الموضوع: استفسار من رجالة الجيم وطلب نصيحة

المشاركة الأصلية كتبت بواسطة moha sasa

- أهم حاجه ميكنش عندك ولا ضغط ولا سكر!!!!!!!!!!!!

- من الواضح أن بقالك كتير ما بتمرسش رياضة.فبراحة على نفسك متجريش مرة واحدة ، أتمشى عليه الأول. "لايجيلك أزمة قلبيه"

- بالنسبه للتمرين فا ميقلش عن ساعة كل يوم وتجيب عدد كبير من العدات لأنقاص وزنك.

- مش هتحس بأى نتيجة إلا اما تمشى على نظام غذائى.

-أنا متأكد لو دورت على النت هتلاقى ألف نظام غذائى "للتخسيس".

- وممكن تلاقى على اليوتيوب ، ناس بتتمرن على جهازك فتتعلم منها.

- بالتوفيق.

شكرا ليك بس انا مش هدفي اخس
واية موضوع الازمة القلبيه ده ممكن شرح
وبعدين اية دخل الضغط في الموضوع
هو مينفعش العب حديد وانا عندي ضغط

المشاركة الأصلية كتبت بواسطة tottihr

انا مش عارف المالتى جيم بس معلش خده واحده واحده يعنى النهاردة ٣ دقايق بكره ٥ بهده ٨ على حسب الباور بتاعك و بلاش جرى امشى الاول بعد كده اجرى عشان النفس و بصراحه انزل الحيم أحسن هيديك باور أحسن من البيت البيت هتكسل انا حبت من فترة ماشيه و استعملته أسبوع و بعده كده خلاص كسلت لكن الجيم مش هتكسل

شكرا ليك بس انا مش جايب مشاية

المشاركة الأصلية كتبت بواسطة hussein_ramdan

بص ياوحش الوحوش خد الزتونه
انا عندى 31 سنه
كان وزنى وصل الى 167 كيلو جرام وللاسف الى وصلنى للمرحله دى شغلى والعربيه
وبداء يظهر عليا فى الايام الاخيره قبل اتباع الرجيم
انقطاع النفس بليل وانا نايم - حموضه مستمره عالطول وارتجاع فى المرء - ارتفاع ضربات القلب لدرجه ان ممكن اشوف قلب لما يجيلى الضربات صدرى بيتهز- طبعا مش قادر امشى - خشونه فى الركبه الشمال
عملت تحاليل ارتفاع نسبه الدهون فى الدم بمراحل عاليه
بس اول استعنت بالله وبداء نظام عذائى معا نفسى بدون دكتور حط تحتيها ميت خط
انا حاليا دلوقتى 100 كيلو فقط خسيت مايقرب من 70 كيلو
كل بلبس بنطلون مقاس 78 طبعا من محلات المقاسات الخاصه :(
دلوقتى بلبس 42 :) بلبس من اى حد فارش فى الشارع هههههههههههههه
بس يابرنس انا معملتش رجيم والله ولاه روحت لدكتور وباكل كل حاجه انسى كلمه رجيم دى لازم تغير نظام حياتك كلو وتعيش عليه
انا كان ارتفع منسوب النقرص عندى لمراحل عاليه
وفعلا بطلت اللحمه شهرين وبقت اكل لحوم مره كل اسبوع او اسبوعين فقط وكل اكلى لحوم بيضاء او اسماك بس بكميات قليله جدا
محشى وممبار وجاتوه وكل حاجه
السر فى حاجه واحده
رياضه كل يوم ساعه مش حديد جرى وتنطيط وحركات ولو الظروف تسمح معاك ممكن تيجى معايا وارلد جيم الى قدام الميرلاند
حاجه كده الناس الى هناك بتستحمى كل يوم منو تدلع نفسك بالسونه والجكاوزى والحركات وفى مدربين هناك متخصصين شويه فى التخسيس
تانى كل من اى حاجه كميات صغيره
السلاطه لازم السلاطه على اى وجبه
متتعشاش قبل النوم ب3 ساعات
صدقنى انا ندامان على عمرى الى فات
وانا لسه بكمل عايز اجيب ال80
وشكرا

بسم الله ما شاء الله عشره على عشره
انا وزني في حدود 120 والطبيعي بتاعي طول عمري 100 -110 يعني مش زياده جامده بالنسبالي
انا مش مقتنع بحاجه اسمها ريجيم مع دكتور
من كام سنه وصلت 130 رحت عملت اللي انت عملته قللت كمية الاكل وانا من طبعي بحب السلاطة والشوربه
في خلال شهر نزلت 8 كيلو ونزلت لغاية 117 ورجعت تاني عشان كده زدت كام كيلو
برضه هرجع واقول انا مش عايز اخس مش هدفي بس طبعا معنديش مشكلة اني اخس
الموضوع ان بيت والدي في الدور السادس من غير اسانسير من شهرين وانا رايح فوجئت ان عند الدور الرابع رجلي تعبت وابتديت انهج
بس دي كانت العلامة على بدء ضعف العضلات خصوضا ان سني هو بداية نزول منحنى الصحه
عشان كده قررت اجيب الاجهزه عشان اقوي العضلات ومسيبهاش تتيبس او تضعف
طيب ليه جبت الاجهزة مرحتش جيم عشان انا هكسل اروح وكمان عشان ظروف شغلي
وحاجه كمان سني مش حماسة شباب وهتخلص لا ان شاء الله هكمل بدل ما اموت
اصبح الخيار حياة او موت

المشاركة الأصلية كتبت بواسطة moha sasa

+ التمارين المرجحة لمرضى ضغط الدم المرتفع:-

- تأتي تمارين اللياقة البدنية على رأس هذه القائمة. وأفضلها تمارين رفع أثقال بأوزان خفيفة أو تمرين "العقلة"، وذلك لتقوية العضلات الكبيرة بالجسم كالساقين، والصدر، والظهر، واليدين والأكتاف.
- وبالنسبة لرفع الأثقال، اختر أوزان خفيفة بحيث تتمكن من تكرار التدريب من 15 إلى 20 مرة في المجموعة الواحدة بدون إجهاد للعضلة. وحاول أن تتمرن ببطء حتى تفيد عضلاتك.
- تمارين الإطالة وينصح القيام بها يوميا أو 4 مرات في الأسبوع على الأقل.
- تمارين الحركة، مثل المشي وركوب العجل، والسباحة تساعد هؤلاء المرضى على تحسين كفاءة الدورة الدموية للجسم، وتقليل التيبس وتساعد على زيادة المرونة وتقليل نسبة الإصابات.
- التمارين متوسطة المجهود.
ويجب مراعاة بدء التمارين بشكل تدريجي، ولفترات تطول مرة بعد أخرى. ولا تنس تمارين الإحماء قبل أي شيء، فهي تجهز جسمك. يفضل ألا تقل فترة التدريب عن 40 دقيقة، ولا تزيد عن 60.

تحذيرات:

- تجنب رفع الأوزان الثقيلة دون استشارة الطبيب.
- نظم النفس، ولا تحاول حبسه أثناء التدريب.
- قم بقياس نبضات القلب بشكل دوري.
- اشرب كميات كبيرة من الماء طوال فترة التدريب.
- لا تستمر في التدريب إذا شعرت بألم في الصدر، او الغثيان، او الصداع، او عرض آخر غير طبيعي.

طيب ما تمارين الحديد مفيدة اهي خوفتنا ليه
شكرا ليك

العب كارديو (تمارين هوائية جري ونط حبل وهكذا) هتلاقي التمارين دي كلها علي اليوتيوب هترفع من لياقتك البدنية جداً