ممكن تفكر شوية قبل ما تبيع الستروين
انا كان معايا عربية ستروين اكسارا وبعتها بعد عشرة ست سنين ..بصراحة لم تخذلنى ابدا
مجرد رأى هو للملاك أكتر مش للي بيشترى .. اللى يبيع العربية دى اقل من 40 الف يبقى بيفرط فيها بلاش
انا ليا صاحبي اشترى عربية اكسنت 2003 موتور 1300 (يمكن فى اخر 2014) بحوالي 42 الف صارف عليها 5 الاف والمكنة خفيفة وغالبا هيسقطلها ماكنة 1500.
طيب ازاى تبيع الاكسارااللى هى 1600 واكثر ثباتا والتكييف مش مؤثر على السحب والموتور ما شاء الله لو محافظ عليه معمر ل 500 الف كيلو ، وتتباع ب 35 الف و38 الف!!! والاسعار دى
تانى حاجة اللى هيقولى سعر السوق وظروف السوق ..طب العربيات كلها غليت جديد ومستعمل وبجد لو انت معتني بالاكسارا وعاوز تحسانك لو بعتها هتركب حاجة افضل محتاج على الاقل 30 الف ..لانى بعد ما بعت عربيتي كل العربيات اللى فى رينج خمسينات وستينات ..الاكسارا برقبتها
على اى حال لو سعر اعادة البيع اتظبط شوية الناس هتعتني بالعربية اكتر ..وياريت اللى بيبيع يفكر شوية
وطبعا مفهوم اللى بيشترى عاوز اقل سعر ..لكن بالمنطق كده امسك باب اكسارا وباب لانوس وشوف الفرق
على العموم كلامي عام لانى ما شوفتش عربية معينة احكم عليها ممكن تطلع مقلب وممكن تطلع ممتازة .. المهم للى بيشترى يكشف على العربية كويس عند حد بيفهم شانها شان اى عربية ..علشان يستمتع بيها ويبقى عارف هيصرف ايه ويبقى يعتنى بالصيانة الدورية من زيوت وسيور وفلاتر .. واللى عاوز يسترخص اوى فاستغل مشكلة اعادة البيع فى العربية وجاب واحدة كمان ارخص من سعرها اللى هو اصلا قليل وطلعت مشنة فى الاخر ..لا يلوم الا نفسه
على فكرة الموضوع ده ينطبق على كل موديلات ستروين اللى هي افضل من عربيات كتير فى فئتها بس بتتباع ارخص ..ليه ما اعرفش
اللى هيقولى قطع الغيار هقوله انزل صقر قريش والحرفيين وفى ناس كتير فى جسر السويس والهرم والمطرية بتشتغل فيها ..يمكن لو من الاقاليم ما تشتريش الا اما تتاكد ان فى محافظتك حد بيشتغل فيها لكن في القاهرة الدنيا سهلة.. وعلى فكرة قطع غيارها فى نفس رنج الكوري اللى فى فئتها واحيانا كتيرة ارخص
ده حتى البيجو اللى هى اخت ستروين ونفس قطع الغيار ..بتتباع اغلى من 5 الى 10 الاف جنيه في الموديلات المقارنة
على اى حال انا وضحت انى بعت عربيتي وما ليش مصلحة .. ومتوقع برضو هجوم