ابويا اللى بكرهه مات

**amrgamal100** · 10-10-2015 12:50 PM

عليك أولا أن تحمد الله أن جعلك انسان سوى ولم تتأثر نفسيا ولا سلوكيا بتربية الأب
لانك كنت ممكن تبقى مدمن أو مريض نفسي أو أى شخص منحرف
ثانيا من كلماتك عن وقوفك بجانب والدك فى مرضه فهذا يعنى أنك كنت ابنا بارا رغم سوء معاملة الوالد
وهذا مايطلبه منا الله تجاه الوالدين .. البر
أما الحب والكراهية فليست المقصد .. المهم أن تبرهما
فقد كان الصحابة يبرون والديهم رغم كفرهم .
ولكن يا اخى .. من تمام البر .. أن تدعو له بالرحمة والمغفرة وتتصدق عنه
فرغم كفر والد سيدنا ابراهيم لم يمنع ذلك من استمرار الاستغفار له بعد موته
كمل برك بأبيك بعد موته .. واحتسب الأجر من الله

**msobhy** · 10-10-2015 05:13 PM

رحم الله والدك وغفر له
لن أقول اى شئ عن والدى رحمه الله الا انه كان الاعظم
أقولها بكل فخر وثقه - والدى هو أعظم أب على وجه الارض
أذكر مواقف سيئه كثيره جدا جدا لوالدى وكنت دائم الشكوى منه - لما كبرت ووصلت سن الجامعه بدأت اكتشف حاجات كتيره خلتنى عرفت ان والدى هو الاحسن والاعظم

انا مش بقول انك كداب (هافترض حسن النيه وان ديه مش اشتغاله زى المواضيع اللى فاتت من بعض الاعضاء) لكن انت لسه موصلتش لمرحلة انك تتصالح مع نفسك وتعرف قيمة والدك رحمه الله
التمس له العذر - مريض أو مش متزن أو اى حاجه - مهما كان ابوك غلط - أدعى له بالرحمه

**aif** · 19-10-2015 03:23 PM

الاخ صاحب الموضوع
نصيحة لله
وبجد مش تريقة او ماشابه
انت محتاج تروح لطبيب نفسي
كونك تستمر تكره ابوك حتي بعد ما مات ده سلوك مرضي
شوف طبيب نفسي ثقة لأن كدة مش طبيعي
كدة ضد فطرة البشر

**Colin Chapman** · 20-10-2015 08:29 PM

المشاركة الأصلية كتبت بواسطة someoneels

السلام عليكم ورحمه الله وبركاته انا عضو معاكم من زمان بس ده مش الحساب الخاص بتاعى علشان اعرف اتكلم بحرية اكتر و بدون احراج ليا

انا كنت كاتب الموضوع ده من سنه و حبيت اتكلم معاكم فى اللى حصل

http://www.nilemotors.net/Nile/442801-a.html

الموضوع ده كتبته فى شهر 10
والدى اصيب بالسرطان او بمعنى اصح اكتشفنا انه كان مصاب بالسرطان من فتره كبيرة وانتشر اكتشفنا ده فى شهر 11 تقريبا كان سرطان مثانة و انتشر فى المخ و رغم كرهى ليه لفيت بيه طبعا على الدكاتره و حاولت باقصى قدرتى ولكن كل الدكاتره قالو مفيش اى علاج اقصى حاجه ممكن نعملها ان لو فى اى الم ان احنا نديله مسكنات وفعلا توفى والدى فى بعدها 4 شهور
فعلا كان بيتعذب و هو مريض انا اللى كنت بغير له و كنت بديله الحقن والدوا و بركب له القسطره بس برضه كنت بتمنى موته وانا بعمل كده مش عارف كان احساس غريب انى بكرهه و بتمنى موته وفى نفس الوقت بحاول انى اشوف حل علشان يعيش و فى النهاية لما توفى مزعلتش عليه بالعكس كنت مبسوط و لغاية دلوقتى مش قادر ادعى واقول ربنا يرحمه .

**khaled_sabry** · 21-10-2015 12:34 PM

الكلام اللى كاتبه فى الموضوع القديم كلام صعب اوى و حقك بصراحه تكرهه ابوك
بس جايز فعلا يكون مريض نفسى او اى حاجه
المهم دلوقتى هو لا تجوز عليه غير الرحمه

حقولك على حاجه انا بخجل انى اعترف بيها و بين نفسى
انا برضه فى فتره من العمر كنت بكرهه والدى جداااااا تحديدا من فتره الكليه لغايه لما اتخرجت و دخلت الجيش و سيبت البيت علشان شغلى كان فى محافظه تانيه
ليه؟ بصراحه لاكتر من سبب و موقف لكن خليني اقولك على سبب واحد كبير اوى و عاملى عقده نفسيه لغايه دلوقتى ؟؟ والدى كان عاوزنى ادخل كليه هندسه من وانا طفل (زيه و زى اغلب اعضاء عيلتى ) و ماكنشى متخيل اى مستقبل لاى حد خريج اى كليه غير الهندسه (بحكم ان الوسط بتاعنا كله فعلا مهندسين)
فى ثانوى ماجبتش مجموع يسمحلى بدخول الكليه دى و دخلت كليه علوم قسم حاسب - طبعا هو اتعامل معايا كانى سقط فى ثانوى و قلب الدنيا على دماغى من ضرب و اهانه حتى قصاد الناس علشان حلمه الكبير انهار
و بقيت انا الابن المنبوذ في البيت
و رغم انى اشتغلت بعد ما اتخرجت على طول كبروجرمر و بمرتب كويس كمان الا ان بواقى و رواسب الفشل الكبير اللى انا عملته كانت بتظهر كل فتره فى مواقف مختلفه فى تعامله معايا

و رغم ان كده لما خلفت كنت كل شويه بروحله بابنى لانى كنت عارف قد ايه هو كان بيستمتع باللعب مع حفيده
و لما اتوفى و بعد ماطلعت من صدمه الوفاه بصراحه قولت ان دى احسن حاجه عملها فى حياته (انه اتوفى)
لكن فعلا دلوقتى بعد مابقيت اب و ابنى دخل المدرسه بدأت اعذره فى اللى كان بيعمله معايا
هو بحكم الوسط اللى كان عايش فيه و المحافظه اللى احنا كنا فيها فعلا ماكنشى مدرك ان فيه فرص نجاح خارج الوسط الهندسى ده - فغضبه ده كان علشانى - صحيح انه اساء التصرف و اساء التعبير عن الغضب ده و التعامل معاه
لكن بالتأكيد كانت نواياه كويسه
انا شخصيا بتعامل مع ابنى اللى دلوقتى عنه 7 سنين بشكل اسواء من اللى كان والدى بيتعامل بيه معايا و انا فى سنه - مش علشان انا بكرهه ابنى علشان انا عاوزه افضل واحد و بقاتل علشان كده و هو اللى مش بيساعدنى

رحم الله والدى ووالدك

المشاركة الأصلية كتبت بواسطة aif

الاخ صاحب الموضوع
نصيحة لله
وبجد مش تريقة او ماشابه
انت محتاج تروح لطبيب نفسي
كونك تستمر تكره ابوك حتي بعد ما مات ده سلوك مرضي
شوف طبيب نفسي ثقة لأن كدة مش طبيعي
كدة ضد فطرة البشر

الفطره البشريه ان الاب يحب اولاده
لكن الابن مش شرط يحب ابوه

**Hossam Rashed** · 21-10-2015 03:44 PM

المشاركة الأصلية كتبت بواسطة khaled_sabry

انا شخصيا بتعامل مع ابنى اللى دلوقتى عنه 7 سنين بشكل اسواء من اللى كان والدى بيتعامل بيه معايا و انا فى سنه - مش علشان انا بكرهه ابنى علشان انا عاوزه افضل واحد و بقاتل علشان كده و هو اللى مش بيساعدنى

انا مش معاك خالص فى النقطة دى ..

لازم تبقى حنون على ابنك وتعلمه انه يبقى واثق فى نفسه وفى اختياراته وازرع فيه الثقة اللى تخليه ييجى من نفسه يتكلم معاك ويحكيلك عن كل حاجة .. علمه انه يحبك ويحترمك مش يخاف منك

القسوة مش هى الحل خالص فى التربية ..

احنا لازم نتعلم من الاخطاء اللى اتعرضنا ليها واحنا صغيرين ونصلحها فى اولادنا لانهم ملهومش اى ذنب فى العقد اللى عندنا ..

وربنا يباركلك فى ابنك وتشوفه احسن الناس بتربيتك السليمة ليه :)