استفسار عاجل فى برايد هاتش 1997

السلام عليكم
لو سمحتم يا اخونا انا قدامي عربية كيا برايد هاتش باك مع العلم اني بطيخ فى العربيات ولسة اول مرة هسوق
المهم بعد ما الميكانيكي كشف عليها قالى الماتور كويس والعفشة سليمة
بس كان فى ضأرة فى التاني بتاع الفتيس(كلام الميكانيكي)
العربية راشة برة بس بس اللى رش حمار لانه عفر القوايم والكرتيرة وهما سلام ومفيهمش خطبطات ولا اي حاجة
الكاربراتير عاوز يتنضف
العربية من برة فيها شوية خدوش فى الاكصدامين وخبطة فى الباب
السعر الاخير 28 الف
لاصحاب الخبرة الحاجات دي عشان تتعمل تكلف كام مع العلم ان الميكانيكي قالى اني هحتاج اغير طقم سيور وبوجيهات و كذا زيت كدة عشان العربية تبقى كويسة معايا
الميكانيكي بيقولى الحاجات دي هتكلفك فى حدود 1000 جنيه فياريت اعرف كل حاجة بالتفصيل عشان مش عاوز يتضحك عليا وزي ما بقولكم انا بطيخ ولسة هتعلم فياريت الرد يبقى بالتفاصيل وبأعار قطع الغيار والافضل ايه وبكام عشان اعرف اتعامل
وشكرا مقدما وياريت الرد السريع عشان هروح اخلص بكرة او بعده بالكتير

ايوة طقم السيرفيس هايكلف حضرتك في حدود 1000

شكرا لحضرتك على الرد
بس افهم من كدة ان بقيت الحاجات دي هتصرف اكثر ولا هو طقم السيرفيس ده شامل كل المشاكل اللى فوق
معلش انا زي ما قولت بطيخة ومعرفش حاجة

مفيش مشاكل تاني غير عضة الفتيس ودي ممكن تكون غوايش او هاتضطر تغير فتيس لو ترس
لازم الميكانيكي يقولك عليها ويشوفها
غير كده الخبطة والدوكو مش من الاعطال

طب ممكن اتعب حضرتك وتقولى ايه مكونات السرفيس ده بأسعار قطع الغيار وايه افضل نوع
وكمان موضوع الزيوت اللى عاوزة تتغير دي ممكن اعرف افضل الانواع ايه
وشكرا واسف لتعبك

سير كتينة وسير دينامو وبوجيهات وفلتر بنزين وفلتر زيت وفلتر هوا وزيت ماتور وزيت الفتيس اكشف علية الاول لو ناقص زودة لكن الاسعار حسب الانواع وانت ومقدرتك
سير الكتينة من 45 ل 90
سير الدينامو 55
فلتر البنزين 30 - 50
فلتر الزيت من 35 - 60
البوجيهات من 55 ل 120

متشكر جدا لتعبك وزوقك