المشاركة الأصلية كتبت بواسطة volociximab
كنت عاوز اتجوز ايام الكلية
طبعا مفلس و مش معايا فلوس
البنت الى كنت عاوز اتجوزها ماعرفش شكلها بس من بيت محترم
المهم البنت اتجوزت من غير ما اكلمها او اكلم اهلها
رحت الجيش و كنت باخد مصروفى من ابويا
و طلعت من الجيش على نيابة فى مستشفى
اتقدمت لواحدة و مش عجبنى البيت
و الدراسة اخدتنى و بعد كده سافرت
رجعت و انا معدى ال30
امى و اختى اتفقوا مع واحده انى ازورهم من غير ما يقولولى----اضطريت اروح و لقيت مستواهم اعلى منى و لكن لم اتسرع فى الرفض لغاية مانا الى اترفضت(كنت مبسوط انى مش رفضتها)
رحت لشيوخ-واحد قال لى انا مليش فى الموضوع و التانى بعثت له ايميل استجاب بس لما عرف شروطى طنش
دكتورة من مستوى متوسط مبتشتغلش و ابوها مش شغال فى الضرايب او العسكرية او المحاكم
ابويا عرض عليا واحده ابوها فى الضرايب و رفضت
عرض عليا واحدة تانية ابوها اخوان(اخوان اصلى) قلت له يعنى انا اروح البيت الاقيها نازلة مظاهره؟ متنفعنيش
كلمت شباب من سنى جابولى ناس مش مناسبة-و تحس انهم بيزحلقوك على اى واحده و خلاص(طبعا انا مش بروح لحد غير الى احس انها ممكن تكون مناسبة)
و انا قاعد على الفيس لقيت حساب واحدة شغالة خاطبة
بعدت لها و فعلا تجاوبت بس جابتلى دكتورة من بنى سويف و انا شرقاوى و بعدين اعتذرت لانها لسة فاسخة خطوبتها و مش مستعدة ترتبط دلوقت
و بعدين جابتلى واحدة ابوها كان فى الجيش و طلع من الجيش--قلتلها مش عاوز حد من الميرى -قالتلى دا امام جامع-قلتلها و لو -طريقة التفكير التى تعود عليها و نظام الاوامر ستجعل التعامل بيننا صعب
المهم طنشتنى هى كمان
كبرت فى دماغى حكاية انى اعيش حياتى و اسيبنى من الجواز
و انا قاعد على الفيس لقيت اكونت واحدة ملتزمة بتكتب مواضيع عن الدين و مش بتتعامل مع رجالة
المهم النظام عجبنى فبعثت لها رسالة عشان مش تعملى بلوك ان ممكن حد يوقفك فى الشارع او فى الشغل و يطلب رقم والدك و انا مش عاوز اكلمك و لا رقمك-ادينى رقم والدك
المهم رحت البيت النظام عجبنى-------مش هاقولك ادب و ما الى اخره لان فى اعتقادى معظم البنات عندهن قدر من الادب و لكن بجانب الاساسيات التى يريدها كل رجل هى كانت مناسبة لى
انا ملتحى لا اسمع الاغانى و لا الافلام و عاوز واحدة نفس الدماغ مش نقعد فى شد و جذب
و بالفعل الامور تمت و اهلها لم يكونوا طماعين بالرغم انى كنت راجع من بره و معايا فلوس و بنتهم متعلمة و مهندسة و حافظة القران و صغيرة فى السن يعنى مش مستعجلين
مهر 8 الاف و العفش كلفنى 32 الف و شقة ايجار و مؤخر 10 الاف و شبكة فى الجامع ربع ساعة و فرح تشغيل اناشيد فى بيت العروسة نصف ساعة
خطبتها اسبوعين و بعدين كتبت كتاب و الدخلة كانت بعد تجهيز الشقة بعد 3 شهور من كتب الكتاب و بعد 3 شهور سافرت تانى
الكلام هذا كان سنة 2012 و كان عمرى 31 سنة
الخلاصة رحلة البحث عن زوجة لا تنجح الا مرة واحدة و عندما يأتى نصيبك هتلاقى الامور متيسرة ان شاء الله