تجربتى مع الارتجاع المرئ

السلام عليكم . بقالى كتير عاوز اكتب الموضوع ومكسل لكنى حسيت بالذنب لان ربما فيه حد عنده نفس المشكلة . المهم الموضوع ابتدى عندى من زمان وانا لسه فى العشرينات كانت بتجيلى حالة وانا نايم الاقى نفسى فجأة صحيت على حرقان جامد فى زورى مع الوقت ابتدى الموضوع يزيد . طبعا اتجوزت وبقى الاكل كل يوم شكل لان الزوجة طبعا عاوزة تبين شطارتها وابتدى الموضوع يزيد ابتديت اسأل المعارف والاصدقاء ولاول مرة اسمع كلمة ارتجاع المرئ وده اسمه واخدت بعض النصايح ( طبعا انا كنت باكل كل حاجة من اول البيتزا لحد الكوارع والكرشة ) طبعا النصايح بلاش اكل مسبك بلاش تاكل وتنام على طول وكده وكنت بصراحة ساعات بطنى تغلبنى واكل متأخر فكنت يا اما اخد فوار يا اما افضل صاحى للصبح وطبعا كان وزنى زايد وعندى كرش محترم .
ومرت السنين وعديت الاربعن بشوية وجه رمضان اللى فات طبعا صيام وباكل براحتى وكان الارتجاع ده راح بقاله فترة المهم اتسحرت فى يوم ونمت وبعد 3 ساعات كده صحيت فجأة لكن ياجماعة مقلوكوش صحيت على كحة رهيبة و مش عارف اخد نفسى لا من انفى ولا بقى وتقريبا كنت خلاص باخلص فضلت ثوانى احاول اتشاهد وبعدين برحمة ربنا اخدت نفسى تانى وقعدت فى ذهول
مش عاوز اطول عليكو رحت الاول لدكتور صدر( وهنا الغلطة لانى ظنيت ان الكحة دى هى سبب الخنقة ) طبعا كشف عليا لقانى تمام وكتب لى شوية حاجات احتياطى . للاسف الكحة كانت بتزيد بشكل غريب وانا تفكيرى مراحش للارتجاع خالص . المهم لما الحالة ساءت اكتر نصحنى الاصدقاء بالتوجه لدكتور باطنة وفعلا كشف عليا وقالى كل اللى عندك ده ارتجاع المرئ والارتجاع زاد وأثر على الحنجرة فعمل كحة مزمنة وبالتالى بيسبب اختناق وادانى دوا اسمه كونتورلك دوا المانى بيمنع العصارة المعدية وكمان دوا اسمه جافيسكون وامرنى بالاتى
1 لازم اخس
2 تنظيم الاكل (مفيش دهون ولا حلويات ولا بهارات ولا اكل مسبك ولا مياه غازية واى حاجة حمضية لا يعنى مثلا النعناع والشاى والقهوة وحتى الطماطم لا
3 اخر معاد للاكل الساعة 7
4 تنام رافع راسك ( على فكرة قعدت اسبوع انام على كرسى ولكن ده سبب لى تورم فى القدم والله كنت بحسد النايمين طبيعى)
المهم طبعا المرة دى نفذت الكلام بالحرف . لكن عاوز اقول ان التحسن كان بطئ خصوصا حنجرتى كانت ضايعة
لكن الحمد لله كان فى فوائد كتير يمكن اهمها قربت لربنا اكتر لانى شفت الموت بعنيه وعرفت اد ايه الدنيا ممكن نسبها فى لحظة وكمان عسى ان تكرهوا شيئا لان الموضوع ده عملى فايدة كبيرة اوى وهى تخسيس جسمى وده ان شاء الله هعمله فى موضوع تانى ان شاء الله

أسأل الله تعالى ان يشفيك شفاءا تاما. والف شكر عالموضوع

لا تتهاون بالارتجاع لانه قد ينتهى بورم فى المرىء

شفاك الله وعافاك

و عليكم السلام و رحمة الله و بركاته

ربنا يشفيك و يعافيك و نتعلم درس من حضرتك إن الاكل المعتدل و الفاكهة و الخضروات و البعد عن اللحوم الحمراء و السكريات المميتة في الحلويات و المشروبات ده صحي جداً .. كل واحد يحاسب نفسه عشان ميتعبش ربنا يشفينا جميعا

شفاك الله و عافاك
انا وصلت لنفس مرحلتك و غرغرت و بدأت اتشهد
و من ساعتها لا اكل ابدا قبل النوم
الحمد لله موضوع الشرقه و الصحيان من النوم راحت خالص
و باكل كل حاجه المهم قبل النوم بفتره

أنصحك بعملية ربط فُم المعدة بالمنظار.. عملية بسيطة وبتطلع في نفس اليوم. بتفضل اسبوعين بتشرب سوائل فقط’ وبعدها هتستمتع بحياة طبيعية من جديد.

الحمدلله علي كل شئ وربنا يحفظك من كل ضر وسوء
وكويس انك كتبت تجربتك لان في ناس بيبقي عندها نفس الاعراض ومش بتحط في دماغها

شفاك الله وعافاك وجميع المسلمين

انا باشكر كل الناس اللى ردوا وربنا يحفظهم من اى سوء يارب واحب اطمنكم ان انا خفيت خلال شهر ونص تماما ونسيت حكاية الارتجاع دى لكن .
ودا اللى كنت هعمله فى موضوع جديد لكن هقوله هنا وهو موضوع الخسسان او الرجيم وده بقى الفائدة اللى طلعت بيها .
انا كان وزنى حوالى 97 (طولى 176 ) وكان ليا كرش طبعا وطبعا مش هقولقوا بقى على التعب لما امشى ولما اجى اوطى اربط الشوز دا غير لما اجى اشترى لبس مالاقيش مقاسى وكده .
بعد اللى حصلى وشوفت الموت بعنيه ( وليس المُخبَر كالمعاين) حصل انى بقيت خايف اكل ومشيت على التعليمات بالضبط
- افطر الصبح على الساعة 10 حوالى نص رغيف او رغيف صغير ويكون بلدى (انسى الفينو والشامى) مع حوالى 4او 5 معالق فول (بدون زيت ولا ملح) مع بيضه مسلوقة وممكن حتة جبنة منزوع الدسم واهم حاجة الخياااار والجرجير ( لازم خضراوات )

- الغدا بيبقى لحم من غير دهن او (فراخ منزوعة الجلد ) مع خضار مش مسبك والاحسن سوتيه مع 3 معالق رز دا بيكون الساعة 7 تقريبا وانسى بعد كده محطش حاجة فى بقى ممكن ثمرة جوافة او موزة صغيرة

تقريبا دا بقى اكلى لمدة 4 شهور نسيت كل اللى كنت باكله قبل كده ( المكرونات والبيتزا والحاجة الساقعة والبسبوسة وكل الحلويات وحتى المخلل ( كنت بموت فيه )
وبعد 3شهور نزلت لحوالى 76 كيلو تخيلوا والحمد لله مبسوط انى عديت المرحلة دى
من فوائد الخسسان انى بعد فترة كان لازم حسب نصيحة الاطباء لازم العب رياضة ههه تخيلوا قالك عشان تشد الجلد والترهلات .
فى الاول طنشت لكن بعد فترة ( بقول ايه انا هكمل فى موضوع جديد عشان طولت عليكو