الموضوع: اخيرا استلمت .. الجين2 2009

الحمد لله .. اخيرا استلمت جين2 2009

بعد تقريبا سنه من الدراسه والتفكير فى الجين 2 اخيرا استلمتها امبارح من فرع الصحراوى والحمد لله العربيه جميله جدا وروعه بجد ومميزه جدا وشكل تحفه ومفيش لا صوت طقطقه ولا صوت فى الكنبه الخلفيه ولا كلام من ده وزى الفل ....
السحب تمام هى اوتوماتيك على فكره ولى الشرف انها أول لون Hibiscus Tea لموديلات 2009 فى مصر تكون من نصيبى ..على فكره اللون ده لايق مع الفرش جدا.. أول ماشفتها كانت لسه معروضه .. حجزتها شفهيا ودخل واحد علشان ياخدها بس أ. محسن قاله انى خلاص اخذتها والواحد ده راح اخذ رمادى - انا حاجز اصلا بس ماكانش عاجبنى الالوان - وكشفت عليها كلها زى ما الناس بتقول:

جربت الانوار كلها وزجاج الابواب والراديو - مكانش معايه سى دى - وبصيت على الصاج من بره ومن جوه والعده (كوريك ومفتاحه وبنسه ومفك ومفتاح عزم صغير كده وحاجات صغيره مش فاكرها واربع طابات العجل بتوع علامه بروتون واريال صغير وكتالوج السى دى وطبعا مافيش لا مانيوال ولا حاجه وجربت السنتر والانزار وفتح الشنطه بالريموت وبصيت على الموتور وميه التبريد وميه المساحات وكان معاها 4 دواسات للفرش)

وتانى يوم دفعت تمنها وركبت طابات العجل وشغلت التكييف على الواقف وطلع تمام وطفيته واخذت العربيه ورحت مونت بنزين 92 من امارات مصر اللى بعد التوكيل بدقيقه واحده والتنك اخذ 40 لتر بالتمام والعداد كان عامل 27 كم
ورجعت وسبتها فى التوكيل يومين لغايه ما يطلعوا جواب المرور لانى محبتش امشى من غير ورق وبعدين كنت لوحدى :k29:

المهم (خد منى 250 جنيه عشان الورق المرور) ورحت امبارح لما كلمونى واخذت واحد صاحبى معايه ودفعت تمن التأمين مع المصريه للتأمين التكافلى 3% وطبعا بعد ما استاذ محسن اكدلى ان الخدمه ممتازه مع الشركه الجديده دى وطلعنا على مرور العجوزه كان على الساعه تقريبا 12 ظهرا وخلصت كانت 4 مساءا (من غير وسايط) بس طبعا اكراميات شغال..:k10:

دفعت 121 جنيه طفايه + 820 جنيه ضرائب ثلاث سنوات ومعرفش ازاى الراجل قاللى الكمبيوتر هو اللى طلع كده وادانى الوصل ودفعته + 9.8 دمغه شرطه + تأمين تقريبا 45 فقط (؟؟)
بعد عناء الشبابيك طلع واحد معاه النمر وادانا الرخصه وعلى فكره النمر جديده (حرفين واربع ارقام)
لفينا شويه وجبت كام سى دى والصوت كان تمام وطلعت على البيت وكان العداد عمل 81 كم لان مشوارى بعيد :k23:

طبعا بالنيابه عن نفسى وعن الغاليه جين2 احب اشكر المنتدى الجميل اللى جمعنا سوا بكل من فيه مهندسين واساتذه ودكاتره وكل من يساهم فى هذا المنتدى اللى طبعا استفدت منه الكثير وبالاخص توت باشا ومزجانجى ومهاب ومحمد وفهد وايمن وخالد وسامح ومجموعه ال15 (مش بقولكوا متابع من سنه).. وقريب ح يكون فى صور انشاء الله :k4:

اه الحاجه الوحيده اللى مش صح (للامانه) كان فيه كام نقطه دهان من نفس اللون بحجم راس الدبوس فوق الرفرف الامامى شمال ومش باينه اصلا بس انا اللى دققت شويه وكانوا حيعملوها قبل ماامشى بس اللون لسه مش موجود وكتبتها فى محضر الاستلام هى والكتالوج وحتتعمل مع صيانه الالف باذن الله

والسلام ختام.. :k18: