بخصوص السفر الى الدول الافريقية..نصيحة ومساعدة

بسم الله الرحمن الرحيم
انا شاب مصرى مؤهل عالى ومتزوج وكنت عايز اسافر اى دولة افريقيه ابحث عن عمل هناك ..او افتح اى بيزنس صعير مثل مثلا يعنى/بقالة صغيره او افتح محل تصليح موبايل او اشارك اى واحد صيدلى محلى هناك ونفتح صيدلية او اى مشروع طبى مع انى مش دكنور ولا صيدلى ولكنى اعرف ان الخدمات الطبية فى الدول الافريقية محدودة للغاية وغالية الثمن ومكسبها فوق ال200% عموما اى مشروع او مصلحة صغيرة فى اى بلد افريقى مربحة للغاية .. او مثلا اشتغل فى السياحة زى ما بعض الاخوة الكرام فى المنتدى بيقولو تنزانيا فيها فرص جيده للعمل فى السياحة... وياريت لو اى حد عايز يخوض معايا التجربة دى ويسافر معايا اى دولة افريقية نتفق عليها ويشاركنى فى اى بيزنس صغير انا تحت امره .. انا لا احب دول غرب افريقيا ولا دول جنوب افريقيا ولكنى افضل دول قريبة من مصر زى تنزانيا اوغندا السودان مالاوى رواندا ويوجد دولة استثناء فى غرب افريقيا هى جامبيا بيقولو كويسه وفرص انك تكبر فيها متاحة عايز اراء القراء عن الفكرة دى ولو اى حد يعرف اى دولة يقولى سعر اذن العمل السنوى واذن الاقامة السنويه بكام وجزاكم الله خيرا

ربنا يوفقك .... ياريت حضرتك تحط غينيا الاستوائية فى القائمة و تستفسر عنها

متابع باهتمام و ياريت تكلمني علي الخاص

شكرا للاعضاء الذين ردو على موضوعى

اما بالنسبة للاخ الكريم باسم يوسف انا مشاركاتى اقل من 50 مشاركة وليس بامكانى ارسال رساله على الخاص لحضرتك ياريت تراسلنى انت وانا مهتم جدا بالموضوع وناوى السفر باذن الله

تنزانيا دولة واعده وعلى فكره يوجد مصريين يعملون هناك فى السياحه لان السياحة هناك منتعشه جدا وبيروح هناك عرب كتير اوى وطبعا تنزانيا بتتكلم انجليزى كلغة ادارية ورسميه هناك يعنى تنزانيا متعطشه لمن هم يتحدثون العربية وطبعا لازم تكون بتعرف انجليزى يمشيك فى البلد اهم شئ تتطلع اذن اقامة واذن عمل واشتغل هناك ودوس فى اى حاجه وكل بيكسب وبيكسب اوى ان شاء الله اهم شئ النية الخالصة لله ...متاح ليك تشتغل فى العاصمه دار السلام او دودوما او اى محافظه تانيه ..لك حرية الاختيار ولايوجد كفيل ولا الكلام الرخم ده وعلى فكره بيحترموا المصرى جدا وبيتعامل احلى معامله طبعا انا راسلت ناس مصريين شغالين فى تنزانيا هناك ولكن للاسف لم يرد على احد منهم ربما لانهم متخوفين لان اتقاسم معهم لقمة العيش ولكن الرزق يجئ من السماء كنت عايز اعرف نظام ايجار المحلات كام شهرى ولاسنوى وايه الانشطه اللى ماشيه هناك بالتحديد واسعار الاقامة واذن العمل لسنة2015 عموما اقامة تنزانيا600دولار لسنة2014 مش عارف لسنة واحده او سنتين واسعار الفنادق كام وارخصهم لانى رايح اشتغل مش اتفسح يعنى من هذا القبيل...ربنا يكرم ودعواتكم

طبعا انا لست طبيب ولا صيدلى ولكن من خلال بحثى فى النت استخرجت تلك المعلومات
لو اجرنا محل فى اى مكان بتنزانيا وليكن ب1500 دولارا سنويا وجهزناه بحوالى 300 الى 500دولار ارفف خشبية وبنك وشوية كراسى وخلافه ويافطه ورخصناه بحوالى 500 دولار طبعا هنفتحة صيدلية صغيره وجبنا صيدلى تنزانى بياخد فى الشهر حوالى 300 دولار وجبنا ادويه بحوالى 1500دولار يعنى التكلفة حوالى
4.300 الى 5000 دولار تعالوا نشوف هيشتغلوا ازاى:

--- طبعا تنزانيا بلد كويسه وفيها اطباء ومستشفيات لكن تكلفة الكشف الطبى فقط عند اى طبيب مرتفعه جدا جدا
--- لذلك يفضل اهالى تنزانيا كشئ اولى ان يذهبوا للصيدليه ويشرحوا مرضهم للصيدلى هناك وهو يوصفلهم العلاج طبعا فيه صيادله بياخدوا رسم وصف دواء وفيه بياخد سعر الدواء فقط
--- الصيدليات فى تنزانيا كتير بس هم بيفضلوا يروحو عند الاجانب زى الهنود والصينين والبنجلاديش وخلافه ولكنهم يكنون كل الحب للمواطن المصرى هناك بفضل ان معظمهم مسلمين لذا افتتاح اى مصرى هناك مشروع تجارى دا مكسب كبير
----طبعا سعر الدواء هناك غالى جدا مقارنة بمصر بس بردوا مش الدواء بس اللى غالى كل حاجه غاليه هناك
----طبعا اهم شئ فى المشروع ده ان صاحبه يقف فيه بنفسه عشان يراقب الفلوس كويس اوى ...يبقى الصيدلى التنزانى اللى مشغله معاك بيصرف الدواء ويصف الدواء وخلافه وانت شغلتك تاخد الفلوس وتحاسب وتروح بنفسك تجيب النواقص من مكاتب الادوية جمله سواء اجل او كاش
--- مش هقولك ممكن تكسب كام او تخسر كام لان الارزاق بتاعة ربنا سبحانه وتعالى
---ولكن اللى ممكن اقوله ان مكسب الدواء هناك تقريبا ميه فى الميه يعنى لو جبت شريط الدواء ب 5 دولار ممكن تبيعه ب10دولار بص شغلانة الدواء دى مربحة جدا جدا فى الدول الافريقية اهم شئ ورقك سليم وتحسن اختيار الصيدلى التنزانى معاك لانه بردو عليه عامل كبير جدا فى نجاحك طبعا انت قعدت تشتغل سنتين تلاته فى بياعة الدواء قطاعى طيب ما ممكن ربنا يكرمك وتعمل قرشين كويسين وتبعت تجيب كونتنر دواء من مصر وتوزعه جمله فى تنزانيا مش صعبه ومربحة جدا سرنجات ومحاليل وادوية شراب وكبسول ومراهم..............الخ


طبعا الاسعار اللى انا جايبها من نسج خيالى نوعا ما بس بردوا من خلال قرايتى على النت

فى الدول الافريقية بصفة عامة ... عليك مراعاة بعض النقاط الهامة .... مثلا ..

الحالة الامنية .... فهناك بعض المدن .. لا ينصح بتواجد الاجانب ... و لا التواجد فى بعض المناطق و خاصة ليلا

الحالة الاقتصادية .... القيود و التسهيلات الى بتقدمها حكومة البلد دى ... فتح حسابات البنوك ... السحب و الايداع .. الضرائب

الحالة الادارية .... الدنيا مظبوطة و لا لازم تشخلل علشان تعدى ؟!

استعداد السكان المحليين للتعامل مع الاجانب ... عندهم استعداد يتقبلوا غير المحليين و لا لآ

من الافضل .... ان حضرتك تروح تنزانيا و تقيم فيها بعض الوقت و تحتك بالناس هناك ... و اكيد الدنيا حتبان معاك بصورة اوضح

نصيحة صغيرة .. معروفة للجميع ... حاول تتعرف على لبنانيين شغالين فى البلد الى حتروحها ... رجال اعمال شاطرين و بيعرفوا يعملوا بيزنس كويس و حيساعدوك ان شاء الله

ربنا يوفقك

الاخ الفاضل باسم يوسف رديت برساله على اميلك اللى انت باعتهولى
ارجوا من حضرتك ارسال معلومات عنك عشان نعرف ازاى هندبر الموضوع باذن الله

طيب لو تكلفة فتح صيدليه بخمسة الاف دوﻻر فقط كان فتحها التنزانى بنفسه وكسب فيها

متابع .... و ايه نظام المهندسين هناك ؟ مطلوبين ؟
ونسافر ازاي ؟

وانا طبيب بشرى ونفسى اسفر تنزانيا برضه سواء اشتغلت فيها دكتور أو لأ .. هدور انا كمان على فرص للاطباء هناك ولو حد قابلته معلومة مفيده يا ريت يكتبها ..