الموضوع: خطوة جديدة ومهمة في طريق الهجرة بلا عودة ......

طبعا أغلب الناس اليومين دول بتتكلم على الهجرة وازاي تهرب من مصر وأغلب الآراء بتقول اهرب وانت صغير كدة قبل ما تتجوز !!

أنا بالنسبالي بدأت بحث بدري شوية من وأنا عندي 20 سنة
ف الأول كان حلمي الأكبر امريكا طبعا وكنت نفسي أروح سان فرانسيسكو وعرفت سكك كتير ممكن آخد بيها الفيزا بس للأسف بعد الثورة تعتبر كلها اتقفلت والحالة الوحيدة اللي ممكن تسافر بيها هي اللوتاري أو الهجرة العشوائية !!
بعد سنتين من دراسة ديموغرافية وطبوغرافية وطقس وتوزيعات السكان ف أمريكا لقيت الأمر شبه مستحيل !!

بحثت ف الدول التانية زي استراليا وكندا ولقيت برضه الموضوع محتاج تحضير كبير بالرغم من إنه ف النهاية كندا مش هحبها أوي علشان التلج اللي فيها واستراليا مش دولة قوية جدا اقتصاديا وبحسها كدة منفصلة عن العالم

من شهرين كدة ابتديت أدور ف أوروبا وبحثت كتير وبمساعدة ناس هنا وف أماكن تانية لقيت إن ألمانيا أفضل وأسهل دولة ممكن اروحها
الشروط بس اني أتعلم ألماني لحد B1 وأحضر ورقي واقدم ف جامعة ويكون معايا مبلغ 8.000 يورو ف حسابي وبعد كدة الأمور سهلة

شفت إن موضوع ال80.000 ده عبئ كبير وازاي هحضرهم لحد ما افتكرت ابن خالتي وإنه شغال مهندس طبي هناك ومعاه الجنسية !
سألت ناس قالولي ممكن يبقى ضامن ليك وأخدت رأيه قالي أنا معنديش اي مشكلة أبقى ضامن ليك
كدة اتحلت الحمد لله

يتبقى بس الالماني
سألت ف أكتر من مكان
ADK بياخدوا 2500 للA1 والمواعيد 4 ساعات يومين ف الاسبوع وده عبئ كبير جدا غير كدة حسيتهم تنكين أوي ومعندهمش أماكن أصلا

Gootha بياخد 3200 للA1 وهو كويس جدا بس مكانه بعيد عليا غير كدة بيعلم براحته أوي !!

DFA بياخد 1800 للA1 و3 ايام ف الاسبوع 3 ساعات وكمان لقيت ان في جروب من 10-1 فطبعا رحت قدمت ودلوقت أنا ف الاسبوع التاني والحمد لله حفظت الحروف والارقام والتصريفات وأسئلة وكلمات كتير !

الA1 هياخد مني وقت شهرين يعني ف 6 شهور هكون واصل لل B1 إن شاء الله وأنا ناوي آخد لحد ال B2
اول ما هخلص ال A2 هبدأ أحضر ورقي
بعد ما أخلص B1 همتحن ف جوتا وبعدين هبدأ أدور على منح ف DAAD
أنا مش معتمد بنسبة كبيرة على المنح بس هي هتشيل من عليا عبئ كبير يعني جت خير وبركة مجتش مش مهم

كمان برضه أنا مش معتمد على إن ابن خالتي هيضمني .... برضه أنا بجمع فلوس دلوقت وإن شاء الله يبقوا معايا وقت التقديم
أنا الحمد لله مستقل بحياتي وبصرف على نفسي تماما برغم من إن سني 23 سنة

وأنا ف الB2 هقدم ف أكتر من جامعة والجامعة اللي هتقبلني ان شاء الله هروح عليها
لحد ما أوصل للمرحلة دي هكون ف شهر 5 لسنة 2016

بقدر الإمكان هحاول قبل 15-6 أكون مسافر ولو معرفتش أسافر أنا عندي Plan B ودي برضه هتنقلني لمستوى عالي جدا بس هنا ف مصر
حد هيقولي اشمعنى 15-6 يعني هقول ان ده تاريخ انتهاء عقد الشقة اللي مأجرها واللي لو معرفتش أسافر هتيجي بعده الخطة B
ومفيهاش مشكلة برضه هيبقى معايا لغة ولغة بجد شايفها لذيذة وحلوة
حتى لو مستخدمتهاش علشان أجيب منها فلوس هبقى على الاقل اتعلمت ثقافات شعوب وفهمت العالم حواليا أكتر !

فى كل الحالات أنا مبسوط وراضي مش هموت لو مسافرتش ألمانيا برغم اني بصرف كتير على الموضوع
بس أنا اتعودت مستخسرش ف التعليم مهما كان المبلغ

الخلاصة ... إبدأ .
متقولش هجيب ال80.000 منين طب هتعلم ألماني ازاي مفيش وقت طب هوفر تمن الكورس ازاي طب هدرس إيه هناك !!
إبدأ بس وربنا هيكرمك حتى لو ممعكش غير حق ال A1.1 هتلاقي فلوس جتلك متعرفش ازاي بس انت آمن بحلمك

ليا صاحب ف ألمانيا من سنة بالظبط مكانش معاه غير حق ال A1.1 بس الفكرة إنه اشتغل على حلمه وربنا كرمه

أنا مش عارف ليه حكيت كدة أنا متعود أعمل كل حاجة من سكات بس مش عارف حاسس انكم عيلتي يعني
وبرضه آهو يبقى في تحفيز وأقدر ف شهر 6 الجاي ان شاء الله وأنا هناك أبص على الموضوع ده وأنا مبسوط
ربنا يكرم الجميع إن شاء الله سواء في مصر أو بره
دعواتكم

الحمد لله الذي بنعمته تتم الصالحات