امكانية تركيب أسانسير؟

**Ahmed_Morsy** · 28-09-2015 07:45 PM

السلام عليكم
السلم عندنا متعب شويتين واحنا فی الخامس والوالد عمل عمليتين فی رجله والسلم بيتعبه جامد ففكرنا جديا اننا نركب اسانسير وطرح الموضوع للنقاش وقوبل بالرحب والسعة من سكان العمارة خصوصا لوجود بعض الافراد كبار السن
المشكلة انه مش معمول له مكان فی التصميم لكن السلم فيه فراغ بينه مساحته 95×150 cm
فهل المساحة دی تسمح ولا لأ؟وتكون حمولته قد ايه؟والتكلفة هل تكون عالية اوی لنوع جيد قليل الاعطال ؟علما بان المبنی حديث الانشاء 6 ادوار بالارضی يعنی 5 علويين وطبعا مفيش غرفة خاصة بيه فهل هيبدأ من التانی ولا ايه الحل؟
ياريت اللی عنده معلومة يفيدنی للضرورة وجزاكم الله خيرا

**amr011111** · 29-09-2015 09:05 AM

ينفع إن شاء الله. بس مع حبة تعديلات. هات الشركه اللى هتركبه وهما هيتصرفوا. بس هيحتاج غرفه ماكينات فوق السطح

hh · 29-09-2015 03:45 PM

ممكن يركب من برة العمارة خالص. جيب شركة هي تعاين و تقولك الحلول و تعمل مقايسة بالتكلفة.

**amr011111** · 29-09-2015 04:06 PM

صعب من بره العماره علشان المدخل للشقه بيبقى جهة السلم

**DreAmO** · 29-09-2015 06:02 PM

من خارج العمارة اصلاً ماينفعش .. لإنه هيعتبر بروز وانت تعديت على الشارع
غير تشويه المبنى وتغيير تخطيطه الخ الخ
الا في حالة واحدة فقط .. لو هيتعمل في جانب المبني .. وجانب المبنى ده ممر يتبع المبني ومسموحلك تبني فيه
يعني انت سايب ممر جانبي بمزاجك للتهوية .. ممكن تعمل اسناسير فيه ويفتح على السلم من الجانب لو السلم في نفس الجانب ده .

غير كده .. يا اما في بير السلم والمساحه تسمح .. يا اما في منور عالسلم والمساحه والتخطيط يسمح

الشركة اللي هتعاين بقى هي اللي تقرر .. بس المهم الأمان والسلامه

لأني بقيت اشوف اسانسيرات .. تحس انها معموله في ورشة حداده شعبيه .. والكابينه نص متر في نصر متر
وطلعه تتمرجح يمين وشمال .. وطبعا الباب حاجه كده زي باب عشة الفراخ .. وتلاقي تكت شركة المش عارف ايه ورقم موبايل .

**Ahmed_Morsy** · 29-09-2015 09:24 PM

شكرا علی التفاعل
مينعش بره المبنی اطلاقا لعدة اسباب منها ان السلم وسط المبنی وكمان مفيش منور فاتح علی السلم وايضا مينفعش من الجنب لان المبنی محاط بمبانی أخری من الجانبين لذلك المكان الوحيد اللی ممكن ينفع هو بير السلم
وانا فعلا بأسأل لإنی خايف الشركات مش تكون امينة وتبدأ شغل ويقولی هينفع والحياة جميلة ونلاقی مشاكل فی المساحة بعدين ونكون صرفنا فلوس علی الفاضی وعرضنا حياة الناس للخطر