الموضوع: شروخ كتير في الحوائط والنجارة .. عايز أعالجها .( صور ) .

المشاركة الأصلية كتبت بواسطة hilal

لفت انتباهي العبارة الأخيرة
ولا أعرف هل تؤمن بالعين والحسد أم لا
إن كنت تؤمن بذلك عندي لك نصيحة معينة

من ناحية الحسد .. فالحمد لله حصل .. وبلاطه في الحيطة في وش المطبخ طقت لوحدها عالحيطه
و الله أعلم .. لكن سواء حسد او ظروف طبيعية او الاتنين مجتمعين .. خلاص الشقة باظت كدة كدة .

من نصائح حضراتكم وكلامكم .. انا طلعت بنتيجة .. ان الشقة لازم تفضى ويدخلها نقاش محترم يتعامل مع المشكلة دي وياخد وقته معاها .. ودة صعب او تقريبا مستحيل . في الوقت الحالي
مش لأسباب مادية .. الحمد لله الحال متيسر .. لكن المشكلة ان شغلي كله في البيت وبحتاج هدوء وروقان واستقرار .. لاني بقعد بال 16 ساعة عالكمبيوتر اشتغل ومركز .. ومينفعش اتعطل الفترة دي خالص .. هي دي مشكلتي اني مش عايز اجيب صنايعية في الشقة وانا فيها .

بخصوص الخشب .. انا عندي قناعة انه بسبب تقلب الجو بين الصيف والشتاء والرطوبة اللي في الخشب

لأن من تحت عند السيراميك .. الخشب عمل فرق ( فراغ ) لما الصيف دخل والحر اشتد .. وكمان المسافة بينه وبين الحلق وسعت بالنسبة للابواب

انا كنت مفكر ممكن الاقي حل سهل اتسلى فيها مع نفسي على مهلي في وقت الفراغ ( كنت متخيل ان في مادة سحريه هجبها احقن بيها الشروخ وتلم لوحدها )

وبما اني مش هينفع افضي الشقة الا في حالة وجود شقة بديلة .. فالحل هو اني اسيب الوضع على ماهو عليه .. سنة كمان زي ما قال الاخ المحترم .. وبعدين اشوف هعمل ايه .. يمكن انقل منها خالص .

ملحوظة : صديق لي قالي كان لازم تخلي الممحر يحوطلك سلك بقلاوة بين العواميد والحيطة ويمحر عليها .

يلا نصيب والحمد لله .. الواحد مش بيتعلم ببلاش .

المشاركة الأصلية كتبت بواسطة sha2e

اعتقد ان الموضوع مش محارة سيئة فقط البنا كمان شغله مش تمام (الدليل الترييحات بين الجدران والكمر والعمدان)
فى الاماكن والحالات الي زي حضرتك يفضل الصبه تكون بعد بناء الجدران الخارجيه للشقه (الفيف الخارجي) لانها زي ما ليها عيب انك متقدرش تشيل جدار او تحركه لكن فى المقابل بتقلل من ظهور ترييحات الجدران ( الشقوق )

الحل : بلاش تعالج اى حاجه دلوقتي
اصبر سنه او اتنين كمان وبعدين ابدأ دور على الحل المناسب لميزانيتك ووقتك ساعتها

النصيب بقى .. بس احنا بنبني الحوائط الاول فعلاً وبعدين بنرمي السقف
يعني الدور بيكون عباره عن عواميد فقط .. بنبني ونقسم الشقة عادي .. وبعدين السقف يترمي .

المشاركة الأصلية كتبت بواسطة عبدالله برعى

الموضوع سهل
طبعا الحشو بالسلك صعب بالنسبالك لسبب ان الشروخ خرايط فلو انت مش مستعجل علي السكن في الشقة تجيب صنايعي موثوق وتخليه يخربش غرفة كامله 2مم وبعدين نحاره باسمنت خاص بالنحاره لان الاسمتت الخاص (بالصبه) مختلف وبعدين تدهنها وتنظر 6 شهور تشوف الوضع ايه
اما انك لو حدك الظاهر مش عندك خبره كفايه

معلش انا مفهمتش حضرتك كويس
انا اعرف ان النحات دة بيبقى شغال في وزارة الاثار والحجات دي .. يعني مش صنايعي اجيبة شقة يشتغل فيها .. ولا حضرتك تقصد بتاع المحاره ..

انا محتاج شرح اكتر بعد اذنك لموضوع النحات دة ويجي منين .. وايه هي الصبة دي اللي حضرتك تقصدها .. ويعني ايه يخربش 2 مم
وفعلا انا معنديش خبرة كفاية في الموضوع دة .
وانا بافعل قاعد في الشقه بقالي سنة ونص ... يارتها كانت لسه فاضيه مش قاعد فيها .. كنت هديتها وبنيتها من جديد .

النحات عبارة عن صنايعي او عامل فواعلي متخصص فى التكسير فى المونه سواء محارة او خرسانه
غالبا مش بيكون معاه أجنه ومطرقه بس هتلاقي معاه أكتر من سنبوك كمان (شكل المسمار بس كبير عنه شويتين)
وهتلاقيه فى نفس المكان اللي بيبقى فيه العمال والفوعليه
النحات صنعته او حرفته التكسير واول ما هيبدأ يشتغل هتحس انها حرفه

غير المثال او نحات التماثيل ده حاجه تانيه