الموضوع: بتعمل ايه في شعور الفشل

يا جماعه من الاخر انا مش بتكلم عن فكره السفر دلوقت لكن بتكلم عن اللي الواحد ضيعه من عمره في مصر
كان ممكن في ال 10 سنين اللي فاتوا ابقي حاجه تانيه و امشي في طريق تاني و اعيش عيشه نضيفه
انا عايش عيشه تور في سافيه شغل و بيت
مش قادر اعمل اي نشاط نتيجه ان المواصلات عايزه وقت طويل علشان تروح اي حته
حتي الانشطه في مصر شبه معدومه و قولت لحضرتك بصوا علي موقع زي Meetup
اللي فكرهته بتعتمد اساسا علي ان الناس تعمل جروبات تمارس فيها انشطه او تتعلم فيها حاجه بتحبها و يبقوا قريبين من بعض في السكن و كده هتلاقي في مصر 4 جروبات فقط منهم جروب لأمهات الزمالك
اللي زعلان عليه شعور الندم اني مسافرتش بره بعد الدراسه زي زميلي و اتعلمت هنام و اشتغلت هناك كان زماني عايش عيشه نضيفه

المشاركة الأصلية كتبت بواسطة volociximab

ليه ماجبوش نتيجة؟
انا عن نفسي ادين للبشمهندس محمد انه من كلامه ادركت قيمة العلاج و بدأت العلاج و ربنا شفانى الحمد لله بعد 13 سنة اكتئاب

الاكتئاب وسائل الخروج منه معروفه، صاحب ناس جديده وغير الاماكن اللي بتخرج فيها والعب رياضه او مارس اي حاجه بتحبها زي المزيكا او ختي سينما.. كل ده معروف بس المشكله انك وقت الاكتئاب معندكش اي طاقه تعمل اي حاجه.. دايما الدكاتره بتحط كل امالها علي ادويه الاكتئاب عشان تقدر تكسر ال دايره المفرغه دي لكن للاسف مجابتش نتيجه معايا
جربت 3 دكاتره ب 3 ادويه مختلفه واديني داخل اهو ع السنه 8 من الاكتئاب

المشاركة الأصلية كتبت بواسطة msobhy

welcome to disappointment club
بص يا سيدى
انا مواطن مصرى - للأسف بحب البلد ديه - وبدون ادنى مبالغه ممكن اتبرع بنص أعضائى علشان اسيبها
كنت لما اتكلم مع أصدقائى وقرايبى على العيشه جوه مصر وبره مصر - وان اللى جوه مصر اللى يطلق عليهم الطبقه الراقيه ميستهلوش حتى ان الواحد يقول لهم صباح الخير وانى استحق اكتر من اللى انا فيه
لاقيت الكل بيغنى على نغمه واحده - انت بتحقد على غيرك - انت مش حاسس بالنعمه اللى فى ايدك - انت احسن من ناس كتير والكل ماسك نفس النغمه ........ علشان كده بطلت أتكلم وسكت

انا اكبر منك بحوالى 4 سنين - صدقنى اهرب - اعمل اى حاجه واهرب من البلد ديه
والله البلد ديه مش بلدنا وانك تكون مهندس او دكتور أو صاحب اى مؤهل أو وظيفه معتمده على العلم اعرف انك مؤهل انك تاخد بالجزمه فى اى وقت وملكش ديه (الكلام إسقاط عليه طبعا مش على حضرتك)

اقولك على حاجه انا مش لاقى لها حل
ابنى الكبير معتقد انى سوبرمان - ابنى فى اولى ابتدائى والله العظيم انا بحاول معاه بشتى الطرق انى افهمه انى ولا حاجه والواد مقتنع ان اقوى واحد فى الدنيا هو بابا واذكى واحد فى الدنيا هو بابا وكل الناس بتحب وبتحترم وبتخاف من بابا

فى رأيك لو أمين شرطه وقفنى فى الشارع وكان مزاج أمه زفت وطلعه عليه أمام أولادى - ممكن تقول لى ساعتها اعمل ايه :(

انا مش عارف اعلم ولادى كويس
مش عارف اعالجهم كويس
مش عارف افسحهم كويس

وعليه بعد كل اللى حكيت لك عليه ملقتش غير حل واحد - والحل ده قاتل - انى بهرب
ايوه بهرب من كل حاجه والمصيبه انى بهرب بالقراءه - بقيت بقرأ بشكل هيستيرى وطبعا ده بيخليك تفهم أكتر - وبيخليك تتصدم من الواقع الأليم اللى احنا عيشينه ويخليك تتقوقع على نفسك أكتر لأنى وصلت لمرحله انك مش عارف تتناقش مع اللى حواليك

صديقى ..... أهرب - أرجوك أهرب - من فضلك أهرب - بس اوعى تهرب زيى - اهرب من هنا
أرجوكم محدش يقول لى طيب قاعد فيها ليه لأن فعلا الكلمه ديه زى الشتيمه عندى - وحق لا أله الا الله - والله العظيم أول لما تجى لى فرصة الهجره لن اتردد ولو ثانيه واحده
يا رب

ياااااه يا عبدالصمد

ما حدش مرتاح

اللي جوه عايز يطلع بره

واللي بره عايز يفضل بره برضو هههههه

كأنك بتتكلم بلسانى
انا فى نفس عمرك و حاسس نفس احساسك و اسواء كمان
لان والدى ووالدتى اتوفو وورثت عنهم مبلغ معقول ممكن يخليني ابدء حياه جديده ليا و لاطفالى بره - يعنى مافيش رابطه اجتماعيه قويه تربطنى بمصر
و حتى على مستوى شغلى و صلت لمنصب senior بقالى فيه 6 سنين و مش قادر اعلى عنه نتيجه لظروف الشركه اللى فيها و المديرين بتوعى بيتباهو بشغلى و بينسبوه ليهم فى وجودى رغم انهم فى اكثر من موقف لما بيوجهونى بيوجهو فى طرق غبيه و احيانا كتير بطنش توجيهاتهم !! - حتقولى سيب الشغل و روح شركه تانى - حقولك الشغل دلوقتى بقى صعب اوى
و حتى لو روحت على شركه تانى برضه حروح على senior لان الدرجه اللى اعلى منها team leader ماحدش بيشغل حد فيها على طول

انا ضد فكره الشغل فى دوله عربيه لانى مش عاوز فلوس و مش عاوز اتعامل بعنصريه مقننه من واحد فرحان بفلوسه
و فى نفس الوقت بحاول فى سكه الهجره بس المشكله كندا صعبت شروطها اوى و بقيت شبهه مستحيله و استراليا برضه شرطها انى احقق باند 7 فى IELTS و ده برضه صعب
باقيه الدول الاوروبيه مالهاش برامج هجره اصلا

و دلوقتى بقيت مخنوق و مش بستحمل كلمه من مراتى او زمايلى فى الشغل
و لا حتى ليا نفس اذاكر اى حاجه او حتى اطور من نفسى - اطور من نفسى ليه علشان اوجع دماغى فى الشغل اكتر و اخد اوامر من ناس انا شايفهم (و متأكد) انهم اقل منى بكتير فى قدراتهم و امكانياتهم و بيقبضو فلوس اكتر منى بكتير !!!! و دلوقتى بقيت بشتغل بمداء اربط الحمار مطرح مايقولك الحمار
و الله العظيم الناهرده فعلا كنت بفكر اروح لدكتور نفسى

كلنا هذا الرجل
اكيد انت بتتكلم بلسان حال ناس كتير بس انا شايف ان مش لازم تبص للأفضل منك ممكن برضو تبص للأقل منك ومتخليش الدنيا هدفك لان الدنيا كلها بما فيها وسيله للأخرة وعلشان كده هيا دنيا علشان تتعب وتشقي ومتكونش مرتاح هيا طبيعتها كده ، مش لازم لو سافرت ترتاح ومش لازم تبقي سعيد وافرض انك عملت اللي انت عاوزه طيب وبعدين واخرتها ايه العمر هيخلص وهتعدي الأيام وانت بتشتغل في الحياه العملية السعيدة. مش هو ده الراحه
اظن الراحة انك تكون مع الله في أي وقت وفي أي مكان وتعيش حياتك علي ادها عيش علي قد يومك لان لو شغلت نفسك ببكرة هتضيع عمرك ومش هتوصل غير للي ربنا كاتبهولك كل اللي عليك انك تجتهد وتحاول تبقي احسن ويكون عندك ثقة بالله ودايما لو بصيت للأقل منك هتكون راضي كان ممكن تكون عايش في ادغال افريقيا ومش لاقي حتي الهدوم اللي تلبسها وامثله كتيير جدا لوعملت زيارة لاي مستشفي وشفت معاناه الناس هناك هتقول ده انا مفيش حد سليم غيري حاول تدور علي الاسوء وتحمد ربنا ومتضيعش الباقي من حياتك في نكد واكتئاب