:
http://www.nilemotors.net/Nile/341680-a.html


...