الواحد مش عارف بقى حساس زيادة عن اللزوم ولا بعض الناس هم اللى عندهم قلة أدب !
امبارح فوجئت برسالة من اتصالات بيعرفونى انهم هايلغوا خدمة الكول كيبر المجانية اللى بتعرفك مين بيتصل بيك وتليفونك مقفول أو غير متاح .. وأن الخدمة هاتبقى بفلوس .
فدخلت صفحة اتصالات على الفيسبوك وقولت اسألهم عن تكلفة الخدمة بعدما قرروا يلغوها مجانا .. رد عليا ولد من عندهم رد أنا حسيته بايخ .. استهلوا أولا بذكر اسمى بدون أستاذ ولا أى حاجة .. مع العلم انى فى منتصف الأربعينات والولاد بتوع خدمة العملاء بيبقوا فى العشرينات .. يعنى بحكم ان الواحد اتعود على احترام الأكبر منه سنا ومقاما ..
المهم رديت عليه بكل أدب وقلت انك ماتعرفنيش ولا تعرف سنى ولا مركزى الاجتماعى ازاى تنادينى بـ " يا عمرو " .. قام مسح التعليقات كلها وماردش على سؤالى عن تكلفة الخدمة وكمان عمل لى بلوك من صفحة اتصالات مصر يعنى ما أقدرش أعلق على أى حاجة فى صفحتهم ..
بصراحة الموقف استفزنى جدا .. يعنى انا عمرى أد عمره مرتين ولما كلمته بأدب يلغى كل تعليقاتى ومايردش على استفسارى وكمان يعمل لى حجب ..
أنا باسمع كتير عن قلة ذوق بتوع خدمة العملاء بس ماكنتش متخيل كده .. لولا ان معظم أهلى مشتركين مع اتصالات وباوفرلهم لما يكلمونى كنت رميت الخط .. بس برضه دمى محروق ونفسى أعمل أى رد بس مش عارف أعمل إيه ؟ أنا عارف ان مفيش حد بيعمل حاجة للشركات دى وخصوصا اتصالات اللى مالهاش ادارة محترمة الواحد يرجع لها .. وباقول ارمى الخط ومش مهم بقى .. بصراحة محتار ؟؟؟