رأى مختلف فى أزمة .......... النادى الأهلى
صباح الخير
الموضوع ده خواطر مش مترتبة ........... بس كانت كلها بتيجى فى دماغى و انا بتابع ازمة النادى الأهلى
اولا انا لا اهلاوى و لا زمالكاوى ...... رغم انى بحب الكورة جدا و بتفرج عليها ....... انا بحب اللعبة الحلوة ...... بس العيلة عندى كلها اهلوية عن بكرة ابيها و يمكن ده يخلينى اقرب شوية للنادى الأهلى :)
ببساطة ........ ايه اللى بيحصل ده كله ......... ايه اللى حصل فى مصر و لا الكورة الأرضية و لا المجموعة الشمسية ...... عشان يحصل ده كله ؟؟!!!!
نادى رياضى كرة قدم ...... خسر بطولة او اتنين ..... او ماتش او اتنين ....... بعد ما كان بقاله 11 سنة بيكسب كل حاجة فى الدنيا تقريبا
يعنى ايه شوية عيال بيقولوا على نفسهم التراس ..... يروحوا يدخلوا استاد بالعافية من غير دعوة و يقعدوا يشتموا فى اعضاء مجلس ادارة منتخبين ...... لا و يقولوا مين يتعين و مين لأ و يفرضوا رأيهم على مجلس ادارة منتخب لأ و عايزينه يمشى كمان
و الأدهى الأعلام الفاسد اللى بينقلنا فيديو المشهد ده و الشتيمة طالعة من التلفزيون و بعد كده يلتفت المذيع و هو على وشه ابتسامة صفرا للضيف الأهلاوى القديم .......... اللى تلاقيه و بكل تأثر و الدمعه حتفر من عينه يقولك ........ هو ده جمهور الأهلى العظيم
لا مش هو ده ......... و بعدين عظيم فى ايه جاتك خيبة .......... فى قلة الأدب و التدخل فيما لا يعنيهم
مثلا ..... بسمع اغنية بيغنيها شباب الألتراس دول ...... تقولك نادى كبير نادى عظيم اديله عمرى و برضه قليل !!!!!
عمرك ايه يا ابنى اللى تديه لنادى كورة ؟؟؟؟!!!!! انا افهم الواحد يدى عمره لنصره دين الله مثلا ..... لنصره وطنة و الدفاع عنه .......... لكن يدى عمره لشوية ناس بتجرى ورا كورة فى ملعب و فى الأخر تاخد ملايين ....... و الدكاترة و المهندسين و المدرسين فى البلد ديه مش لاقيين ياكلوا !!!!
و الأعلام ........ ماتفتحش قناة ...... الا كلام عن ازمة النادى الأهلى والدنيا مقلوبة و لا كانها قيام الساعة ...... هرى بالساعات و زعيق و عياط ..... ايوة وصلت للعياط عشان ازمة النادى الأهلى !!!
هو فيه ايه بجد ؟؟؟!!!! ايه اللى حصل فى الدنيا ....... الكويكب خلاص حيخبط فى الأرض
ايه المشكلة لما نادى ........... كسب كل بطولات مصر و افريقيا على مدار سنين طويلة تعثر شوية و لا خسر ماتش و لا بطولة
هى مش الرياضة ديه روح رياضية و متعة و صحة للبدن و العقل و مكسب و خسارة
نادى يكسب انهاردة عشان يخسر بكرة و غيرة يخسر انهارده عشان يكسب بكرة .......... و لنا فى اوروبا مثال
ما ريال مدريد خسر الدورى السنة اللى فاتت .......... ايه اللى حصل يعنى فى الدنيا ...... و مانشستر يونايتد بقاله كذا سنة بيخسر ..... جماهيره راحت اقتحمت اولدترافورد و نزلت شتيمة فى مجلس الأدارة
ليه مش عايزين نتعلم النظام ..... مش فيه جمعية عمومية هى تحاسب و تقيم و تعين و تعزل ...... ليه مش كل واحد يخليه فى دوره ..... الأدارى ادارى و المشجع مشجع و اللاعب لاعب
الناس بقت متعصبة و عنيفة بشكل غريب ......... لدرجة الزمالك بيلعب مع فريق تونسى ..... الأهلوية مع كل جون تونسى بيفرحوا و يهللوا ولا كأنه جون جابته مصر فى البرازيل ....... الأهلى يخسر من فريق أفريقى ...... الزمالكوية يقيموا الافراح
و دول يشتموا في دول و دول يشتموا في دول و حاجة تقرف
يا جدعان ......... ديه رياضة ........ هدفها المتعة و التسلية ......... مش ساحات حرب و فرض نفوذ ...... هدفها الرقى و التحضر ........ مش التخلف و الجهل و التعصب
معلش انا عارف كلامى مش حيعجب ناس كتير و حتهاجم بسببه .......... بس ده رأيى و رزقى على الله .... ربنا يهدى الجميع
