الموضوع: إيه أفضل سخان غاز عن تجربة 2015؟

المشاركة الأصلية كتبت بواسطة shadyselim

محتاج اغير السخان بتاعى بواحد 10 ليتر و يكون غاز طبيعى ممكن ارئكم القيمة لو سمحتم

الحقيقة قرأت كل المشاركات ان حد يقول الرأى اللى هقولهولك ملقتش واستغربت جدا .
ياعم الحاج نصيحة لوجه الله ابعد عن سخان الغاز لان تجربتى معاه سىئة جدا المهم باختصار قصتى بدأت مع الغاز تقريبا فى 2006 وجبت واحد يونيفرسال 6 لتر او 5 معرفش المهم كان شغال وتمام ويادوب بنغير الحجارة ومع الوقت ابتدى يخرف يعنى تبقى فاتح المية السخنة وفجأة تلاقيها بقت ساقعة جبنا الصيانة قالك موتور الميه اللى عندك ضعيف غيرنا الموتور برضه نفس العيب لحد ياسيدى ما فيوم واحنا قاعدين لقينا دخان طالع بكثافة من المطبخ والسخان والع جرينا معرفش ازاى قفلت الغاز وتانى يوم طلبنا الصيانة قالك اصل السخان اشتغل ومفصلش طب ياعم نعمل ايه بينى وبينك قلت لنفسى اغيره بدل مانموت احنا وعملت نفس اللى حضرتك بتعمله وقريت كل اللى اتكتب عن سخانات الغاز لقيت الاراء بتجمع على الاوليمبيك يا اما اى سخان مستورد ونزلت اشترى طبعا المستورد اسعار فلكية ولقيت الاولميك ال 9 لتر بس لازم اروح الشركة اقدم طلب عشان يعملوا مدخنة وحوار طويل قلت ياعم هات اريستون 6 لتر وخلاص وجبته وركبته واشتغل تمام وزى الفل وبعد 3 لا تقريبا 4 شهور وانا نايم لقيت العيال بيصوتوا صحيت جرى مش فاهم لقيت نفس المنظر الدخان والسخان والع هههههههههه والله بضحك وانا بكتب
المهم جريت قفلت الغاز وقعدنا نفكر بس المرة دى كنت خدت قرارى طلبت الشركة وعشان يجوا بسرعة قلت لهم فى حريقة جم فى ثانية طبعا لقى الدنيا هديت خلاص قلت له لو سمحت فك السخان والوصلة بتاعه قالى ليه دا ممكن يتصلح ووو قلت له بقولك فك السخان الراجل راح فكه من سكات واخد معاه الوصلة النحاس لانها عهده وقلت له اثبتها على الكومبيوتر قالى حاضر ( طبعا وصلة السخان كانت مكلفنى رسوم بس يجى 1500 ج) ونزلت تانى يوم ياباشا اشتريت اغلى سخان كهربا حلة استلس وريحت دماغى ودى كانت نهاية سخان الغاز معلش طولت عليك بس باختصار احنا فى مصر يعنى اسواء عربيات واسواء سخانات وهكذا