الحلم المستحيل (كيف تصبح طيارا )

**elpilot** · 13-10-2015 03:42 AM

السلام عليكم
اخواني اعضاء المنتدي الكرام
حابب اخد رأيكم في موضوع مهم بالنسبة لي
وهو حلم حياتي منذ الطفولة
فحلم حياتي منذ طفولتي هو ان اصبح طيار
والان عاد الحلم ليلح عليا بشده ان انفذة ولكن تقف الظروف الماديه عائق امامي خاصة وان الاكاديميات الخاصة تتطلب نفقات تقارب النصف مليون جنية وطبعا صعب جدا علي شاب زيي يوفر مبلغ زي ده ولا يوجد امكانيات من الأهل للمساعده بمثل هذه المبالغ
انا الان اتممت 27 سنة دخلت في اول ال28 سنة وفرصتي ستتلاشي في تحقيق الحلم عند ال30
هل يوجد اي طريق او منحة او اي شئ يمكنني ان ادرس الطيران واعمل به بدون دفع النصف مليون دول حتي اسلكها واحقق حلمي؟
وهل يوجد اي طريق بمبلغ اقل وليكن 50000 او 100000 فقط لان هذه هي المبالغ التي يمكنني ان اجمعها ولا يمكنني تجميع اكثر من ذلك في الوقت الحالي
ام ان احلام الغلابة مجرد اضغاث احلام ويجلموا وهم ساكتين عشان ميصدعوش الناس واصرف نظر عنها واشوف مستقبلي في حاجه تانية؟
ارجو من لديه علم المساعده ولكم كل الشكر

**Mecha** · 13-10-2015 04:22 AM

مجربتش تدخل الجويه
ودي مبتحتجش وسايط او فلوس ، وبينزلوا لحد
٥٠٪

**elpilot** · 13-10-2015 11:38 PM

حاولت ولكن الاهل رفضوا الفكرة واصروا علي دخولي كلية الهندسة لكي اصبح مهندس
وضربوا باحلامي عرض الحائط

**ahmed_eng2001** · 14-10-2015 10:08 AM

للأسف .... مفيش غير طرق محددة و معروفة .. و هى الى بتكلف فلوس كتير زى ما حضرتك ذكرت

معهد مصر للطيران ... او ان حضرتك تروح تدرس فى امريكا ... و تحديدا كمان فى فلوريدا ... فيها مدارش كتير لتعليم الطيران ... و تخضع لل faa ... و سمعت ان دى ارخص من مصر .. و احب اضيف لحضرتك كمان ... الاردن ... و اثيوبيا

فيه ناس بتشتغل و تحوش فلوس و بعدين تتفرغ و تدرس الطيران ..
و على ما اتذكر .... حضرتك بتدرس تقريبا لمدة سنتين

**samyyousef** · 14-10-2015 10:42 AM

هناك من قال ان دراسة الطيران في جنوب افريقيا تماثل الدراسة في انجلترا و انها ارخص من مصر لكني لا اعلم التكلفة تحديدا
و انصحك بالاتندم ابدا على شئ غير مقدر لك
تحياتي

**SeiffoZ** · 14-10-2015 01:46 PM

المشاركة الأصلية كتبت بواسطة mecha

مجربتش تدخل الجويه
ودي مبتحتجش وسايط او فلوس ، وبينزلوا لحد
٥٠٪

بس عايزة ناس على الفرازة.

**Mecha** · 14-10-2015 02:21 PM

المشاركة الأصلية كتبت بواسطة seiffoz

بس عايزة ناس على الفرازة.

معلوم معلوم ، عمرهم ما ياخدوا كسر ، وفي العالم
كذلك .الميزه مبتدفعش حاجه ، احسن تدريب وتاهيل
، وبيربوهم كويس سمعت في طلعة التريب المعلم بيلب
بالبوكس لو حصل خطا ، وفي شومة كمان.

**marsguy** · 14-10-2015 08:21 PM

نصيحه أخويه إصرف نظر

أنا هاحكيلك حكاية واحد صديقي مع الطيران.

صديقي ده راجل أهله مقتدرين وما شاء الله معاهم فلوس. هو زيك كده كان نفسه يبقى طيار.

بعد ما خلص ثانويه عامه قدم في معهد مصر للطيران وسقط نظر. راح دخل هندسة طيران إمبابه وقعد فيها سنه. بعد كده عمل ليزك وقدم تاني وإتقبل وبقى مؤهل لدخول معهد مصر للطيران اللي بيستمر لمدة سنتين.

بس هو قالك سنتين كتير أنا أروح أتعلم في أمريكا وممكن أخلص في أقل من سنه. وده اللي عمله فعلاً راح أمريكا وخد الشهاده في 9 شهور.

رجع مصر وكله أمل إنه يشتغل بس إصطدم بالواقع المرير .... الواقع إن في عشران الطيارين خريجين معهد مصر للطيران وغيره مش لاقيين شغل. وده لإن مصر للطيران مش بتعين غير خريجين المعهد بتاعها بس ولازم يكون معاك واسطه كبيره جداَ.

بما إن كل الناس اللي مش لاقيين شغل دول أغنياء وولاد ناس فلما أقولك واسطه كبيره ده معناه إن يكون أبوك وزير مثلاً أو عمك رئيس الوزراء. لكن لواء وعقيد دول مثلاً مش واسطه.

إنت لما تتخرج من المعهد بيكون إسمك commercial pilot بس بيكون إسمك برضو zero hour

يعني إيه zero hour يعني ماعندكش ساعات طيران على أي طراز تجاري.

عشان تعمل ساعات على طراز معين قدامك حاجه من الإثنين:

ربنا يكرمك وتشتغل في شركه والشركه دي هاتديك فرقة simulator الأول على الطراز اللي هاتطير عليه وبعد كده نبداً تطير وتمعل ساعات طيران.
تروح تاخد فرقة simulator الأول على حسابك على طراز من المنتشرين وبعد الفرقه هايكون مثلاً معاك 100 ساعه simulator على الطراز اللي إتدربت عليه.

الفرق دي غاليه جداً بآلافات الدولارات هي كمان. وحتى لو خدتها ده مش ضمان إنك تشتغل خاصة إن مصر للطيران شركه صغيره وبالفعل عندها طيارين أكتر من اللي محتاجاه اصلاً.

فرصة الشغل في شركة طيران محترمه بره مصر برده صعبه جداً عشان ما حدش بيشغل طيار zero hour

الأمل الوحيد إنك تلاقي شغلانه في حاجه زي رش المحاصيل مثلاً أو شركات البترول بره مصر أو في أفريقيا مثلاً في شركات طيران صغيره بتفرج السياح على الغابات بالطيارات.

كون إنك تشتغل jet pilot أول ما تتخرج من معهد الطيران دي مش موجوده غير في بلاد قليله جداً وطبعاً نادره جداً.

في أمريكا مثلاً الطيار عشان يوصل لإنه يبقى jet pilot بيمشي مشوار طويل أوي وبيشتغل مدرب طيران غصب عنه فتره لإجباريه وبيشتغل في شركات تعبانه كل طياراتها صغيره بمراوح قبل ما يحلم يبقى jet pilot.

نصيحه لو بتحب الطيران أوي ممكن تحاول تبقى مضيف مثلاً وأديك هاتسافر كتير برضو وممكن تحوش فلوس الكورس وممكن بعد كده تاخده في جنوب أفريقيا مثلاً

**elpilot** · 14-10-2015 11:29 PM

شكرا والله علي الافاده وكم المعلومات القيمه دي
فيما يبدو ان فرصتي متضائله جدا جدا تكاد تكون منعدمه او يحصل معجزة علشان انجح في لالموضوع ده
وان شاء الله ممكن اكثف جهودي اني اربي ابني تربيه كويسه وباذن الله يطلع طيار ويحقق هو حلمي ربنا يكرمني فيه

**Secret-Man** · 15-10-2015 01:42 AM

دايما الطيارين او القطاع ده فى السوق بيفكرنى بمهندسين البترول
دراسه متميزه ونادره وناس مستوى كويس لكن بيتخرج مبيلاقيش شغل بسهوله لان السوق مقفول وكلها شركات كبيره وبوسايط جامده فبالتالى بتكون فرصته ضعيفه جدا

كذلك دراسه الطيران واحترافه مش سهل واصعب حاجه فيه فعلا انك تلاقى شغل بسهوله فى اى شركه طيران والافضل تكون اجنبيه او خليجيه وده للاسف شبه مستحيل لان اغلب الخليج بقا يدرب الطيارين بتوعه فى امريكا وفى دول تانيه ومش بيحتاجو طيارين من بره زى الاول

ربنا يوفقك وفكر فى حاجه يمكن يكون لك خير فيها افضل من موضوع الطيران ده