حراااام .... البترول بقى ب 48 و البنزين زى ما هو !!!

**meza** · 21-11-2008 06:41 AM

- ساعة ما غلوا البنزين كان عندهم حق بصراحة لأن سعر البرميل الخام وصل ل 110 دولار و كان العبء شديد جداً على الميزانية فى مسألة دعم الطاقة.

-السعر ده نزل لل 90 فى خلال أقل من أسبوع بعد الصعود الكبير ده ... و كان لما وصل لسعر ال 90 ده قبل كده الحكومة برضه مدعمة البنزين.

-و فضلت موجة الهبوط فى السعر لحد ما وصل ل 70 دولار على آخر شهر أكتوبر ... كل ده و الحكومة لسه نايمة و مش بتفكر حتى فى الموضوع.

-خلال شهر نوفمبر فضل السعر ما بين ال 60 و 71 لحد يوم 6 من الشهر ... السعر نزل ل 59 (كسر ال 60 يعنى) و طلع تانى شوية ... و بعديها كمل مسيرة النزول لحد ما وصل لسعر إلنهاردة ؟؟!

عارفين كام هو سعر إلنهاردة .... 48.8 للبرميل ...... يعنى أقل من نص السعر اللى غلوا عنده البنزين.

و كل ده و البنزين زى ما هو .... ولا كأن فيه حاجة بتحصل !!! (إستهبال و إستعباط رسمى كأنهم مش واخدين بالهم)

- للعلم الحكومة فضلت مستحملة الدعم لغاية ما السعر وصل لل 90 و زوودته لما وصل لل 110 ...

>> فلو إعتبرنا إنهم إبتدوا يضغطوا على نفسهم و يستنفزوا موارد تانية بعد ما السعر عدى ال 75 ... فالسعر بقاله أكتر من شهر تحت ال 75 و نزل التلت كمان !

لحد إمتى الحكومة هتفضل مطنشة ... ؟!!!

**Hassan Khalil** · 21-11-2008 06:46 AM

بتتكلم في ايه يا صديقي :)
مش بعيد اصلا نلاقي البنزين غلي علي اول السنة الجديدة
اذا كان لما الكهرباء غليت اليومين اللي فاتوا ..بدأو يحصلوا الزيادات بأثر رجعي من 1/7!!!!!!!!!!!!!!!
ربنا يطلعنا منها علي خير يا صاحبي ..الدنيا ..او..البلد

**meza** · 21-11-2008 06:51 AM

المشاركة الأصلية كتبت بواسطة Hassan Khalil

بتتكلم في ايه يا صديقي :)
مش بعيد اصلا نلاقي البنزين غلي علي اول السنة الجديدة
اذا كان لما الكهرباء غليت اليومين اللي فاتوا ..بدأو يحصلوا الزيادات بأثر رجعي من 1/7!!!!!!!!!!!!!!!

ده غير الكهربا اللى غليت صحيح

و كل حاجة غليت أصلاً ساعتها بحجة إن البنزين غلى

ربنا يطلعنا منها علي خير يا صاحبي ..الدنيا ..او..البلد

أمين يا رب .... عشان خلاص الواحد جاب أخره فى البلد دى (اللى هو آخر أخره مش أخره بتاعة كل مرة) .

و آسف على حرقة الدم عالصبح ... بس جيت أشوف السعر إلنهاردة لقيته وصل للرقم ده .. رغم إنه من قبل كده و هو قليل بس كده قل قوى و الإستهبال و التطنيش طول قوى قوى زيادة عن اللزوم.

**midnightman_74** · 21-11-2008 10:27 AM

:k15: يبقى انت اكيد اكيد فى مصر 000000000:k15:

**Nile_Storm** · 21-11-2008 11:30 AM

متفكرنيش يا مينا ب ال 48 دي :( :(

**marsguy** · 21-11-2008 11:44 AM

يا جماعه مصر أصلاً من الدول اللي البنزين فيها رخيص جداً

والمفروض إن لتر البنزين برضه الحكومه بتدعمه حتى وهو سعره 185، يعني المفروض إن سعره أغلى من كده كمان.

وكمان أصلاً إحنا لسه مش بنستورد بترول، يعني أصلاً مصر ما إتكلفتش حاجه زياده لما البترول غلي. اللهم إلا لو كانت تكلفة الإستخراج والتكرير غليت هي كمان.

فا بالعكس المفروض لما البترول يرخص ده يبقى عبئ زياده على الحكومه عشان مكسبها قل في تصدير البترول.

يعني مثلاً:

لو إفترضنا إن مصر بتنتج 10 براميل بترول، وتكلفة تكرير البترول 1 جنيه

بنصدر منهم 5 وبنستهلك منهم 5

لو سعر البترول إنهارده 20 جنيه، يبقى مصر هاتكسب 100 جنيه، وهاتدفع 5 جنيه بتوع تكرير البترول للإستهلاك المحلي من البنزين.

لكن لو سعر البترول نزل وبقى 10 جنيه يبقى مصر هاتكسب 50 جنيه بس وبرضه هاتدفع 5 جنيه بتوع تكرير البترول للإستهلاك المحلي من البنزين.

وكمان لو البنزين رخص إنهارده هايرخص ربع جنيه، وبعد 3 ولا 6 شهور هايغلى جنيه لما البترول يغلى تاني

هذا والله أعلم

**MTAK** · 21-11-2008 01:03 PM

المشاركة الأصلية كتبت بواسطة marsguy

وكمان أصلاً إحنا لسه مش بنستورد بترول،

تصحيح صغير

احنا بنستورد بتروووووووووووووووووووووو ووول خام
و احيانا منتجات كمان

**marsguy** · 21-11-2008 04:57 PM

المشاركة الأصلية كتبت بواسطة MTAK

تصحيح صغير

احنا بنستورد بتروووووووووووووووووووووو ووول خام
و احيانا منتجات كمان

جزاك الله خيراً

أنا ما كنتش أعرف إن إحنا بنستورد بترول خام

بس ممكن أعرف ليه؟ هو البترول بتاعنا خلص ولا إحنا بنستورد خام مش موجود عندنا ولا إيه؟

شكراً